បាត់ដំបងៈ នគរបាលប្រឆាំងគ្រឿងញៀនខេត្តបាត់ដំបងបានបញ្ជូនបុរស ២ នាក់ ទៅសាលាដំបូងខេត្តនៅថ្ងៃទី ២៦ មេសា ខណៈមនុស្សប្រុសស្រី ១៩ នាក់ទៀតត្រូវបានដោះលែង បន្ទាប់ពីបង្ក្រាបក្នុងក្លិបខារ៉ាអូខេ ដែលមានយីហោ សាច់អាំង រតនៈ កាលពីវេលារំលងអធ្រាត្រឈានចូលថ្ងៃទី ២៥ មេសា នៅភូមិរំចេក ៤ សង្កាត់រតនៈ ក្រុង- ខេត្តបាត់ដំបង។
លោកឧត្តមសេនីយ៍ត្រី កុយ ហៀង ស្នងការរងទទួលផែននគរបាលប្រឆាំងគ្រឿងញៀននៃស្នងការដ្ឋាននគរបាល ខេត្តបាត់ដំបងឱ្យដឹងនៅថ្ងៃទី ២៦ មេសា ថា បុរសសង្ស័យឈ្មោះ ធុន សុភ័ក្ត្រ អាយុ ៤២ ឆ្នាំជាមេការ និងម្នាក់ទៀត ឈ្មោះ ជា សុខមុន្នី អាយុ ៣៤ ឆ្នាំ ជាថៅកែបានជួលទីតាំងធ្វើអាជីវកម្ម ខារ៉ាអូខេ ត្រូវបានសមត្ថកិច្ច កសាងសំណុំរឿងបញ្ជូនទៅសាលាដំបូងខេត្តនៅថ្ងៃទី ២៦ មេសា។ លោកបន្តថា៖ «ករណីនេះអ្នកជាប់ពាក់ព័ន្ធនឹងបទល្មើសគ្រឿងញៀនមានតែ ២ នាក់ត្រូវយើងបញ្ជូនទៅតុលាការ។ ចំណែកអ្នកមិនជាប់ពាក់ព័ន្ធ គឺយើងអនុញ្ញាតឱ្យពួកគាត់ទៅលំនៅឋានវិញ។ អ្នកខ្លះជាចុងភៅ អ្នករត់តុអីហ្នឹង គាត់មិនពាក់ព័ន្ធយើងត្រូវតែឱ្យគាត់ទៅវិញ»។
លោកឱ្យដឹងថា ប្រតិបត្តិការបង្ក្រាបក្លិបខារ៉ាអូខេនេះបានធ្វើឡើងកាលពីរំលងអធ្រាត្រឈានចូលថ្ងៃទី ២៥ មេសា នៅចំណុច ភូមិរំចេក៤ សង្កាត់ រតនៈ។ ក្នុងការចុះបង្ក្រាបនោះកម្លាំងសមត្ថកិច្ចប្រមូលបានមនុស្សប្រុសស្រីចំនួន ២១ នាក់ ប៉ុន្តែបន្ទាប់ពីសាកសួរមកសមត្ថកិច្ចរកឃើញអ្នកជាប់ពាក់ព័ន្ធតែ ២ នាក់ប៉ុណ្ណោះ។ រីឯមនុស្ស ១៩ នាក់ផ្សេងទៀត ត្រូវបានអនុញ្ញាតឱ្យទៅផ្ទះវិញដោយសារពួកគេមិនជាប់ពាក់ព័ន្ធនឹងបទល្មើសគ្រឿងញៀន។
លោកស្នងការរង បន្តថាចំពោះវត្ថុតាងដែលកម្លាំងសមត្ថកិច្ចដកហូតបានពីទីតាំងកើតហេតុរួមមាន ថ្នាំញៀនប្រភេទកេតាមីន (KETAMINE) ចំនួន ៣ ថង់ទម្ងន់ ២,៧៧ ក្រាម និងថ្នាំញៀនប្រភេទ អិចស្តាស៊ី (MD MA) ចំនួន ៣ គ្រាប់ ទម្ងន់ ១,១១ ក្រាម ព្រមទាំងរថយន្ត ១ គ្រឿង ម៉ាកតូយ៉ូតា កាមរីឆ្លាម ពណ៌ឆ្លូញ។ លោកស្នងការរងមិនបានប្រាប់ពីដំណើរដើមទង ដែលនាំឱ្យមានការបង្ក្រាបក្លិបនេះឡើយ។ តែបើតាមមន្ត្រីនគរបាលក្រុងបាត់ដំបង ១ រូប ដែលបានសហការក្នុងប្រតិបត្តិការបង្ក្រាបក្លិបខារ៉ាអូខេនោះបានប្រាប់ដោយស្នើមិនឱ្យបញ្ចេញឈ្មោះថា មុននឹងឈានដល់ការបង្ក្រាបនេះ គឺនគរបាលជំនាញបានធ្វើការស៊ើបអង្កេតអស់រយៈពេលជាច្រើនថ្ងៃ បន្ទាប់ពីដឹងថា ក្លិបខារ៉ាអូខេមួយនេះមានការជួញដូរ និងប្រើប្រាស់គ្រឿងញៀន។ សមត្ថកិច្ចជំនាញបានដាក់កម្លាំងការិយាល័យប្រឆាំងគ្រឿងញៀនខេត្ត សហការជាមួយនគរបាលជំនាញក្រុងបាត់ដំបងចុះបង្ក្រាបតែម្តង។ «បើក្លិបខារ៉ាអូខេកម្សាន្តលេងធម្មតាគឺសមត្ថកិច្ចមិនទៅបង្ក្រាបទេតែនេះមានលួចជួញដូរ ជួញដូរគ្រឿងញៀនទៀត»។
ពាក់ព័ន្ធនឹងការចោទប្រកាន់ពីតំណាងអយ្យការ យ៉ាងណានោះ ភ្នំពេញប៉ុស្តិ៍នៅថ្ងៃទី ២៦ មេសា បានទាក់ទងទៅលោក ដួង សាវ៉ន អ្នកនាំពាក្យ អយ្យការអមសាលាដំបូងខេត្តបាត់ដំបងតែទូរស័ព្ទលោកពុំមានអ្នកទទួល៕