មណ្ឌលគិរីៈ រដ្ឋបាលខេត្តមណ្ឌលគិរីបានចេញសេចក្តីប្រកាសព័ត៌មានមួយកាលពីថ្ងៃទី២៨ខែមេសា ដើម្បីបំភ្លឺប្រាប់សាធារណជន ក្រោយពីមានការចាក់ផ្សាយ និងចែកចាយប្រសាសន៍រិះគន់ដល់អ្នកសារព័ត៌មានមួយចំនួនតូចរបស់លោកថង សាវុនអភិបាលខេត្តមណ្ឌលគិរីនាពេលថ្មីៗនេះ។
សេចក្តីប្រកាសបានសរសេរថា ថ្មីៗនេះ មានការកាត់ត និងចាក់ផ្សាយនូវប្រសាសន៍របស់លោកថង សាវុន ដែលលោកបានថ្លែងក្នុងពិធីជួបសំណេះសំណាល និងសួរសុខទុក្ខមន្ត្រីឧទ្យានុរក្ស នៅទីស្នាក់ការត្រពាំងឆ្មារ នៃដែនជម្រកសត្វព្រៃស្រែពក ស្ថិតក្នុងភូមិសាស្ត្រស្រុកកោះញែក ខេត្តមណ្ឌលគិរី កាលពីថ្ងៃទី២៤ ខែមេសា ឆ្នាំ២០២២ កន្លងទៅ។ ការចាក់ផ្សាយនេះបានធ្វើឱ្យគ្រប់បណ្តាញសារព័ត៌មាន បណ្តាញផ្សព្វផ្សាយ បណ្ដាញទំនាក់ទំនងសង្គម និងសាធារណជនមានការភាន់ច្រឡំ និងធ្វើឱ្យប៉ះពាល់ដល់កិត្តិយសរបស់ថ្នាក់ដឹកនាំខេត្ត។
រដ្ឋបាលខេត្តបានបញ្ជាក់ថា៖«នៅក្នុងប្រសាសន៍របស់ ឯកឧត្តមអភិបាលខេត្ត បានលើកឡើងពាក់ព័ន្ធតែបុគ្គលអ្នកសារព័ត៌មានមួយចំនួនតូចដែលមិនមានជំនាញវិជ្ជាជីវៈជាអ្នកសារព័ត៌មាន គ្មានលិខិតអនុញ្ញាតចេញដោយក្រសួងព័ត៌មាន ដែលតែងតែ បានចុះផ្សាយនូវព័ត៌មានមិនពិត គ្មានប្រភពច្បាស់លាស់ និងព័ត៌មានបែបញុះញង់តាមបណ្តាញសង្គម (ហ្វេសប៊ុក)»។ ការកាត់ត និងចាក់ផ្សាយនោះបានធ្វើឱ្យប៉ះពាល់ដល់កិត្តិយសរបស់ថ្នាក់ដឹកនាំ ដែលលោកបានខិតខំប្រឹងប្រែង យកអស់ពីកម្លាំងកាយចិត្ត ក្នុងការគ្រប់គ្រង ដឹកនាំប្រកបដោយស្មារតីទទួលខុសត្រូវខ្ពស់ ធានាការពារនូវសន្តិសុខសណ្តាប់ធ្នាប់ សុវត្ថិភាពសង្គម និងការអភិវឌ្ឍ។
រដ្ឋបាលខេត្តមណ្ឌលគរី ស្វាគមន៍ជានិច្ច និងរីករាយក្នុងការសហការផ្ដល់ព័ត៌មានគ្នាទៅវិញទៅមកជាមួយគ្រប់បណ្តាអង្គភាព និងភ្នាក់ងារសារព័ត៌មាន បណ្តាញសារព័ត៌មាន បណ្ដាញទំនាក់ទំនងសង្គមនានា ដើម្បីចូលរួមលើកកម្ពស់ការអភិវឌ្ឍខេត្តមណ្ឌលគិរី។ អាស្រ័យហេតុនេះ សូមគ្រប់បណ្តាអង្គភាព និងភ្នាក់ងារសារព័ត៌មាន បណ្តាញសារព័ត៌មាន បណ្ដាញទំនាក់ទំនងសង្គម និងសាធារណជនទាំងអស់ជូនជ្រាប និងសូមកុំមានការភាន់ច្រឡំចំពោះប្រសាសន៍លើកឡើងរបស់លោកអភិបាលខេត្ត។ នេះបើយោងតាមសេចក្តីប្រកាសដដែលនេះ៕