នគរបាលក្រុងកំពង់ឆ្នាំងនៅថ្ងៃទី ២៨ មេសា កំពុងបន្តស្រាវជ្រាវចាប់ខ្លួនក្រុមជនសង្ស័យពាក់ព័ន្ធចាក់យុវជនម្នាក់ស្លាប់ ដោយសារទំនាស់ពាក្យសម្តីគ្នា ប្រព្រឹត្តនៅភូមិត្រពាំងចឹកសា សង្កាត់-ក្រុងកំពង់ឆ្នាំង កាលពីថ្ងៃទី ២៧ មេសា ឆ្នាំ ២០២២។
លោក នៅ ផល្លី អធិការរងទទួលផែនការងារនគរបាលព្រហ្មទណ្ឌ នៃអធិការដ្ឋាននគរបាលក្រុង កំពង់ឆ្នាំងឱ្យដឹងនៅថ្ងៃទី២៨ មេសា ថា យុវជនរងគ្រោះឈ្មោះ ម៉ុល សារឿន ហៅ ឆ្អឹង អាយុ ២០ឆ្នាំមានលំនៅភូមិត្រពាំងចឹកសា សង្កាត់ -ក្រុង-ខេត្ត កំពង់ឆ្នាំង។ ចំពោះក្រុមជនសង្ស័យវិញកំពុងត្រូវបានសមត្ថកិច្ចរបស់លោកធ្វើការស្រាវជ្រាវដើម្បីតាមចាប់ខ្លួន។
លោកប្រាប់ថា៖«ក្រោយពីធ្វើការស៊ើបអង្កេតមកគឺយើងកំណត់បានមុខសញ្ញារបស់ជនល្មើសអស់ហើយប៉ុន្តែក្រុមជនសង្ស័យកំពុងរត់គេចខ្លួន។ កម្លាំងនគរបាលយើងកំពុងតាមចាប់ពួកគេ»។
លោក ផល្លី រំឮកប្រាប់តាមសម្តីសាក្សីភាគីអ្នកស្លាប់ថា ហេតុការណ៍ដែលឈានដល់មានការចាក់គ្នាស្លាប់នេះគឺនៅព្រឹកថ្ងៃទី២៧ មេសា មានយុវជន២ក្រុមដែលភាគីអ្នកស្លាប់មានគ្នា៤នាក់ រីឯក្រុមជនបង្កមានគ្នា៣នាក់ជិះម៉ូតូ១គ្រឿងក្នុងនោះមាននារីម្នាក់ផង។ ដោយមុនពេលកើតហេតុក្រុមអ្នកស្លាប់បានជីះម៉ូតូ២គ្រឿងតាមផ្លូវជិតរង្វង់មូលវិមានឯករាជ្យហើយក្រុមជនបង្កមានគ្នា៣ នាក់ជិះម៉ូតូស្របទិសគ្នា។
លោកបន្តទៀតថា ពេលកំពុងជិះម៉ូតូនោះភាគីអ្នកស្លាប់បាននិយាយបោះពាក្យសម្តីទៅខាងភាគីម្ខាងទៀតហើយពេលនោះក៏ឈ្លោះប្រកែកគ្នា។ គ្រានោះដែរភាគីអ្នកស្លាប់បានបញ្ឈប់ម៉ូតូរបស់ភាគីជនសង្ស័យតែត្រូវឈ្មោះម៉ុល សារឿន ហៅ ឆ្អឹង(ជនរងគ្រោះស្លាប់)បានហូតខ្សែក្រវ៉ាត់ពីចង្កេះវាយទៅលើភាគីម្ខាងទៀតតែចៃដន្យខ្សែក្រវ៉ាត់នោះបានដាច់ជា២កំណាត់ធ្វើឱ្យជនល្មើសម្នាក់ក្នុងចំណោម៣នាក់បានយកកាំបិទកៃចាក់ទៅលើឈ្មោះម៉ុល សារឿន បណ្តាលឱ្យត្រូវចំក្រោមក្លៀកខាងឆ្វេងហើយនាំគ្នាជិះម៉ូតូគេចខ្លួនបាត់។
បើតាមលោក នៅ ផល្លី ក្រោយពីដឹងថាគ្នីគ្នារបស់ខ្លួនត្រូវរបួសហើយនោះក៏បាននាំគ្នាដឹកជនរងគ្រោះយកទៅ មន្ទីរពេទ្យបង្អែកក្រុងកំពង់ឆ្នាំងតែបានដាច់ខ្យល់ស្លាប់បន្ទាប់ពីទៅដល់មន្ទីរពេទ្យ។ ភ្លាមៗនោះដែរសមត្ថកិច្ចរបស់លោកបានចុះដល់កន្លែងកើតហេតុ និងចុះដល់ផ្ទះរបស់ជនរងគ្រោះដើម្បីឱ្យមន្ត្រីជំនាញ និងគ្រូពេទ្យធ្វើកោសល្យវិច័យលើសាកសពជនរងគ្រោះ។
លោកប្រាប់បន្តថា ក្រោយពីមន្ត្រីជំនាញ និងគ្រូពេទ្យពិនិត្យ និងធ្វើកោសល្យវិច័យរួចមកឃើញថាជនរងគ្រោះបានស្លាប់ដោយសារត្រូវគេចាក់នឹងវត្ថុរឹងបណ្តាលឱ្យស្លាប់មែន ហើយក៏បានប្រគល់សាកសពទៅឱ្យក្រុមគ្រួសារធ្វើបុណ្យតាមប្រពៃណី៕