ភ្នំពេញៈ បើទោះពីជាការឆ្លងរាលដាលនៃជំងឺកូវីដ ១៩ មានការថយចុះស្ទើរតែទាំងស្រុងក៏ដោយក៏មន្ត្រីជាន់ខ្ពស់ក្រសួងសុខាភិបាលបានជំរុញ និងក្រើនរំឭក ទៅដល់គ្រប់មន្ទីរសុខាភិបាលរាជធានីខេត្តទាំងអស់ត្រូវបន្តត្រៀមលក្ខណៈឱ្យរួចរាល់ ដើម្បីឆ្លើយតបឱ្យបានទាន់ពេលវេលាទៅនឹងការផ្ទុះឡើងវិញនូវការឆ្លងរាតត្បាតនៃជំងឺកូវីដ ១៩។
រដ្ឋលេខាធិការក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេស លោកស្រី ឱ វណ្ណឌីន ថ្លែងកាលពីសប្តាហ៍មុនក្នុងអំឡុងពេលលោកស្រីចុះពិនិត្យមើលដំណើរការចាក់វ៉ាក់សាំងកូវីដ ១៩ នាខេត្តមណ្ឌលគិរី ថា មន្ទីរសុខាភិបាលខេត្តនេះ និងបណ្តាមន្ទីរសុខាភិបាលផ្សេងៗទៀតបានត្រៀមលក្ខណៈជាប់ជានិច្ចផងដែរ។ លោកស្រីមានប្រសាសន៍ថា៖ «នេះគឺជាចំណុចដែលក្រសួងសុខាភិបាល តែងតែធ្វើការណែនាំឱ្យគ្រប់មន្ទីរសុខាភិបាលទាំង ២៥ រាជធានីខេត្ត ត្រូវយកចិត្តទុកដាក់ក្នុងការត្រៀមលក្ខណៈឱ្យបានរួចរាល់ទុកជាមុន ដើម្បីកុំឱ្យមានហេតុការណ៍កើតឡើង យើងមិនដឹងធ្វើយ៉ាងម៉េច»។
ជាទូទៅតាមមន្ទីរសុខាភិបាលបានត្រៀមរួចរាល់ហើយ ដោយមិនមានការបារម្ភនោះឡើយពីការងើបឡើងវិញដោយប្រការណាមួយពីមេរោគកូវីដ ១៩ នេះ ដែលក្រុមគ្រូពេទ្យអាចជួយសង្គ្រោះអ្នកជំងឺបានទាន់ពេលវេលា។
ជាមួយគ្នានោះដែរ លោកស្រី វណ្ណឌីន ក៏ថ្លែងដែរថា ក្រុមគ្រូពេទ្យបានលើកឡើងថា អ្វីដែលសំខាន់ គឺការជំរុញការចាក់វ៉ាក់សាំងកូវីដ ១៩ ពីព្រោះប្រសិនបើការចាក់វ៉ាក់សាំងនេះគ្របដណ្តប់ឱ្យបានទាំងអស់ នោះការឈឺ ឬការស្វែងរកការសម្រាកព្យាបាល មិនមានភាពធ្ងន់ធ្ងរ នោះពួកគាត់អាចសម្រាកព្យាបាលនៅផ្ទះបាន។
ដោយឡែក ទាក់ទងនឹងការប្រើប្រាស់ឱសថសម្រាប់ព្យាបាលជំងឺកូវីដ ១៩ និងប្រដាប់ធ្វើតេស្តរហ័សរកមេរោគកូវីដ ១៩ ហាក់មានការថយចុះនូវតម្រូវការបន្ទាប់ពីអត្រានៃការឆ្លងមេរោគកូវីដ ១៩ ពិសេសមេរោគបំប្លែងថ្មីអូមីក្រុងបានថយចុះ។
ទាក់ទងនឹងចំណុចនេះដែរ លោកស្រី ឱ វណ្ណឌីន បញ្ជាក់ថា តម្រូវការឱសថព្យាបាល និងប្រដាប់ធ្វើតេស្តរហ័សគឺអាស្រ័យលើស្ថានភាពនៃការឆ្លងមេរោគនេះ ដែលអត្រានៃការឆ្លងនេះក៏អាស្រ័យលើការចាក់វ៉ាក់សាំងបានគ្រប់ៗគ្នា ពិសេសដូសទី ៣ និងដូសទី ៤ និងបូករួមជាមួយនឹងការប្រុងប្រយ័ត្នរៀងៗខ្លួន រួមនឹងការការពារផងដែរ។ លោកស្រីបញ្ជាក់ថា៖ «ប្រសិនបើយើងមិនមានការប្រុងប្រយ័ត្នទេ លទ្ធភាពនៃការឆ្លងអាចខ្ពស់ ដែលធ្វើឱ្យតម្រូវការនៃការធ្វើតេស្តក៏មានច្រើនដែរ ដែលជាហេតុនាំឱ្យមានការប្រើប្រាស់ប្រដាប់ធ្វើតេស្តរហ័សក៏ដូចជាការតម្រូវការនៃការប្រើឱសថក៏មានកំណើន»។
មន្ត្រីក្រសួងប្រៃសណីយ៍ និងទូរគមនាគមន៍ មិនអាចទាក់ទងសុំការបញ្ជាក់ពីការលក់ឱសថព្យាបាលជំងឺកូវីដ ១៩ បានឡើយ។ គួររំឭកផងដែរថា ឱសថសម្រាប់ព្យាបាលជំងឺកូវីដ ១៩ ប្រភេទ ម៉ូលណូពីរ៉ាវា និងប្រដាប់ធ្វើតេស្តរហ័សរកមេរោគកូវីដ ១៩ ត្រូវបានប្រជាពលរដ្ឋដណ្តើមគ្នាទិញជារៀងរាល់ថ្ងៃទាំងនៅក្រសួងប្រៃសណីយ៍ និងទូរគមនាគមន៍ និងនៅតាមឱសថស្ថាននានា ដោយសារមានការផ្ទុះឡើងនូវការឆ្លងរាលដាលនៃមេរោគកូវីដ ១៩ បំប្លែងថ្មី ប្រភេទអូមីក្រុង ក្នុងអំឡុងដើមឆ្នាំ ២០២២ កន្លងមកនេះ៕