ភ្នំពេញៈ បើទោះបីជាកាតព្វកិច្ចពាក់ម៉ាស់ត្រូវបានលោកនាយករដ្ឋមន្ត្រីប្រកាសសម្រេចធ្វើការលើកលែងក៏ដោយ ប៉ុន្តែប្រជាពលរដ្ឋភាគច្រើននៅតែបន្តអនុវត្តនូវការពាក់ម៉ាស់ដដែល ដោយក្នុងរយៈពេល ២ ថ្ងៃចាប់ពីការដកបម្រាមនេះចេញអត្រាពលរដ្ឋដែលនៅពាក់ម៉ាស់ គឺមានប្រមាណជា ៦០% ដែលជាចំនួនមួយខ្ពស់គួរឱ្យចាប់អារម្មណ៍ ខណៈកម្ពុជានៅមិនទាន់ឈ្នះសង្គ្រាមកូវីដទាំងមូលនៅឡើយ។
នេះជាការថ្លែងរបស់លោក ហ៊ុន សែន នារសៀលថ្ងៃទី ២៧ ខែមេសា ក្នុងពិធីបិទសន្និបាតបូកសរុបការងារឆ្នាំសិក្សា ២០២០-២០២១ និងលើកទិសដៅការងារឆ្នាំសិក្សា ២០២១-២០២២ របស់ក្រសួងអប់រំ យុវជន និងកីឡា។ លោកមានប្រសាសន៍ថា៖ «ខ្ញុំសង្កេតឃើញថា ចាប់តាំងពីថ្ងៃម្សិលមិញ និងថ្ងៃនេះ មានបងប្អូនប្រជាពលរដ្ឋរបស់យើងមិនតិចជាង ៦០ ភាគរយទេ ដែលនៅបន្តពាក់ម៉ាស់ធ្វើដំណើរនៅតាមដងផ្លូវ។ នេះហើយជាចំណុចល្អ ហើយក៏មិនមែនមានន័យថា ទាល់តែដោះម៉ាស់គឺជាការគោរពដល់នាយករដ្ឋមន្ត្រី ឬរាជរដ្ឋាភិបាលនោះទេ»។
លោក បន្តថា ប្រជាពលរដ្ឋកម្ពុជាមានការយល់ដឹងពីវិធីការពារខ្លួន ដែលចំណុចនេះហើយទើបធ្វើឱ្យប្រទេសកម្ពុជាយកឈ្នះបានលើសមរភូមិកូវីដ ១៩។ លោកបានបញ្ជាក់ថា ៖ «យើងមិនទាន់ឈ្នះសង្គ្រាមកូវីដ ១៩ ទាំងមូលទេ គឺយើងគ្រាន់តែយកឈ្នះសមរភូមិតូចៗប៉ុណ្ណោះគឺសមរភូមិអាល់-ហ្វា ដែលតា និងអូមីក្រុង។ ដូចនេះវិធានការដែលយើងត្រូវគ្រប់គ្រងកូវីដបន្ត គឺជារឿងចាំបាច់ខ្លាំងណាស់ ហើយយើងមិនទាន់មានលទ្ធភាពបញ្ចប់សង្គ្រាមកូវីដនៅឡើយទេ»។
ទាក់ទងនឹងវិធានការការពារ ៣ កុំ ៣ ការពារ លោក ហ៊ុន សែន នៅតែចាត់ទុកថា ជាវិធានការចាំបាច់ដដែល ទោះបីជាលោកបានដកនូវកាតព្វកិច្ចការពាក់ម៉ាស់ តែលោកនៅបន្តលើកទឹកចិត្តឱ្យប្រជាពលរដ្ឋពាក់ម៉ាស់ការពារ។ កាតព្វកិច្ចពាក់ម៉ាស់អាចនឹងវិលមកវិញ ប្រសិនបើមានការវិវត្តណាមួយកើតឡើង ដោយសារនៅលើពិភពលោកនៅមានកូវីដនៅឡើយ។ ជាមួយគ្នានេះ លោក ហ៊ុន សែន ក៏បានស្នើឱ្យមានការតាមដាននៅគ្រប់ទីកន្លែងទាំងអស់ បន្ទាប់ពីកាតព្វកិច្ចពាក់ម៉ាស់ត្រូវបានលើកលែង។
ដោយឡែក នាឱកាសនោះដែរ លោកនាយករដ្ឋមន្ត្រីក៏បានបញ្ជាក់ផងដែរ ពីការចាក់វ៉ាក់សាំងកូវីដ ១៩ ដែលកម្ពុជាទទួលបានជោគជ័យខ្ពស់ ដោយប្រជាពលរដ្ឋមានការជឿជាក់លើរាជរដ្ឋាភិបាល បើទោះបីជាមានការឃោសនារបស់ «ជនពាល» ដែលថា វ៉ាក់សាំងកូវីដ-១៩ចាក់សម្លាប់មនុស្ស។
លោកបញ្ជាក់ថា៖ «មកដល់ពេលនេះប្រជាពលរដ្ឋប្រមាណជា ១៤,៩ លាននាក់ បានចាក់វ៉ាក់សាំងកូវីដ ១៩ ដែលពលរដ្ឋមានការជឿជាក់ លើរាជរដ្ឋាភិបាល ហើយយើងមិនរើសអើងឡើយដោយចាក់ជូនគ្រប់មនុស្សទាំងអស់នៅក្នុងប្រទេសកម្ពុជា»។
ជាមួយគ្នានោះ លោក ហ៊ុន សែន ក៏បានបញ្ជាក់ផងដែរ ដោយត្រូវធ្វើយ៉ាងណាធានាឱ្យបានថា ការបើកសាលារៀនឡើងវិញ គឺត្រូវតែរក្សាសុវត្ថិភាព សម្រាប់លោកគ្រូ អ្នកគ្រូ និងសិស្សានុសិស្ស។
លោកក៏បានអំពាវនាវទៅដល់ប្រជាពលរដ្ឋឱ្យបន្តទទួលយកការចាក់វ៉ាក់សាំងដូសជំរុញ ជាពិសេសដូសទី ៣ ដែលនៅសល់ជាង ៦ លាននាក់ទៀត ហើយដូសទី ៤ ក៏ត្រូវតែបន្តចាក់ដដែល។ លោកបន្តថា៖ «ប្រទេសអូស្ត្រាលីក៏បានត្រៀមផ្តល់វ៉ាក់សាំង Pfizer សម្រាប់កូនក្មេង ដែលនឹងបញ្ជូនតាមកាលបរិច្ឆេទ ដែលយើងចង់បាន ហើយខ្ញុំក៏បានឯកភាពរួចហើយដែរ។ យើងមិនលោភលន់ទេ តែបើសិនជាគេឱ្យយើងនៅតែទទួល ហើយបើឱ្យតែ ១០០ ដូស ក៏ខ្ញុំចេញទទួលដែរជាមួយទ្វេភាគី»។
សម្រាប់វ៉ាក់សាំងកូវីដ ១៩ ដដែលនេះដែរ លោកនាយករដ្ឋមន្ត្រី បានស្នើឱ្យខាងក្រសួងសុខាភិបាលធ្វើផែនការរុញកាលបរិច្ឆេទនៃការទទួលយកពីសាធារណរដ្ឋប្រជាមានិតចិន ដែលនឹងត្រូវផ្តល់វ៉ាក់សាំងចំនួន ១៥ លានដូសទៀត ដោយលោកឱ្យទទួលយកនៅចុងឆ្នាំ ២០២២ នេះវិញ ដោយសារវ៉ាក់សាំងនៅក្នុងឃ្លាំងសល់ជាង ១០ លានដូសទៀត។
ចំណែកសហរដ្ឋអាមេរិកក៏នឹងផ្តល់វ៉ាក់សាំងកូវីដ ១៩ ជាង ៧ លានដូសមកឱ្យកម្ពុជាផងដែរ៕
វីដេអូ៖