ភ្នំពេញៈ រដ្ឋមន្ដ្រីក្រសួងអប់រំ យុវជន និងកីឡា លោក ហង់ជួន ណារ៉ុន អំពាវនាវសុំឱ្យសប្បុរសជនក្នុង និងក្រៅប្រទេសជួយឧបត្ថម្ភជារង្វាន់ និងការលើកទឹកចិត្តបន្ថែមដល់ជយលាភីសិស្សពូកែ នៅទូទាំងប្រទេសផ្នែកអក្សរសិល្ប៍ខ្មែរ គណិតវិទ្យា និងរូបវិទ្យា សម្រាប់ការប្រឡងសិស្សពូកែទូទាំងប្រទេសនាខែមិថុនាខាងមុខ។
យោងតាមសេចក្តីអំពាវនាវរបស់លោក ហង់ជួន ណារ៉ុន កាលពីថ្ងៃទី ១៥ មេសា សរសេរថាក្នុងគោលបំណងលើកកម្ពស់គុណភាពអប់រំ តាមរយៈការអភិវឌ្ឍធនធានមនុស្ស ដែលមានចំណេះដឹង និងជំនាញ ប្រកបដោយសមត្ថភាពខ្ពស់ សំដៅអភិវឌ្ឍសេដ្ឋកិច្ច ក៏ដូចជា កសាងសង្គមជាតិ ឱ្យបានរឹងមាំ ក្រសួងអប់រំ តែងតែរៀបចំការប្រឡងជ្រើសរើសសិស្សពូកែទូទាំងប្រទេស ផ្នែកអក្សរសិល្ប៍ខ្មែរ គណិតវិទ្យា និងរូបវិទ្យាសម្រាប់សិស្សថ្នាក់ទី ៩ និងថ្នាក់ទី ១២។
ពិធីបើកការប្រឡងនេះនឹងប្រព្រឹត្តទៅនាថ្ងៃទី ១២ ខែមិថុនា ឆ្នាំ ២០២២ នៅក្នុងបរិវេណវិទ្យាល័យ ១០ មករា ១៩៧៩ ខេត្តសៀមរាប។ ពិធីបិទចែកវិញ្ញាបនបត្រ និងរង្វាន់ជយលាភីនឹងប្រព្រឹត្តទៅនាថ្ងៃទី ១៩ ខែមិថុនា ឆ្នាំ ២០២២ នៅក្នុងបរិវេណវិទ្យាល័យ ខេត្តសៀមរាប។
លោកថ្លែងតាមរយៈលិខិតនេះថា៖ «ដើម្បីធ្វើឱ្យពិធីនេះកាន់តែអធិកអធម ក្រសួងអប់រំ សូមធ្វើការអំពាវនាវចំពោះសម្តេច ឯកឧត្តម លោកជំទាវ លោកឧកញ៉ា អ្នកឧកញ៉ា លោក លោកស្រី អ្នកនាងកញ្ញា និងសប្បុរសជនក្នុងប្រទេសក៏ដូចក្រៅប្រទេស មេត្តាជួយឧបត្ថម្ភជាថវិកា ជាសម្ភារ សម្រាប់ជារង្វាន់ និងការលើកទឹកចិត្តបន្ថែមដល់ជយលាភីសិស្សពូកែទូទាំងប្រទេសសំដៅជំរុញចលនានេះឱ្យកាន់តែមានប្រសិទ្ធភាពខ្ពស់នៅឆ្នាំបន្តបន្ទាប់»។ បើតាមសេចក្ដីអំពាវនាវ សប្បុរសជននឹងត្រូវអញ្ជើញឱ្យចូលរួមក្នុងពិធីចែកវិញ្ញាបនបត្រ និងរង្វាន់ជយលាភី ដើម្បីទទួលលិខិតថ្លែងអំណរគុណ។ កន្លែងទទួលការឧបត្ថម្ភពីសប្បុរសជន គឺនៅនាយកដ្ឋានកិច្ចការប្រឡងរបស់ក្រសួងអប់រំ ស្ថិតនៅអគារលេខ ១៦៩ មហាវិថីព្រះនរោត្តម រាជធានីភ្នំពេញ ឬទំនាក់ទំនងតាមទូរស័ព្ទលេខ ០១២ ៨៤៣ ៤៧៥ និង ០៧៧ ៩៩៤ ២០០។
លោក អ៊ិន ពៅសម្បត្ដិ ប្រធានមន្ទីរអប់រំ ខេត្ដត្បូងឃ្មុំ បានថ្លែងនៅថ្ងៃទី ២៤ មេសាថា មន្ទីរអប់រំសហការជាមួយវិទ្យាល័យ និងអនុវិទ្យាល័យក្នុងខេត្ដកំពុងរៀបចំការប្រឡងជ្រើសរើសសិស្សពូកែថ្នាក់ខេត្ដ។ ការប្រឡងបានបញ្ចប់នៅម៉ោង ៤ ល្ងាចថ្ងៃទី ២៤ មេសា ហើយលទ្ធផលនៃការប្រឡងសិស្សពូកែនេះនឹងចេញនៅថ្ងៃទី ៣០ ខែមេសា ដើម្បីបញ្ជូនឈ្មោះសិស្សពូកែទៅត្រៀមចូលរួមប្រកួតសិស្សពូកែថ្នាក់ជាតិនាខែមិថុនាខាងមុខ។ លោកបញ្ជាក់ថា៖ «យើងមិនទាន់ហ៊ានសន្និដ្ឋានថាសិស្សពូកែក្នុងខេត្ដយើងអាចប្រកួតប្រជែងឈ្នះសិស្សពូកែមកពីរាជធានីខេត្ដដទៃទៀតឬអត់ទេ។ ប៉ុន្ដែពេលនេះ យើងកំពុងខិតខំប្រឡងជ្រើសរើសឱ្យអស់ពីលទ្ធភាពដើម្បីចម្រាញ់យកសិស្សល្អ ពូកែសម្រាប់ត្រៀមទៅប្រឡងថ្នាក់ជាតិ»។ កាលពីការប្រឡងថ្នាក់ជាតិនាពេលកន្លងទៅ សិស្សពូកែនៅខេត្ដត្បូងឃ្មុំក៏ធ្លាប់ទទួលបានជយលាភីថ្នាក់ជាតិដែរ ផ្នែកគណិតវិទ្យា និងអក្សរសាស្ដ្រខ្មែរ ប៉ុន្តែជាប់នៅចំណាត់ថ្នាក់លេខ ១០ ក្នុងចំណោមសិស្សពូកែមកពីរាជធានីខេត្តផ្សេងទៀត។
លោក ប៉ិច រតនា ប្រធានមន្ទីរអប់រំខេត្ដឧត្ដរមានជ័យឱ្យដឹងថា ការប្រឡងសិស្សពូកែថ្នាក់ខេត្តនឹងចាប់ផ្ដើមនៅថ្ងៃទី ២៧ ខែមេសា ហើយលទ្ធផលនៃការប្រឡងនឹងចេញនៅថ្ងៃទី ២៩ មេសា។ ការប្រឡងនេះមានសិស្សមកពីវិទ្យាល័យចំនួន ៩ និងអនុវិទ្យាល័យចំនួន ២៩ ដើម្បីប្រឡងជ្រើសរើសយកសិស្សពូកែថ្នាក់មធ្យមសិក្សាបឋមភូមិ និងមធ្យមសិក្សាទុតិយភូមិយកទៅចូលរួមប្រឡងថ្នាក់ជាតិ៕
វីដេអូ៖