ភ្នំពេញៈ ការិយាល័យនយោបាយបក្សកុម្មុយនីស្ដវៀតណាមបានប្រកាសប្ដេជ្ញាចិត្តពង្រឹងចំណងមិត្តភាព និងកិច្ចសហប្រតិបត្តិការរវាងរដ្ឋធានីហាណូយ និងរាជធានីភ្នំពេញ និងអនុវត្តរាល់កិច្ចព្រមព្រៀងទាំងឡាយកន្លងមករបស់ថ្នាក់ដឹកនាំនៃប្រទេសទាំង ២ ឱ្យទទួលជោគជ័យ។
នាថ្ងៃទី ២៧ ខែមេសា លោកនាយករដ្ឋមន្ត្រី ហ៊ុន សែន បានជួបពិភាក្សាការងារជាមួយលោក ឌិញ ទៀនហ្ស៊ុង (Dinh Tien Dung) សមាជិកការិយាល័យនយោបាយបក្សកុម្មុយនីស្ដវៀតណាម និងជាលេខាបក្សរដ្ឋធានីហាណូយ ដែលបានដឹកនាំគណៈប្រតិភូមកបំពេញទស្សនកិច្ចនៅកម្ពុជា។
ហ្វេសប៊ុកលោក ហ៊ុន សែន បានបញ្ជាក់ក្រោយជំនួបនេះថា៖ «[លោក ឌិញ ទៀនហ្ស៊ុង] ប្ដេជ្ញាចិត្តពង្រឹង ពង្រីកកិច្ចសហប្រតិបត្តិការរវាងរដ្ឋធានីហាណូយ និងរាជធានីភ្នំពេញដូចជាការពង្រីកពង្រឹងមិត្តភាព និងការអនុវត្តឱ្យទទួលបាននូវភាពជោគជ័យនូវរាល់សេចក្តីថ្លែងការណ៍ ក៏ដូចជាកិច្ចព្រមព្រៀងទាំងឡាយ របស់ថ្នាក់ដឹកនាំនៃប្រទេសទាំង ២ ដែលបានព្រមព្រៀងគ្នាកន្លងមក»។
លោក យ៉ង់ គិមអេង ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាពប្រាប់ភ្នំពេញប៉ុស្តិ៍នាថ្ងៃទី ២៧ ខែមេសាថា វាគឺជារឿងធម្មតា សម្រាប់ប្រទេសណាក៏ដូចប្រទេសណាដែរគឺតែងតែមានកិច្ចសហប្រតិបត្តិរវាងប្រទេសជិតខាង ដើម្បីផលប្រយោជន៍ទៅវិញទៅមក។ ប៉ុន្តែក្នុងនោះដែរមិនអាចឱ្យមានការដាក់សម្ពាធ ឬការបង្ខិតបង្ខំពីភាគីណាមួយ ដើម្បីធ្វើសកម្មភាពដែលប្រាសចាកពីផលប្រយោជន៍ប្រជាជននៃប្រទេសនីមួយៗនោះទេ។
លោកថ្លែងថា៖ «យើងចង់ឃើញដែរថា រាល់កិច្ចព្រមព្រៀងរាល់សេចក្តីថ្លែងការណ៍នានាដែលធ្វើឡើង គឺដោយមានការគិតពីផលប្រយោជន៍របស់ប្រទេសទាំង ២ [កម្ពុជា-វៀតណាម]។ មិនមែនបានន័យថា ប្រទេសវៀតណាម នឹងកេងយកតែចំណេញពីកម្ពុជានោះទេ ត្រូវតែផ្តល់ផលប្រយោជន៍ទៅវិញទៅមក សម្រាប់កម្ពុជាដែរ មិនអាចគ្រាន់តែទាមទារឱ្យកម្ពុជាបំពេញនូវសេចក្តីត្រូវការ ឬក៏ដំណោះស្រាយរបស់ខ្លួន [នោះទេ]»។
ជាមួយគ្នានេះផងដែរ លោក ហ៊ុន សែន បានស្នើការិយាល័យនយោបាយបក្សកុម្មុយនីស្តវៀតណាមរួមគ្នាជាមួយកម្ពុជាកែប្រែអតីតតំបន់ប្រយុទ្ធគ្នាឱ្យទៅជាតំបន់អភិវឌ្ឍន៍ និងតំបន់សេដ្ឋកិច្ចពិសេស និងពិនិត្យមើលអ្វីដែលប្រទេសទាំង ២ អាចធ្វើការរួមគ្នាបន្តទៀតបាននៅពេលខាងមុខ។
ហ្វេសប៊ុកដដែលបញ្ជាក់ថា លោក ហ៊ុន សែន រីករាយចំពោះការរីកចម្រើននៃទំនាក់ទំនងរវាងប្រទេសទាំង ២ ដោយលោកបានអះអាងថា ទំហំពាណិជ្ជកម្មរវាងប្រទេសទាំង ២ មានការកើនឡើងលើសផែនការ ៥ ពាន់លានដុល្លារ។ លោកថ្លែងថា៖ «តែទោះជាយ៉ាងនេះក្តី យើងត្រូវតែធ្វើការយកចិត្តទុកដាក់បន្ថែមទៀត ក្នុងការជំរុញកិច្ចសហប្រតិបត្តិការលើវិស័យសេដ្ឋកិច្ច ពាណិជ្ជកម្ម ការកែប្រែតំបន់ដែលធ្លាប់ជាតំបន់ប្រយុទ្ធគ្នាឱ្យទៅជាតំបន់អភិវឌ្ឍន៍តំបន់សេដ្ឋកិច្ចពិសេស និងពាណិជ្ជកម្មបន្ថែមទៀតរួមជាមួយនឹងការពិនិត្យមើលអ្វី ដែលរដ្ឋធានីហាណូយ និងរាជធានីភ្នំពេញអាចធ្វើការរួមគ្នាបន្តទៀតបាននៅពេលខាងមុខ»។
លោក ឌិញ ទៀនហ្ស៊ុង បានកោតសរសើរចំពោះការចាត់វិធានការទប់ស្កាត់ជំងឺកូវី ១៩ របស់ប្រទេសកម្ពុជាទទួលបាននូវភាពជោគជ័យ និងបានប្រាប់លោក ហ៊ុន សែន អំពីស្ថានភាពជំងឺកូវីដ ១៩ ក៏ដូចជាការទប់ស្កាត់ជំងឺនេះ នៅរដ្ឋធានីហាណូយ ប្រទេសវៀតណាម ស្ថានភាពសេដ្ឋកិច្ច និងទិសដៅអភិវឌ្ឍន៍របស់រដ្ឋធានីហាណូយ។ នៅក្នុងជំនួបថ្ងៃទី ២៧ ខែមេសា នេះដែរ លោក ឌិញ ទៀន ហ្ស៊ុង បានស្នើលោក ហេង សំរិនប្រធានរដ្ឋសភាកម្ពុជាជំរុញការលើកកម្ពស់កិច្ចសហប្រតិបត្តិការរវាងរដ្ឋសភានៃប្រទេសទាំង ២ បន្តទៀត ដើម្បីផ្លាស់ប្តូរបទពិសោធនានា ដូចជាការកសាងច្បាប់ កិច្ចសហប្រតិបត្តិការទ្វេភាគី និងពហុភាគីនៅលើឆាកអន្តរជាតិ។
សេចក្តីប្រកាសព័ត៌មានរដ្ឋសភាកម្ពុជា បញ្ជាក់នាថ្ងៃទី ២៧ ខែមេសាថា លោក ឌិញ ទៀន ហ្ស៊ុង ក៏បានលើកឡើងអំពីលទ្ធផលនៃកិច្ចសហប្រតិបត្តិការរវាងរាជធានីភ្នំពេញ និងទីក្រុងហាណូយនាពេលកន្លងមក និងគម្រោងទៅថ្ងៃអនាគត ក្នុងការលើកកម្ពស់ផលប្រយោជន៍សម្រាប់ប្រទេស និងប្រជាជនទាំងសងខាង។
សេចក្តីប្រកាសព័ត៌មាន បានដកស្រង់សម្ដីលោក ហេង សំរិន ថា៖ «កិច្ចសហប្រតិបត្តិការនៅគ្រប់លំដាប់ថ្នាក់នៃប្រទេសទាំង ២ បង្ហាញនូវមនោសញ្ចេតនាដ៏ជ្រាលជ្រៅក្នុងនាមជាបងប្អូន និងជាអ្នកជិតខាងល្អ មិត្តភាពជាប្រពៃណី កិច្ចសហប្រតិបត្តិការគ្រប់ជ្រុងជ្រោយ និងយូរអង្វែង ដែលមានប្រវត្តិតស៊ូ រួមសុខ រួមទុក្ខជាមួយគ្នាគ្រប់កាលៈទេសៈ»។
លោកបន្តថា៖ «ទំនាក់ទំនង និងកិច្ចសហប្រតិបត្តិការទ្វេភាគីរវាងប្រទេសទាំង ២ បានប្រព្រឹត្តទៅយ៉ាងល្អ ជិតស្និទ្ធ និងស៊ីជម្រៅ ទាំងក្នុងក្របខ័ណ្ឌបក្ស រដ្ឋ និងប្រជាជន ដោយផ្អែកលើស្មារតីភាតរភាព ស្និទ្ធស្នាលជឿទុកចិត្តគ្នា ដោយបានផ្តល់ផលប្រយោជន៍គ្នាទៅវិញទៅមក»។
សេចក្តីប្រកាសព័ត៌មានបញ្ជាក់ថា លោក ហេង សំរិន បានកោតសរសើរចំពោះទំនាក់ទំនង និងកិច្ចសហប្រតិបត្តិការរវាងប្រទេសទាំង ២ និងរវាងរាជធានីភ្នំពេញ និងរដ្ឋធានីហាណូយ ដែលបានសហការគ្នានាពេលកន្លងមក។ លោកបានគាំទ្រការផ្លាស់ប្តូរទស្សនកិច្ច និងការចែករំលែកបទពិសោធឱ្យគ្នាទៅវិញទៅមក ដើម្បីវឌ្ឍនភាព និងការរីកចម្រើនរវាងរាជធានីភ្នំពេញ និងទីក្រុងហាណូយ និយាយជារួមគឺដើម្បីការរីកចម្រើនធំធាត់នៃប្រទេសទាំង ២៕