កម្ពុជាបានរកឃើញអ្នកឆ្លងមេរោគកូវីដ ១៩ នៅទូទាំងប្រទេសតែចំនួន ០២ នាក់ប៉ុណ្ណោះ នៅក្នុងរបាយការណ៍របស់ក្រសួងសុខាភិបាល ថ្ងៃទី ២៥ ខែ មេសា ឆ្នាំ ២០២២ ដែលនឹងត្រូវចេញផ្សាយនៅថ្ងៃទី ២៦ ខែមេសា នេះ។ នេះបើតាមការថ្លែងឱ្យដឹងពីលោកនាយករដ្ឋមន្រ្តី ហ៊ុន សែន។
តាមរយៈសារសំឡេងពិសេស លោក ហ៊ុន សែន បានលើកឡើងដោយបានធ្វើការអបអរសាទរ និងថ្លែងអំណរគុណទៅដល់ប្រជាពលរដ្ឋដែលបានចូលរួមយ៉ាងសកម្មក្នុងការគាំទ្រនូវរាល់វិធានការទាំងឡាយដែលរាជរដ្ឋាភិបាលបានដាក់ចេញឱ្យអនុវត្តនាពេលកន្លងមក។
លោកមានប្រសាសន៍ថា៖ «ដោយសារតែមានការចូលរួមរបស់ប្រជាពលរដ្ឋនេះហើយ ដែលធ្វើឱ្យប្រទេសរបស់យើងមានភាពធូរស្រាល ហើយថ្ងៃនេះនៅទូទាំងព្រះរាជាណាចក្រកម្ពុជា មានអ្នកឆ្លងជំងឺកូវីដ ១៩ ត្រឹមតែ ២ នាក់តែប៉ុណ្ណោះ ដែលជាព្រឹត្តិការណ៍មិនធ្លាប់មាន និងជាលើកដំបូងក្នុងប្រវត្តិជាងមួយឆ្នាំកន្លងមកនេះ នៅក្នុងរាជធានីភ្នំពេញមិនមានឆ្លងនោះទេ សម្រាប់ថ្ងៃទី ២៥ ខែមេសា»។
លោកនាយករដ្ឋមន្ត្រី ហ៊ុន សែន បានបន្ថែមថា ទាំងនេះគឺជាសមិទ្ធផលមួយដែលគួរឱ្យកោតសរសើរ និងត្រេកអរចំពោះការចូលរួមរបស់ប្រជាពលរដ្ឋ និងការខិតខំរបស់ស្ថាប័នមានសមត្ថកិច្ច ជាពិសេសក្រុមគ្រូពេទ្យ និងផ្នែកពាក់ព័ន្ធនានាដែលបានចូលរួមអនុវត្តនូវវិធានការទាំងនេះ៕