សៀមរាបៈ មនុស្ស ៤ នាក់ត្រូវបានតុលាការចោទប្រកាន់ និងឃុំខ្លួនក្នុងពន្ធនាគារ និង ១១ នាក់ទៀតត្រូវបានតុលាការចេញដីកាកោះហៅឱ្យចូលបំភ្លឺ ពាក់ព័ន្ធបទល្មើសនេសាទក្នុងតំបន់អភិរក្សនៃបឹងទន្លេសាបក្នុងខេត្តសៀមរាប។ នេះបើតាមលោក ទា គឹមសុទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តសៀមរាប។
លោកបានថ្លែងនៅថ្ងៃទី ២៦ មេសាថា គិតចាប់ពីដើមខែមករា ឆ្នាំ ២០២២ ខណ្ឌរដ្ឋបាលជលផលខេត្តសៀមរាប ដោយមានការចូលរួមពីកម្លាំងអន្តរាគមន៍ចម្រុះថ្នាក់ជាតិបានចុះបង្ក្រាបបទល្មើសជលផលបានចំនួន ៥៣ លើក ឃាត់ខ្លួនជនសង្ស័យ ៤ នាក់ បញ្ជូនទៅតុលាការ និង ១១ នាក់ទៀត ត្រូវបានតុលាការចេញដីកាបង្គាប់ឱ្យចូលខ្លួនបំភ្លឺជុំវិញករណីប្រព្រឹត្តបទល្មើសនេសាទក្នុងដែនអភិរក្សជលផល បន្ទាប់ពីទទួលបានសំណុំរឿងពីក្រុមការងារស្រាវជ្រាវ និង បង្ក្រាបបទល្មើសជលផល ។
លោកបញ្ជាក់ថា ក្នុងពេលជិត ៤ ខែសមត្ថកិច្ចជលផលសៀមរាបបានចុះបង្ក្រាបបទល្មើសជលផលបានចំនួន ៥៣ ករណី ចាប់ឃាត់ខ្លួនជនប្រព្រឹត្តបទល្មើសនេសាទ ដោយប្រើឧបករណ៍ឆក់ចំនួន ៤ នាក់ បញ្ជូនទៅតុលាការ ហើយពួកគេក៏ត្រូវបានតុលាការសម្រេចឃុំខ្លួនដាក់ពន្ធនាគារ។
លោកបន្តថា៖ «ពួកគេត្រូវបានចោទប្រកាន់តាមមាត្រា ៩៨ នៃច្បាប់ជលផល។ ទន្ទឹមនឹងនេះ ក្រុមការងារយើងក៏បានធ្វើការស្រាវជ្រាវកំណត់មុខសញ្ញាជនប្រព្រឹត្តល្មើស ១១ នាក់ កសាងសំណុំរឿងបញ្ជូនទៅតុលាការ ហើយតុលាការបានចេញដីកាកោះហៅពួកគេឱ្យចូលខ្លួនទៅឆ្លើយបំភ្លឺផងដែរ»។ ក្រៅពីបង្ក្រាបចាប់ជនប្រព្រឹត្តបទល្មើស ក្រុមសមត្ថកិច្ចបានរុះរើ រឹបអូស និងបំផ្លាញចោល វត្ថុតាងរួមមាន អួនអូសក្រឡាល្អិត លូស្បៃមុង របាំងសាច់អួន និងរបាំងស្បៃមុងជាច្រើនពាន់ម៉ែត្រ និងបង្គោលសម្រាស់ជាច្រើនពាន់ដើម ព្រមទាំងដោះលែងត្រីចម្រុះប្រភេទសរុបជាង ១០០ គីឡូក្រាម៕