ភ្នំពេញៈ ក្នុងជំនួបជាមួយលោក Lorenzo Galanti ឯកអគ្គរដ្ឋទូតអ៊ីតាលីប្រចាំកម្ពុជា នាថ្ងៃទី ២៦ ខែមេសា រដ្ឋមន្ត្រីការបរទេសកម្ពុជា លោក ប្រាក់ សុខុន ស្នើឱ្យអ៊ីតាលីពង្រឹង និងលើកកម្ពស់បន្ថែមទៀតនូវទំនាក់ទំនង និងកិច្ចសហប្រតិបត្តិការទ្វេភាគីរវាងប្រទេសទាំង ២ ហើយលោកក៏បង្ហាញការជឿជាក់ថា ទំនាក់ទំនងទ្វេភាគីនេះនឹងបន្តរីកលូតលាស់ជាលំដាប់។
សេចក្តីប្រកាសព័ត៌មានរបស់ក្រសួងការបរទេសកម្ពុជាបានបញ្ជាក់នាថ្ងៃទី ២៦ ខែមេសា ថា៖ «[លោកប្រាក់ សុខុន] បានគូសបញ្ជាក់អំពីសារៈសំខាន់នៃទំនាក់ទំនងយូរលង់រវាងព្រះរាជាណាចក្រកម្ពុជា និងសាធារណរដ្ឋអ៊ីតាលី និងបានជំរុញលើកទឹកចិត្តឱ្យពង្រឹង និងលើកកម្ពស់បន្ថែមទៀតនូវទំនាក់ទំនង និងកិច្ចសហប្រតិបត្តិការទ្វេភាគី»។
កាលពីប៉ុន្មានថ្ងៃមុននេះរដ្ឋាភិបាលអ៊ីតាលីបានផ្តល់អំណោយវ៉ាក់សាំងអាស្ត្រាហ្សេនេកា (Astra Zeneca) ជាង ១,៥ លានដូសដល់កម្ពុជាដែលត្រូវបានរៀបចំពិធីទទួលផ្ទាល់ ដោយលោកនាយករដ្ឋមន្ត្រី ហ៊ុន សែន។ លោក ប្រាក់ សុខុន ចាត់ទុកជំនួយនេះគឺជាការបង្ហាញពីសាមគ្គីភាពជាសកល ក្នុងការប្រយុទ្ធប្រឆាំងនឹងជំងឺកូវីដ ១៩។
លោកបានរំឭកប្រាប់លោក Lorenzo ថា កាលពីដើមឆ្នាំ ២០២០ កម្ពុជាបានអនុញ្ញាតឱ្យនាវាទេសចរណ៍ Westerdam ដែលត្រូវបានបដិសេធការចូលចតដោយប្រទេសមួយចំនួនចូលចតនៅកំពង់ផែអន្តរជាតិ ក្រុងព្រះសីហនុ ក្នុងអំឡុងពេលមានការចាប់ផ្តើមផ្ទុះឡើងនៃជំងឺកូវីដ ១៩។
លោកប្រមុខការទូតបានលើកឡើងថា កម្ពុជាកន្លងមកបានផ្តល់ជំនួយវ៉ាក់សាំង និងគ្រឿងបរិក្ខារវេជ្ជសាស្ត្ររបស់កម្ពុជាទៅប្រទេសមួយចំនួនរួមមាន ប្រទេសមីយ៉ាន់ម៉ា ឡាវ វៀតណាម នេប៉ាល់ និងទីម័រខាងកើត ជាដើម និងបានបញ្ជូនកងកម្លាំងកម្ពុជាជាង ៨ ពាន់នាក់ទៅចូលរួមក្នុងបេសកកម្ម រក្សាសន្តិភាពរបស់អង្គការសហប្រជាជាតិនៅតាមប្រទេសមួយចំនួន។
អ៊ីតាលីកន្លងមក ក៏ធ្លាប់បានផ្តល់ជំនួយដល់កម្ពុជាក្នុងវិស័យវប្បធម៌ ក្រោមក្របខ័ណ្ឌអាជ្ញាធរជាតិអប្សរា តាមរយៈការបណ្តុះបណ្តាលអ្នកជំនាញអភិរក្សប្រាសាទបុរាណខ្មែរ។
ក្រសួងការបរទេសកម្ពុជាបានអះអាងថា ឯកអគ្គរដ្ឋទូតអ៊ីតាលីរូបនេះបានកោតសរសើរ ចំពោះលទ្ធផល «ដ៏ល្អប្រសើរ» នៃយុទ្ធនាការចាក់វ៉ាក់សាំងនៅកម្ពុជា។ លោកក៏បានថ្លែងអំណរគុណកម្ពុជា ដែលបានចាក់វ៉ាក់សាំងដោយឥតគិតថ្លៃជូនដល់ជនជាតិអ៊ីតាលី ដែលស្នាក់នៅក្នុងប្រទេសកម្ពុជា ហើយនិងការផ្តល់នូវកិច្ចសហការ «ដ៏ល្អ» របស់ក្រសួងការបរទេសកម្ពុជាដល់លោកក្នុងការបំពេញភារកិច្ចរបស់លោក។
លោក ប្រាក់ សុខុន បានរាយការណ៍ប្រាប់លោក Lorenzo អំពីសភាពការណ៍ និងការប្រឈមជាក់ស្តែងនៅប្រទេសមីយ៉ាន់ម៉ា ដែលជាលទ្ធផលនៃទស្សនកិច្ចលើកទី ១ របស់លោកទៅកាន់ប្រទេសមីយ៉ាន់ម៉ាក្នុងនាមជាប្រេសិតពិសេសរបស់ប្រធានអាស៊ានស្តីពីមីយ៉ាន់ម៉ា។ ជំហានបន្ទាប់គឺស្ថិតក្នុងការជំរុញការអនុវត្តការឯកភាពជាឯកច្ឆន្ទ ៥ ចំណុច (កុងសង់ស៊ីស) របស់មេដឹកនាំអាស៊ាន។
ក្រសួងការបរទេសកម្ពុជាបញ្ជាក់ថា លោក Lorenzo បានកោតសរសើរចំពោះកិច្ចខិតខំប្រឹងប្រែង និងគំនិតផ្តួចផ្តើមរបស់លោក ហ៊ុន សែន ក្នុងនាមជាប្រធានអាស៊ាននាពេលបច្ចុប្បន្ន និងការខិតខំរបស់លោក ប្រាក់ សុខុន ក្នុងនាមជាប្រេសិតពិសេសក្នុងការស្វែងរកដំណោះស្រាយចំពោះវិបត្តិចាក់ស្រេះនៅប្រទេសមីយ៉ាន់ម៉ា។ លោក Loren-zo សម្តែងនូវក្តីសង្ឃឹមថា កម្ពុជានឹងទទួលបានលទ្ធផលជាផ្លែផ្កាចំពោះវិបត្តិមីយ៉ាន់ម៉ានាពេលខាងមុខ។
ក្រសួងការបរទេសកម្ពុជាបានបញ្ជាក់ថា៖ «ឯកឧត្តមឯកអគ្គរដ្ឋទូតក៏បានវាយតម្លៃខ្ពស់ចំពោះការផ្តោតការយកចិត្តទុកដាក់របស់ឯកឧត្តមឧបនាយករដ្ឋមន្ត្រីលើបញ្ហាចែកចាយជំនួយមនុស្សធម៌ដល់ប្រជាជនមីយ៉ាន់ម៉ា។ ឯកឧត្តម ក៏បានថ្លែងអំណរគុណចំពោះកម្ពុជាផងដែរដែលបានគាំទ្រអ៊ីតាលីជាដៃគូសន្ទនារបស់អាស៊ាន»។
ប្រភពដដែលបន្តទៀតថា៖ «ឯកឧត្តម ឧបនាយករដ្ឋមន្ត្រី [លោក ប្រាក់ សុខុន] បានថ្លែងអំណរគុណចំពោះអ៊ីតាលីដែលបានផ្តល់ជំនួយដល់មជ្ឈមណ្ឌល តំបន់អាស៊ានសម្រាប់សកម្មភាពមីន (ARMAC) ហើយដែលជាការឆ្លើយតប ឯកឧត្តមឯកអគ្គរដ្ឋទូត បានអះអាងជាថ្មីនូវការបន្តគាំទ្រ និងជួយឧបត្ថម្ភរបស់ប្រទេសអ៊ីតាលីចំពោះមជ្ឈមណ្ឌល ARMAC នេះ»។
លោក Lorenzo ថ្លែងថា អ៊ីតាលីបានដាក់បេក្ខភាពអ៊ីតាលីជាប្រទេសរៀបចំ World Expo 2030 ព្រមទាំងបានស្នើសុំការគាំទ្រពីកម្ពុជា ដែលកម្ពុជាកន្លងមកក៏ធ្លាប់បានគាំទ្របេក្ខភាពរបស់អ៊ីតាលីក្នុងស្ថាប័នជំនាញផ្សេងៗរបស់អង្គការសហប្រជាជាតិផងដែរ។
លោក ប្រាក់ សុខុន បានសរសេរនៅលើហ្វេសប៊ុក បន្ទាប់ពីបញ្ចប់ជំនួបនេះថា៖ «ខ្ញុំបានថ្លែងអំណរគុណដល់រដ្ឋាភិបាលអ៊ីតាលី និងឯកឧត្តមផ្ទាល់ [លោក Lo-renzo] ដែលបានបន្តជួយគាំទ្រកម្ពុជា ជាពិសេសតាមរយៈគម្រោងនានាជាមួយអាជ្ញាធរជាតិអប្សរា និងជំនួយជាវ៉ាក់សាំងដល់កម្ពុជា ដើម្បីប្រយុទ្ធប្រឆាំងជំងឺកូវីដ ១៩ នាពេលនេះ។ ជាមួយនឹងការប្តេជ្ញាចិត្ត និងទស្សនវិស័យរួមគ្នា ខ្ញុំជឿជាក់ថា ទំនាក់ទំនងទ្វេភាគីរវាងប្រទេសយើងទាំង ២ នឹងបន្តរីកលូតលាស់ជាលំដាប់»។
លោក ហេង គីមគង់ អ្នកស្រាវជ្រាវជាន់ខ្ពស់នៃមជ្ឈមណ្ឌលអភិវឌ្ឍន៍កម្ពុជា ប្រាប់ភ្នំពេញប៉ុស្តិ៍ នាថ្ងៃទី ២៧ មេសាថា ដើម្បីពន្លឿន ការស្តារសេដ្ឋកិច្ចឡើងវិញ ក្រោយវិបត្តិជំងឺកូវីដ ១៩ កម្ពុជាចាំបាច់ត្រូវការការគាំទ្រពីគ្រប់ប្រទេសដៃគូអភិវឌ្ឍន៍ទាំងអស់។
លោក គីមគង់ បានថ្លែងថា៖ «ដូច្នេះ កម្ពុជាចាំបាច់ត្រូវពង្រឹងទំនាក់ទំនងរបស់ខ្លួនជាមួយបណ្តាប្រទេសនានា រួមមានអ៊ីតាលី ដែលបានផ្តល់ជំនួយវ៉ាក់សាំងកូវីដ ១៩ របស់ខ្លួនដល់កម្ពុជាថ្មីៗនេះ»៕