.jpg)
កិច្ចប្រជុំរវាងក្រុមហ៊ុនណាហ្គាវើលដ៍ និងអតីតបុគ្គលិកក្រោមការសម្របសម្រួលពីក្រសួងការងារ។ រូបថត ក្រសួងការងារ
ភ្នំពេញៈ ក្រសួងការងារ និងបណ្តុះបណ្តាលវិជ្ជាជីវៈបានកំណត់កិច្ចប្រជុំជាថ្មីនៅថ្ងៃទី ៤ ខែឧសភាខាងមុខ ដែលជាកិច្ចប្រជុំដោះស្រាយវិវាទការងារលើកទី ៩ រវាងក្រុមហ៊ុនណាហ្គាវើលដ៍ និងអតីតបុគ្គលិក នៅក្រុមហ៊ុននេះ បន្ទាប់ពីការចរចាចំនួន ៨ លើកកន្លងមកពុំទាន់រកឃើញចំណុចឯកភាពគ្នា។
សេចក្តីជូនដំណឹងស្តីពីវឌ្ឍនភាពនៃការដោះស្រាយវិវាទរួម នៅក្រុមហ៊ុនណាហ្គាវើលដ៍បានឱ្យដឹងថា ក្រសួងការងារបានបន្តអញ្ជើញគូភាគីវិវាទមកជួបប្រជុំ ដោះស្រាយ ជាលើកទី ៨ នៅថ្ងៃទី ២២ ខែមេសា ឆ្នាំ ២០២២ ដោយមានការចូលរួមពីតំណាងក្រុមហ៊ុន និងតំណាងកម្មករ និយោជិត ប៉ុន្តែភាគីទាំង ២ នៅមិនទាន់ឯកភាពគ្នាលើចំណុចណាមួយឡើយ។
សេចក្តីជូនដំណឹងបន្តថា៖ «ដូចនេះក្រសួងបានកំណត់កាលបរិច្ឆេទប្រជុំបន្ទាប់ នៅថ្ងៃពុធ ទី ៤ ខែឧសភា ឆ្នាំ ២០២២ វេលាម៉ោង ១៤:៣០ នាទី ដើម្បីឱ្យភាគីទាំង ២ មានឱកាសពិចារណាឡើងវិញអំពីលទ្ធភាពនៃការសម្បទានគ្នាទៅវិញទៅមកដែលអាចឈានទៅបញ្ចប់វិវាទនេះ»។
ចំពោះមតិរបស់សហជីព និងតំណាងភាគីកម្មករនិយោជិត នៅតែស្នើឱ្យក្រុមហ៊ុនទទួលយកកម្មករនិយោជិត ២០០ នាក់ ដែលត្រូវបានបញ្ឈប់ពីការងារចូលធ្វើការវិញ។ ភាគីសហជីពថា៖ «ក្រុមហ៊ុន អាចទទួលយកកម្មករ និយោជិតទាំង ២០០ នាក់ ដោយផ្តល់ការងារឱ្យកម្មករនិយោជិតធ្វើការឆ្លាស់វេន ចំពោះខែទី ១ ចំនួន ៥០% ខែទី ២ ៧០% និងកើនឡើងបន្តបន្ទាប់រហូតដល់មានវេនធ្វើការងារពេញវិញ»។
តាមរយៈក្រសួងការងារ សហជីពស្នើសុំទម្លាក់បទចោទ ចំពោះតំណាងកម្មករនិយោជិតនៃក្រុមហ៊ុនណាហ្គាវើលដ៍ទាំងអស់ សុំបើកការិយាល័យសហជីពឡើងវិញ និងស្នើសុំយកទូរស័ព្ទ កុំព្យូទ័រ និងសម្ភារផ្សេងៗមកប្រើប្រាស់ ដើម្បីធ្វើការទំនាក់ទំនងការងារវិញ។ បន្ថែមពីនេះស្នើសុំឱ្យក្រុមហ៊ុនផ្ដល់ជម្រើសឱ្យមកខាងភាគីកម្មករ និយោជិត ដើម្បីឱ្យមានភាពយុត្តិធម៌ស្មើគ្នា។
ចំណែកមតិរបស់ក្រុមហ៊ុនណាហ្គាវើលដ៍វិញ គឺតំណាងក្រុមហ៊ុននៅរក្សាជំហរមិនទទួលយកកម្មករនិយោជិតចំនួន ២០០ នាក់ ដែលបានបញ្ឈប់ពីការងារនេះវិញទេ។ តំណាងក្រុមហ៊ុនថា៖ «ជាក់ស្ដែងក្រុមហ៊ុនធ្លាប់បានបញ្ជាក់រួចមកហើយថា បច្ចុប្បន្ននេះ បើទោះបីជាមានបុគ្គលិកប្រហែល ៥០០ នាក់ ដែលបន្តអវត្តមានពីកន្លែងការងារ ក៏មិនមានផលប៉ះពាល់ដល់ដំណើរការអាជីវកម្មរបស់ក្រុមហ៊ុនដែរ»។
ក្រុមហ៊ុនបានគូសបញ្ជាក់ថា ម្យ៉ាងវិញទៀត បុគ្គលិកដែលកំពុងបំពេញការងារក៏មិនទាន់មានការងារធ្វើពេញលេញនៅឡើយដែរ។
ក្រសួងការងារបានឱ្យដឹងថា ក្រោយពីការពិភាក្សាគ្នាយ៉ាងផុលផុស ភាគីទាំង ២ នៅមិនទាន់ឈានដល់ចំណុចព្រមព្រៀងគ្នានៅឡើយទេ។
អ្នកគ្រប់គ្រងកម្មវិធីការងារនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្សលោក ឃុន ថារ៉ូ ធ្លាប់មានប្រសាសន៍ថា ការដោះស្រាយវិវាទការងារទាមទារឱ្យមានឆន្ទៈ និងការសម្បទានគ្នាទៅវិញទៅមកទើបអាចឈានទៅរកដំណោះស្រាយឃើញ។ យ៉ាងណាមិញលោកមើលឃើញថា ក្នុងករណីនេះទាល់តែមានការអន្តរាគមន៍ណាមួយ ទើបអាចឈានទៅរកដំណោះស្រាយបានខណៈភាគីទាំង ២ នៅប្រកាន់ជំហររៀងៗខ្លួន។
ជាមួយគ្នានេះ ក្រសួងក៏បញ្ជាក់ដែរថា បើទោះបីជាមិនទាន់មានការឯកភាពគ្នាក៏ក្រសួងនឹងបន្តខិតខំធ្វើការសម្របសម្រួល និងកំណត់កាលបរិច្ឆេទជួបប្រជុំជាបន្តបន្ទាប់ទៀតស្របតាមតួនាទី ដែលកំណត់ដោយច្បាប់ ក៏ដូចជាការទាមទាររបស់គូភាគី។
ជាថ្មីម្តងទៀត ក្រសួងការងារ បានស្នើឱ្យភាគីទាំង ២ មានការយោគយល់គ្នាខ្ពស់ ក្នុងការចូលរួមដោះស្រាយបញ្ចប់វិវាទការងារនេះ ដោយបន្តសហការជិតស្និទ្ធជាមួយអាជ្ញាធរមានសមត្ថកិច្ច និងភាគីពាក់ព័ន្ធដោយសន្តិធីដើម្បីថែរក្សាសន្តិសុខសណ្ដាប់ធ្នាប់សាធារណៈ។
យ៉ាងណាក្តី ក្រសួងការងារបានបញ្ជាក់ថា យោងតាមនីតិវិធីច្បាប់ ប្រសិនបើវិវាទការងារនេះ មិនអាចស្វែងរកដំណោះស្រាយបាន ដោយការផ្សះផ្សា នីតិវិធីបន្ទាប់ គឺអាចបញ្ជូនទៅតុលាការដើម្បីរកដំណោះស្រាយចុងក្រោយ៕
