តាកែវៈ អធិការនគរបាលស្រុកបាទីបានដាក់គោលការណ៍ដល់គ្រប់កម្លាំងនគរបាលប៉ុស្តិ៍ទាំងអស់ឱ្យពង្រឹងបន្ថែម និងទប់ស្កាត់មិនឱ្យមានការបើកលេងល្បែងស៊ីសងគ្រប់ប្រភេទ ឬល្បែងមាន់ជល់តាមអនឡាញឡើយ ដែលការណែនាំនេះធ្វើឡើងក្នុងគោលបំណង ដើម្បីពង្រឹងសន្តិសុខសុវត្ថិភាព ស្តីពីគោលនយោបាយភូមិ-ឃុំ មានសុវត្ថិភាព។
លោក ឆាយ កែវមុន្នី អធិការនគរបាលស្រុកបាទីបានឱ្យដឹងនៅថ្ងៃទី ២៦ មេសា ថា ដើម្បីរក្សាសន្តិសុខសុវត្ថិភាពនៅតាមមូលដ្ឋានជូនប្រជាពលរដ្ឋឱ្យមានភាពកាន់តែប្រសើរបន្ថែមទៀតនោះលោកបានធ្វើការណែនាំដល់គ្រប់កម្លាំងនគរបាលប៉ុស្តិ៍ ក្នុងស្រុកបាទី ចុះធ្វើការអប់រំដល់ពលរដ្ឋ ដែលប្រសិនបើមូលដ្ឋានណា បើកលេងល្បែងភ្នាល់ជល់មាន់ ទោះជាតាមអនឡាញក្តី គឺត្រូវតែបញ្ឈប់ និងធ្វើកិច្ចសន្យា។
លោកថ្លែងថា៖ «ដោយអនុវត្តតាមការណែនាំរបស់លោកឧត្តមសេនីយ៍ទោស្នងការខេត្ត និងដើម្បីពង្រឹងបន្ថែមនូវគោលនយោបាយភូមិ-ឃុំមានសុវត្ថិភាព គឺការងារនេះ យើងកំពុងអនុវត្តយ៉ាងមានប្រសិទ្ធភាព»។
លោក ស្រ៊ុន ស្រង់ នាយនគរបាល-ប៉ុស្តិ៍ឃុំសូរភី ក្នុងស្រុកបាទី ប្រាប់ ភ្នំពេញ ប៉ុស្តិ៍ នៅថ្ងៃទី ២៦ មេសាថា ករណីនេះ សមត្ថកិច្ចប៉ុស្តិ៍របស់លោកតែងតែអនុវត្តជាប្រចាំពីព្រោះជាគោលនយោបាយភូមិ-ឃុំមានសុវត្ថិភាពរបស់រាជរដ្ឋាភិបាល។
លោកបញ្ជាក់ថា៖ «តាំងពីយើងអនុវត្តពង្រឹងគោលការណ៍នេះមកឃើញថា អត់មានពលរដ្ឋណាហ៊ានលេងល្បែងភ្នាល់ណាមួយទេ។ បើគាត់លេងយើងនឹងឱ្យគាត់ធ្វើកិច្ចសន្យា ឈប់លេងល្បែងតទៅទៀតតែបើគាត់មិនព្រមអនុវត្តតាមទេយើងនឹងចាប់តែម្តង»។
លោកបានបន្តថា ការងារនេះគឺកម្លាំងសមត្ថកិច្ចរបស់លោកបានអនុវត្តជាយូរមកហើយ ហើយជាគោលការណ៍ច្បាប់របស់រាជរដ្ឋាភិបាលគឺហាមមិនឱ្យបើកលេងល្បែងទេ មិនមានច្បាប់ពីណាមកឱ្យបើកលេងល្បែងស៊ីសងឡើយ។
លោកថា៖ «ល្បែងស៊ីសងបង្កើតឱ្យមានបទល្មើស តែជារហូតមក បទល្មើសនៅក្នុងភូមិដ្ឋានមានភាពស្ងប់ស្ងាត់ធម្មតា។ បទល្មើសដូចជាអំពើហិង្សា នៅក្នុងគ្រួសារអីគឺថយចុះច្រើនហើយ នេះក៏ព្រោះតែយើងអនុវត្តតាមបទបញ្ជាពីថ្នាក់លើលុបបំបាត់ល្បែងស៊ីសង»។
លោក ភួង ឡេង ស្មៀនឃុំសូរភី ឱ្យដឹងនៅថ្ងៃទី ២៦ មេសាថា ពាក់ព័ន្ធល្បែងស៊ីសងនេះ នៅក្នុងឃុំសូរភី ក្នុងស្រុកបាទី ហាក់ដូចជាគ្មានទេ ដោយសារតែអាជ្ញាធរឃុំសហការជាមួយកម្លាំងនគរបាលប៉ុស្តិ៍តែងធ្វើការអប់រំផ្សព្វផ្សាយជាប្រចាំដល់ពលរដ្ឋក្នុងមូលដ្ឋានអំពីបទល្មើសផ្សេងៗដែលកើតឡើងពីការលេងល្បែងនេះ។ ការលេងល្បែងស៊ីសងក៏នាំឱ្យកើតមានអំពើហិង្សាក្នុងគ្រួសារ និងក៏បង្កឱ្យកើតមានបទល្មើសផងដែរ។
លោកនិយាយថា៖ «នៅក្នុងមូលដ្ឋានខ្ញុំនេះ មិនមានការព្រួយបារម្មណ៍អីធ្វើឱ្យអាជ្ញាធរជួបការលំបាកទេបញ្ហាដែលបង្កឡើង ដោយការលេងល្បែងស៊ីសងនេះ។ មូលដ្ឋានខ្ញុំ មិនមានអ្នកលេងល្បែងទេ តែបើមានសមត្ថកិច្ចនឹងហៅមកណែនាំឈប់ឱ្យលេងទៀត»៕