ភ្នំពេញៈ គណៈកម្មាធិការ​ជាតិ​រៀបចំ​បុណ្យជាតិ អន្តរជាតិ​បាន​ណែនាំ​ឱ្យ​គ្រប់​ក្រសួង ស្ថាប័ន និង​រដ្ឋបាល​រាជធានី ខេត្ត​ចាត់តាំង​ថ្នាក់ដឹកនាំ មន្ត្រីរាជការ និង​ប្រជាពលរដ្ឋ​ចូលរួម​ក្នុង​ពិធីបុណ្យ​ពិសាខបូជា ដោយ​អនុវត្ត​វិធានការ​សុខាភិបាល​ឱ្យបាន​ខ្ជាប់ខ្ជួន ព្រមទាំង​តុបតែង​លម្អ​ដោយ​ទង់ជាតិ ទង់សាសនា ទង់​ព្រះមហាក្សត្រ បដា​ពាក្យស្លោក តាម​ក្រសួង​ស្ថាប័ន រដ្ឋបាល​រាជធានី ខេត្ត ទីសាធារណៈ និង​គ្រប់​គេហដ្ឋាន​ប្រជាពលរដ្ឋ​។ តាម​លិខិត លោក គង់ សំអុល ប្រធាន​គណៈកម្មាធិការ​ជាតិ​រៀបចំ​បុណ្យជាតិ​អន្តរជាតិ ស្តីពី​ផែនការ​ណែនាំ​ក្នុងការ​រៀបចំ​បុណ្យ​ពិសាខបូជា​ចុះ​ថ្ងៃទី​ ១៣ ខែមេសា ដែល​ភ្នំពេញ​ប៉ុស្តិ៍​ទទួលបាន​នៅ​ថ្ងៃទី​ ២៦ ខែមេសា បានឱ្យដឹងថា គណៈកម្មាធិការ​ជាតិ​រៀបចំ​បុណ្យជាតិ អន្តរជាតិ បាន​ណែនាំ ក្រសួង​ព្រះបរមរាជវាំង​រៀបចំ​ព្រះរាជ​ពិធីបុណ្យ​ពិសាខបូជា នៅក្នុង​ព្រះបរមរាជវាំង តាម​ព្រះរាជ​ប្បវេណី និង​តាម​ការសព្វ​ព្រះរាជ ហឫទ័យ​របស់​ព្រះករុណា​ព្រះបាទ​សម្តេច​ព្រះបរមនាថ នរោត្តម សីហមុនី ព្រះមហាក្សត្រ​នៃ​ព្រះរាជាណាចក្រ​កម្ពុជា​។

លិខិត​ដដែល​បានឱ្យដឹងថា គណៈកម្មាធិការ​ជាតិ​រៀបចំ​បុណ្យជាតិ​អន្តរជាតិ​សហការ​ជាមួយ​ក្រសួង រដ្ឋលេខាធិកាដ្ឋាន ស្ថាប័ន និង​រដ្ឋបាល​រាជធានី ខេត្ត​ពាក់ព័ន្ធ ចាត់តាំង រៀបចំ​ពិធីបុណ្យ​ពិសាខបូជា​ជា​ផ្លូវការ នៅ​បរិវេណ ព្រះមហា​សក្យមុនីចេតិយ ភ្នំ​ព្រះរាជទ្រព្យ ​(​ឧដុង្គ​) ​ស្រុក​ពញាឮ ខេត្តកណ្តាល ក្នុង​រយៈពេល​មួយថ្ងៃ គឺ​នៅ​ថ្ងៃ​ពេញបូណ៌មី ១៥ ​កើត ខែ​ពិសាខ ដោយមាន​កម្មវិធី ហែ​ប្រទក្សិណ ព្រះមហាសក្យមុនីចេតិយ និង​ថ្វាយ​គ្រឿង​សក្ការបូជា នមស្ការ​ព្រះរតនត្រ័យ សមាទានសីល វេរភត្ត ឧទ្ទិសកុសល និង និមន្ត​ព្រះសង្ឃ​បិណ្ឌបាត នៅ​ឧបដ្ឋានសាលា​ខាងក្រោម ដែល​នៅ​ខាងកើត ព្រះមហា​សក្យមុនីចេតិយ​។

គណៈកម្មាធិការ​ជាតិ​រៀបចំ​បុណ្យជាតិ អន្តរជាតិ ក៏បាន​ណែនាំ​ដល់​រដ្ឋបាល​ខេត្តកណ្តាល​ត្រូវ​សហការ​ រៀបចំ​ពិធីបុណ្យ ចាត់ចែង​និមន្ត ព្រះសង្ឃ អញ្ជើញ​មន្ត្រីរាជការ សីលវន្ត សីលវតី ពុទ្ធបរិស័ទ ប្រជាពលរដ្ឋ ព្រមទាំង​សិស្សានុសិស្ស​ចូលរួម ដោយ​ត្រូវអនុវត្ត​វិធានការ​សុខាភិបាល​ឱ្យបាន​ខ្ជាប់​ខ្លួន​ គឺ​ធ្វើការ​វាស់​កម្ដៅ លាងដៃ​សាប៊ូ ឬ​អាល់កុល ជាដើម ព្រមទាំង​ចាត់ចែង​កម្លាំង​ឱ្យ​សម្អាត​ទីតាំង​ប្រារព្ធ​ពិធីបុណ្យ និង​ការពារ​រក្សា សន្តិសុខ​សណ្តាប់ធ្នាប់​សង្គម ចរាចរណ៍​មុន​ក្រោយ និង​ក្នុងពេល​ប្រារព្ធ​ពិធីបុណ្យ​ធានាបាន​សុវត្ថិភាព​ល្អប្រសើរ​។

ក្នុង​លិខិត​សរសេរថា​៖ «​ណែនាំ​ប្រជាពលរដ្ឋ​ដែលមាន​គេហដ្ឋាន តាម​ដងផ្លូវ​ជាតិ​លេខ​ ៥ ផ្លូវ​ចូលទៅ​កាន់​ភ្នំ​ព្រះរាជទ្រព្យ និង តាមផ្លូវ​ជុំវិញ​ភ្នំ​ព្រះរាជទ្រព្យ​ឱ្យធ្វើ​អនាម័យ តុបតែង​លម្អ​ដោយ​ភ្ញីផ្កា បំភ្លឺ​ភ្លើង លើក​ទង់ជាតិ ទង់សាសនា ឱ្យបាន​គ្រប់​គេហដ្ឋាន​។ ដំឡើង​ផ្ទាំង​ប៉ាណូ​ធំៗ ស្តីពី​ព្រះពុទ្ធ​ទ្រង់​ប្រសូត ព្រះពុទ្ធ​ទ្រង់​ត្រាស់ដឹង និង​ព្រះពុទ្ធ​ទ្រង់​បរិនិព្វាន​»​។

ក្រៅពី​ខេត្តកណ្តាល គណៈកម្មាធិការ​រៀបចំ​បុណ្យជាតិ អន្តរជាតិ ក៏បាន​ណែនាំ​ដល់​គ្រប់​ក្រសួង រដ្ឋលេខាធិការដ្ឋាន ស្ថាប័ន និង​រដ្ឋបាល​រាជធានី ខេត្ត​ពាក់ព័ន្ធ​ត្រូវ​ចាត់តាំង​ថ្នាក់ដឹកនាំ មន្ត្រីរាជការ សាស្ត្រាចារ្យ លោកគ្រូ អ្នកគ្រូ និស្សិត សិស្ស ពុទ្ធបរិស័ទ និង ប្រជាពលរដ្ឋ​ចូលរួម​ក្នុង​ពិធីបុណ្យ​ពិសាខបូជា នៅ​ឧបដ្ឋានសាលា ដោយ​ត្រូវអនុវត្ត​វិធានការ​សុខាភិបាល​ផងដែរ​។

គណៈកម្មាធិការ​នេះ​បញ្ជាក់​៖ «​ត្រូវ​តុបតែង​លម្អ​ដោយ​ទង់ជាតិ ទង់​សាសនា ទង់​ព្រះមហាក្សត្រ បដា​ពាក្យ​ស្លោក តាម ក្រសួង រដ្ឋលេខាធិការដ្ឋាន ស្ថាប័ន​រដ្ឋបាល​រាជធានី ខេត្ត តាម​វត្តអារាម អគារ​សាធារណៈ រោងចក្រ សហគ្រាស និង​គ្រប់​គេហដ្ឋាន​ប្រជាពលរដ្ឋ ដើម្បី​អបអរសាទរ ពិធីបុណ្យ​ប្រពៃណី​ព្រះពុទ្ធសាសនា​»​។

លោក លី សំរិទ្ធ អភិបាលរង និង​ជា​អ្នកនាំពាក្យ​រដ្ឋបាលខេត្ត​សៀមរាប​បាន​ថ្លែង​នៅ​ថ្ងៃទី​ ២៦ ខែមេសា ថា ពិធីបុណ្យ​ពិសាខបូជា​បានចាប់ផ្តើម​ធ្វើជា​ធម្មតា​វិញ បន្ទាប់ពី​មានការ​ផ្អាក​មួយរយៈ​ដោយសារតែ​បញ្ហា​ការរីករាលដាល​នៃ​ជំងឺ​កូវីដ​ ១៩​។ ក្នុង​ឆ្នាំ​ថ្មី​នេះ​នឹងមាន​ការលើក​ជា​បដា​ពាក្យស្លោក​ពាក់ព័ន្ធ​ព្រះពុទ្ធសាសនា​ដូច​ការណែនាំ​របស់​គណៈកម្មាធិការ​​រៀបចំ​បុណ្យជាតិ អន្តរជាតិ​។

លោក​ប្រាប់ថា ការធ្វើ​បុណ្យពិសាខបូជា​នេះ គឺ​ដើម្បី​រំឭក​ដល់​គុណ​ព្រះសម្មាសម្ពុទ្ធ ដែល​បានរួម​ចំណែក​ជួយ​សង្គមជាតិ​ដោយ​មាគ៌ា​សន្តិភាព​។

អ្នកនាំពាក្យ​រដ្ឋបាលខេត្ត​សៀមរាប​រូបនេះ​ថ្លែងថា​៖ «​ជា​រៀងរាល់ឆ្នាំ​យើង​ច្រើន​ធ្វើ​នៅ​វត្ត​រាជបូព៌ ប៉ុន្តែ​ឆ្នាំនេះ​មិនទាន់​ច្បាស់​ថា​ធ្វើ​នៅ​ទីនោះ​ដដែល​ ឬ​វត្ត​ណា​ផ្សេងទៀត​នោះទេ​។ ប្រហែលជា​អាច​ទៅ​វត្ត​ព្រះឥន្ទកោសា ហៅ​វត្តលើ​នៅ​ជិត​ស្ពាន​នាគ​»​។

លោក ផុស សុវណ្ណ អគ្គនាយក​នៃ​អគ្គនាយកដ្ឋាន​ព័ត៌មាន និង​សោតទស្សន៍ និង​ជា​អ្នកនាំពាក្យ​ក្រសួង​ព័ត៌មាន​ថ្លែង​នៅ​ថ្ងៃទី​ ២៦ ខែមេសា​ថា ក្រសួង​ព័ត៌មាន​តែងតែ​មានការ​ណែនាំ​ទៅតាម​ប្រព័ន្ធ​ផ្សព្វផ្សាយ​ទាំងអស់​ឱ្យ​ចូលរួម​ធ្វើការ​ផ្សព្វផ្សាយ មិនថាតែ​នៅក្នុង​បុណ្យពិសាខបូជា​នេះ​ទេ សូម្បី​នៅក្នុង​ពិធីបុណ្យ​ជាតិ មាឃបូជា ចម្រើន​ព្រះជន្ម​ក៏​ក្រសួង​តែង​ធ្វើ​ការណែនាំ​ផងដែរ​។ ដោយឡែក ទូរទស្សន៍ និង​វិទ្យុជាតិ​តែងតែ​ធ្វើការ​ផ្សព្វផ្សាយ​ឱ្យបាន​ទូលំទូលាយ​អំពី​រូបភាព និង​ខ្លឹមសារ​នៃ​ពិធីបុណ្យ​ពិសាខបូជា​។

លោក​បាន​ថ្លែងថា​៖ «​ទទក ហើយ​ និង​វិទ្យុជាតិ​គាត់​ធ្វើ​សកម្មភាព​ច្រើន គាត់​តែង​ធ្វើ​ប្រធានបទ​អាច​ថា អញ្ជើញ​វាគ្មិន​មកពី​ខាង​ក្រសួង​ធម្មការ ឬ​អញ្ជើញ​តំណាង ឬ​ព្រះសង្ឃ​អ៊ីចឹងទៅ​ដើម្បី​ធ្វើ​បទសម្ភាស​ទាក់ទង​បុណ្យ​ពិសាខបូជា អ៊ីចឹង​ទៅ​»​។

លោក សរ លាង ប្រធាន​មន្ទីរ​ធម្មការ និង​សាសនា​ខេត្តកំពង់ឆ្នាំង​ថ្លែង​នៅ​ថ្ងៃទី​ ២៦ ខែមេសា​ថា ពាក់ព័ន្ធ​នឹង ការរៀបចំ​បុណ្យពិសាខបូជា​ឆ្នាំនេះ ក្រសួង​ធម្មការ​នៅ​មិនទាន់មាន​ការណែនាំ​យ៉ាងណា​នៅឡើយ ប៉ុន្តែ​រដ្ឋបាលខេត្ត​កំពង់ឆ្នាំង​បាន​ផ្ញើលិខិត​មួយ​មក​រូបលោក​ដើម្បី​ចូលរួម​ជា​តំណាង​ខេត្តកំពង់ឆ្នាំង​ក្នុង​កិច្ចប្រជុំ​មួយ​ពាក់ព័ន្ធ​នឹង​ពិសាខបូជា​នៅ​គណៈកម្មាធិការ​បុណ្យជាតិ អន្តរជាតិ នា​ថ្ងៃទី​ ២៧ ខែមេសា នេះ​។ បុណ្យ​ពិសាខបូជា​ឆ្នាំនេះ​អាច​នឹងធ្វើ​ស្រដៀង​នឹង​ឆ្នាំមុនៗ ដោយ​កំណត់​យក​វត្ត​ណាមួយ​សម្រាប់​ប្រារព្ធ​ពិធី​ហើយ​អញ្ជើញ​អភិបាលខេត្ត​ចូលរួម​។

លោក​ថា​៖ «​ឆ្នាំនេះ​នឹងធ្វើ​ប្រហាក់ប្រហែល​គ្នា​ហ្នឹង​ទៀត ប៉ុន្តែ​ចាំមើល​បាន​លិខិត​ណែនាំ​មក​សិន ហើយ​យើង​ចាំមើល​គណៈភិបាល​ខេត្ត និង​មេគណ លោក​មាន​យោបល់​យ៉ាងម៉េច យើង​ប្រជុំពិភាក្សា​ថា គួរ​ធ្វើ​យ៉ាងណា​សិន ទើប​យើង​សម្រេច​គោរព​អញ្ជើញ​អភិបាលខេត្ត​ចូលរួម​»៕