.jpg)
ក្រសួងការងារបន្តកិច្ចសហប្រតិបត្តិការជាមួយ IOM លើគម្រោងទី២។ រូបថត ក្រសួងការងារ
ភ្នំពេញៈ ក្រសួងការងារ និងបណ្តុះបណ្តាលវិជ្ជាជីវៈបានឯកភាពបន្តកិច្ចសហប្រតិបត្តិការជាមួយអង្គការទេសន្តរប្រវេសន៍អន្តរជាតិ (IOM) ក្នុងការអនុវត្តគម្រោងសម្រាប់ជំហានទី ២ បន្ទាប់ពីគម្រោងកាត់បន្ថយភាពក្រីក្រតាមរយៈការធ្វើចំណាកស្រុកដោយសុវត្ថិភាពទទួលបានជោគជ័យ។
សម្រាប់គម្រោងកាត់បន្ថយភាពក្រីក្រតាមរយៈការធ្វើចំណាកស្រុកដោយសុវត្ថិភាព ការកសាងជំនាញ និងលើកកម្ពស់ការរកការងារឱ្យធ្វើនៅក្នុងប្រទេសកម្ពុជា ឡាវ មីយ៉ាន់ម៉ា និងថៃ (PROMISE) ក្នុងជំហានទី ១ ដែលបានអនុវត្តនាពេលកន្លងមក (ចាប់ពីខែកញ្ញា ឆ្នាំ ២០១៧ ដល់ខែសីហា ឆ្នាំ ២០២១) ត្រូវបានបញ្ចប់ជាស្ថាពរ។
លោកស្រី Nenette Motus តំណាង IOM ប្រចាំតំបន់អាស៊ី និងប៉ាស៊ីហ្វិក និងលោកស្រី KRISTIN PARCO តំណាង IOM ប្រចាំនៅកម្ពុជា នាព្រឹកថ្ងៃទី ២៥ ខែមេសា ឆ្នាំ ២០២២ បានចូលជួបលោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ដើម្បីសុំការឯកភាពគាំទ្រលើការអនុវត្តគម្រោង PROMISE ក្នុងជំហានទី ២ បន្តទៀត (ចាប់ពីខែកញ្ញា ឆ្នាំ ២០២១ ដល់ ខែសីហា ឆ្នាំ ២០២៥)។
នាជំនួបនោះ លោក អ៊ិត សំហេង បានឯកភាពចំពោះដំណាក់កាលទី ២ និងបានវាយតម្លៃខ្ពស់ចំពោះអង្គការ IOM ដែលបានដើរតួនាទីយ៉ាងសំខាន់លើការផ្សព្វផ្សាយបញ្ហាទេសន្តរប្រវេសន៍ ប្រកបដោយស្ថិរភាព និងជាដៃគូមិនអាចខ្វះបាននៅក្នុងតំបន់អាស៊ីប៉ាស៊ីហ្វិក និងកម្ពុជា។
លោកបានគូសបញ្ជាក់ថា ជាពិសេសស្ថិតក្នុងដំណាក់កាលកូវីដ ១៩ ដែលពលករមិនអាចធ្វើការឆ្លងកាត់បានត្រូវជាប់គាំងនៅតាមបណ្តាប្រទេសនីមួយៗ ត្រូវបានអង្គការ IOM បានធ្វើការដោះស្រាយបញ្ហានេះប្រកបដោយប្រសិទ្ធភាព។ លោករដ្ឋមន្ត្រីក៏បានស្នើដល់អង្គការ IOM បង្កើនកិច្ចសហប្រតិបត្តិការជាមួយក្រសួងលើគម្រោងសម្រាប់ផ្តល់ជំនួយទាក់ទងនឹងការទប់ស្កាត់ការរីករាលដាលជំងឺកូវីដ ១៩ សម្រាប់ពលករទេសន្តរប្រវេសន៍ និងជួយគាំទ្រក្នុងការអនុវត្តលើលទ្ធផលសន្និសីទថ្នាក់រដ្ឋមន្ត្រី ការងារលើកទី ៣ CLMVT កាលពីថ្ងៃទី ១៧ ខែកញ្ញា ឆ្នាំ ២០១៩ នៅខេត្តសៀមរាប ទាក់ទងទៅនឹងផែនទីបង្ហាញផ្លូវទីក្រុងសៀមរាប ដើម្បីឆ្ពោះទៅកាន់ការចេញសេចក្តីថ្លែងការណ៍របស់រដ្ឋមន្ត្រីការងារស្តីពីចល័តភាពរបបសន្តិសុខសង្គមសម្រាប់ពលករទេសន្តរប្រវេសន៍នៃប្រទេស CLMVT។
លោកស្រី Nenette Motus បានគូសបញ្ជាក់ថា គម្រោង PROMISE គឺជាកម្មវិធីថ្នាក់តំបន់ អនុវត្តក្រោមការដឹកនាំរបស់ IOM ដោយទទួលបានការគាំទ្រពីទីភ្នាក់ងារស្វ៊ីសសម្រាប់ការអភិវឌ្ឍ និងកិច្ចសហប្រតិបត្តិការ។
ខណៈកម្ពុជាត្រូវធ្វើជាម្ចាស់ផ្ទះ ក្នុងកិច្ចប្រជុំអាស៊ានសម្រាប់ឆ្នាំនេះ លោកស្រីក៏មានបំណងផ្តល់ការគាំទ្រលើបញ្ហាបច្ចេកទេស និងឯកសារមួយចំនួន ក្នុងករណីមានរបៀបវារៈពាក់ព័ន្ធទៅនឹងកិច្ចប្រជុំ ស្តីពីពលករទេសន្តរប្រវេសន៍នេះ និងផ្តល់ជំនួយបច្ចេកទេសលើគោលនយោបាយទេសន្តរប្រវេសន៍នៅកម្ពុជាផងដែរ។
អ្នកគ្រប់គ្រងកម្មវិធីការងារនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស របស់អង្គការសង់ត្រាល់ លោក ឃុន ថារ៉ូ បានថ្លែងដោយចង់ឃើញថា រដ្ឋាភិបាលកម្ពុជា គួរមានយន្តការត្រួតពិនិត្យជាក់ស្តែង ចំពោះប្រទេសដែលទទួលយកពលករខ្មែរ ដើម្បីធានាដល់ការលើកកម្ពស់សិទ្ធិក្នុងការការពារ ក្របខ័ណ្ឌ សុខុមាលភាព និងសិទ្ធិការងារ ដែលមាននៅក្នុងកិច្ចព្រមព្រៀងរវាងប្រទេស និងប្រទេស។
លោកថា៖ «រឿងដែលសំខាន់ការលើកកម្ពស់ស្តង់ដានៃការអនុវត្តក្របខ័ណ្ឌគោលនយោបាយតែមួយត្រូវមានយន្តការឆ្លើយតបក្នុងករណីដែលមានការប្រឈមទៅនឹងការកេងប្រវ័ញ្ចទៅនឹងកម្លាំងពលកម្ម ដូចជាពលករ-ខ្មែរកំពុងបម្រើការងារនៅថៃ»៕
