ស្វាយរៀងៈ បុរសម្នាក់បានស្លាប់នៅក្នុងគំនរភ្នក់ភ្លើង បន្ទាប់ពីមានករណីអគ្គិភ័យដ៏រន្ធត់មួយបានកើតឡើងនៅក្នុងភូមិ-ឃុំព្រះពន្លា ស្រុកកំពង់រោទ៍ ខេត្តស្វាយរៀងកាលពីព្រលឹមស្រាងៗថ្ងៃទី ២៥ ខែមេសា ឆ្នាំ ២០២២។ នេះបើតាមការប្រាប់ឱ្យដឹងពីមន្ត្រីនគរបាលមូលដ្ឋាន។
លោក គង់ ថារ៉ូ នាយនគរបាលប៉ុស្តិ៍ឃុំព្រះពន្លា បានប្រាប់ភ្នំពេញប៉ុស្តិ៍ថា ជនរងគ្រោះ ឈ្មោះ សោម ចិន អាយុ ៣០ ឆ្នាំ ជាអ្នកប្រកបមុខរបររកស៊ីបញ្ចូលហ្គាសលក់នៅក្នុងភូមិឃុំកើតហេតុនោះ បានឆេះស្លាប់នៅក្នុងភ្នក់ភ្លើងដ៏គួរឱ្យអាសូរ បន្ទាប់ពីគាត់បានយកកំប៉ុងហ្គាសតូចៗទៅបញ្ចូលដើម្បីទុកលក់ឱ្យអតិថិជនរបស់គាត់ដូចសព្វដង ហើយក៏ស្រាប់តែមានករណីអគ្គិភ័យឆាបឆេះ បណ្ដាលឱ្យផ្ទុះធុងហ្គាសកើតឡើងតែម្ដង។
លោកថា៖ «សមត្ថកិច្ចយើងបានពិនិត្យឃើញ សពរបស់គាត់បានឆេះខ្លោចស្ទើរក្លាយជាដុំធ្យូង ស្ថិតនៅក្បែរធុងហ្គាសធំៗ និងគំនរកំប៉ុងហ្គាសតូចៗជាច្រើន គួរឱ្យអាសូរបំផុត»។
ចំណែកលោក ឈឹម រតនៈ អធិការរងស្រុកកំពង់រោទ៍ទទួលបន្ទុកផ្នែកអគ្គិភ័យ បានប្រាប់ភ្នំពេញប៉ុស្តិ៍ថា គ្រោះអគ្គិភ័យនោះអាចបណ្ដាលមកពីជនរងគ្រោះជក់បារីក្នុងពេលកំពុងផ្ទេរ ឬបញ្ចូលហ្គាស ដោយខ្វះការប្រុងប្រយ័ត្ន ឬ អាចបណ្ដាលមកពីការលេចធ្លាយធុង ឬក្បាលបញ្ចូលហ្គាសពីធុងធំមកកំប៉ុងតូចៗ។
លោកថា៖ «ជាទូទៅករណីផ្ទុះធុងហ្គាស ឬកំប៉ុងហ្គាសភាគច្រើន បណ្ដាលមកពីការលេចធ្លាយទុយោ ដែលនៅជាប់ក្បាលធុង ឬកំប៉ុងហ្គាស ហើយនៅពេលចំហាយហ្គាសទៅប៉ះនឹងអណ្ដាតភ្លើងពេលដាំស្ល ឬកម្ទេចភ្លើងបារី ដែលបោះចោលមិនប្រយ័ត្ន វានឹងឆាបឆេះ និងផ្ទុះឡើងបង្កជាអគ្គិភ័យតែម្ដង»។ អគិ្គភ័យនោះ មិនបង្កឆេះរាលដាលដល់ផ្ទះអ្នកភូមិនៅក្បែរនោះទ៕