បន្ទាយមានជ័យៈ ពីដើមខែមករា ដល់ខែមេសា ឆ្នាំ ២០២២ ពលករខ្មែរចំនួន ៣ ៥៥៦ នាក់ ក្នុងនោះមានកុមារចំនួន ៣៩៨ នាក់ ត្រូវបានអាជ្ញាធរថៃបង្ក្រាបចាប់បញ្ជូនត្រឡប់មកកម្ពុជាវិញ បន្ទាប់ពីរកឃើញថា បានលួចចូលទៅរកការងារធ្វើនៅក្នុងប្រទេសថៃដោយខុសច្បាប់។ នេះបើតាមមន្ត្រីនាំពាក្យរដ្ឋបាលក្រុងប៉ោយប៉ែតខេត្តបន្ទាយមានជ័យ។
លោក កែវ តារារស្មី អ្នកនាំពាក្យរដ្ឋបាលក្រុងប៉ោយប៉ែត បានប្រាប់ភ្នំពេញប៉ុស្តិ៍ថា គិតចាប់ពីដើមខែមករាដល់ខែមេសា ឆ្នាំ២០២២ ពលករខ្មែរចំនួន ៣៥៥៦នាក់ ក្នុងនោះមានកុមារចំនួន៣៩៨នាក់ដែលត្រូវភាគីថៃចាប់បញ្ជូនត្រឡប់មកកម្ពុជាវិញតាមច្រកព្រំដែនអន្តរជាតិប៉ោយប៉ែត និងច្រកតំបន់អូរជ្រៅ ដោយសារតែពួកគេ លួចឆ្លងចូលទៅបម្រើការងារដោយខុសច្បាប់ក្នុងប្រទេសថៃ។
លោកបានបន្តថា ពួកគេត្រូវបានបញ្ជូនទៅកាន់មណ្ឌលសំចតមួយកន្លែង ស្ថិតនៅក្នុងសង្កាត់ផ្សារកណ្ដាល ក្រុងប៉ោយប៉ែត ដើម្បីពិនិត្យរកមើលមេរោគកូវីដ១៩ មុនពេលបញ្ជូនពួកគេទៅកាន់មណ្ឌលចត្តាឡីស័ក្កកូក ក្នុងភូមិសាស្ត្រសង្កាត់និមិត្ត ដើម្បីព្យាបាល។
លោកថ្លែងថា៖«អាជ្ញាធរក្រុងប៉ោយប៉ែត បានចុះផ្សព្វផ្សាយដល់គ្រប់មូលដ្ឋានទាំងអស់ដែលស្ថិតក្នុងដែនសមត្ថកិច្ចរបស់យើងអំពីហានិភ័យនៃការធ្វើចំណាកស្រុកទៅរកការងារធ្វើនៅក្រៅប្រទេស ពិសេសប្រទេសថៃ។ ប៉ុន្តែពលករខ្មែរ ដែលត្រូវភាគីថៃចាប់បញ្ជូនត្រឡប់មកវិញនោះ ភាគច្រើនជាពលរដ្ឋ ដែលគ្មានលំនៅអចិន្ត្រៃយ៍ក្នុងក្រុងប៉ោយប៉ែត ឬ ខេត្តបន្ទាយមានជ័យនោះទេ»។
លោកថ្លែងថា ពលរដ្ឋនៅក្រុងប៉ោយប៉ែតស្ទើរតែ១០០ភាគរយ មិនទៅរកការងារធ្វើដោយភាពប្រថុយប្រឋាននោះទេ។ ពួកគេទៅរកការងារធ្វើនៅក្នុងប្រទេសថៃ ទៅតាមរដូវកាលនិងតាមការស្នើរសុំពីអាជ្ញាធរថៃជាប់ព្រំដែន ដែលបានចុះអនុសារណៈយោគយល់គ្នា (MOU) រវាងរដ្ឋបាលក្រុងប៉ោយប៉ែត ខេត្តបន្ទាយមានជ័យ នៃប្រទេសកម្ពុជា និងរដ្ឋបាលស្រុកអារញ្ញខេត្តស្រះកែវ នៃប្រទេសថៃ។
លោកបានបញ្ជាក់ថា៖«ពលរដ្ឋយើងនៅក្រុងប៉ោយប៉ែត ភាគច្រើនគាត់ទៅធ្វើការតាមកសិដ្ឋាន និង តាមចម្ការពោត ដំឡូវមី និងចម្ការអំពៅរបស់កសិករថៃ ក្នុងខេត្តស្រះកែវ។ ពួកគាត់ជាពលករទៅព្រឹកវិលល្ងាច មិនដូចជាពលករ ដែលមកពីបណ្ដាខេត្តនានានោះទេ»។
បើតាម លោក តារារស្មី ពលរដ្ឋនៅក្នុងក្រុងប៉ោយប៉ែត ដែលទៅធ្វើការនៅតាមកសិដ្ឋាន ឬ ចម្ការក្នុងស្រុកអារញ្ញ ខេត្តស្រះកែវ ហើយបាននាំយកកូនៗរបស់ពួកគេទៅតាមជាមួយនោះ ត្រូវបានម្ចាស់កសិដ្ឋាន និង ចម្ការ ទទួល រ៉ាប់រងទាំងផ្នែកសង្គមកិច្ច សុខាភិបាល និង ការអប់រំ ដល់កូនៗរបស់ពួកគេ។
លោកបានបន្តថា កន្លងមកអាជ្ញាធរក្រុងប៉ោយប៉ែត និងអាជ្ញាធរស្រុកអារញ្ញ ខេត្តស្រះកែវ ប្រទេសថៃបានចុះMOUនៅលើកិច្ចព្រមព្រៀងជាមួយគ្នាចំនួន៥វិស័យ រួមមាន វិស័យសន្តិសុខនៅតាមព្រំដែន វិស័យអប់រំ សុខាភិបាល សង្គមកិច្ច និង វិស័យទំនាក់ទំនងសាធារណៈ ដូច្នេះពលកររខ្មែរ ដែលចេញពីក្រុងប៉ោយប៉ែត ទៅធ្វើការនៅតាមកសិដ្ឋាន ឬ ចម្ការ តាមការស្នើសុំរបស់ភាគីថៃ និងទទួលបានការធានាសុវត្ថិភាពពីអាជ្ញាធរថៃ។
លោកបានបន្ថែមថា៖«បើតាមសេចក្ដីរាយការណ៍ពីភាគីថៃ គឺមានសាលារៀនចំនួន៣កន្លែងហើយ ដែលបានទទួលចុះឈ្មោះឲ្យកូនៗពលករខ្មែរ ដែលទៅតាមឳពុកម្ដាយរបស់ពួកគេបានចូលរៀនដោយឥតគិតថ្លៃ និងទទួលបានការផ្ដល់អាហារនិងកន្លែងស្នាក់អាស្រ័យប្រកបដោយសុវត្ថិភាពផងដែរ»។
លោក តារារស្មី បានប្រាប់ឲ្យដឹងទៀតថា យោងតាមទិន្នន័យ ដែលក្រុមការងារនៃមណ្ឌលសំចតក្រុងប៉ោយប៉ែតទទួលបាន ចាប់ពីក្រោយថ្ងៃបុណ្យចូលឆ្នាំថ្មីមក អាជ្ញាធរថៃ បានចាប់បញ្ជូនពលករខ្មែរខុសច្បាប់ប្រមាណជាង១០០នាក់ ក្នុង១ថ្ងៃត្រឡប់មកកម្ពុជាវិញតាមច្រកអន្តរព្រំដែនជាតិប៉ោយប៉ែត និងច្រកអូរជ្រៅ។ ពលករទាំងនោះភាគច្រើនជាពលរដ្ឋចំណាកស្រុកមកពីខេត្តបាត់ដំបង ព្រៃវែង កណ្ដាល ស្វាយរៀង ត្បូងឃ្មុំ តាកែវ កំពង់ចាម កំពង់ធំ និង ខេត្តកំពង់ស្ពឺ៕