ភ្នំពេញៈ ការបើកចំហសេរីភាពអង្គការវិជ្ជាជីវៈបានធ្វើឱ្យកំណើននៃការចុះបញ្ជីកើនឡើងគួរឱ្យកត់សម្គាល់ ដែលគិតត្រឹមឆ្នាំ ២០២១ មានអង្គការវិជ្ជាជីវៈសរុបជាង ៥ ០០០ ដែលបង្ហាញពីការបន្តលើកកម្ពស់ការការពារសិទ្ធិសេរីភាពអង្គការវិជ្ជាជីវៈក្នុងការផ្តល់អត្ថប្រយោជន៍នានាដល់កម្មករ-និយោជិត។
នេះជាការលើកឡើងរបស់លោកនាយករដ្ឋមន្ត្រី ហ៊ុនសែន តាមរយៈសារលិខិតក្នុងឱកាសខួបអនុស្សាវរីយ៍លើកទី ១៣៦ នៃទិវាពលកម្មអន្តរជាតិនៅថ្ងៃទី ១ ខែឧសភា ឆ្នាំ ២០២២ ក្រោមប្រធានបទ «សន្តិភាពសុខភាព និងសន្តិសុខការងារ»។
រាជរដ្ឋាភិបាលបាននិងកំពុងខិតខំអនុវត្តបានដោយជោគជ័យនូវយុទ្ធសាស្ត្រចតុកោណដំណាក់កាលទី ៤ រួមទាំងគោលនយោបាយអាទិភាពសំខាន់ៗ ដើម្បីបង្កើនល្បឿនការអភិវឌ្ឍ និងបង្កើតការងារសមរម្យជូនប្រជាពលរដ្ឋ។ យុទ្ធសាស្ត្រទាំងនោះរួមមាន គោលនយោបាយអភិវឌ្ឍន៍វិស័យឧស្សាហកម្មនៅកម្ពុជាឆ្នាំ ២០១៥-២០២៥, គោលនយោបាយជាតិស្តីពីមុខរបរ និងការងារឆ្នាំ ២០១៥-២០២៥, គោលនយោបាយជាតិស្តីពីការអប់រំបណ្តុះបណ្តាលបច្ចេកទេសនិងវិជ្ជាជីវៈ ឆ្នាំ ២០១៧-២០២៥ និងអនុវត្តនូវការកែទម្រង់មុតស្រួច ក្រោមអភិក្រម «ឆ្លុះកញ្ចក់ ងូតទឹក ដុសក្អែល ព្យាបាល និងវះកាត់» និងបាវចនា «កែទម្រង់ផ្ទៃក្នុង និងបង្កើនមិត្តខាងក្រៅក្នុងស្មារតីឯករាជ្យ»។
លោក ហ៊ុន សែន បានឱ្យដឹងថា៖ «រាជរដ្ឋាភិបាលបានបន្តលើកកម្ពស់ការការពារសិទ្ធិសេរីភាពអង្គការវិជ្ជាជីវៈថែរក្សាសុខដុមនីយកម្មទំនាក់ទំនងវិជ្ជាជីវៈ ផ្តល់អត្ថប្រយោជន៍នានាជូនបងប្អូនកម្មករនិយោជិត រួមទាំងការផ្តល់កិច្ចគាំពារសង្គមផងដែរ ស្របតាមគោលនយោបាយរបស់រាជរដ្ឋាភិបាលច្បាប់ស្តីពីការងារ ច្បាប់ស្តីពីសហជីព និងអនុសញ្ញាអន្តរជាតិខាងការងារទាំង ១៣ ដែលកម្ពុជាបានផ្តល់សច្ចាប័ន»។
លោកបានបន្តទៀតថា៖ «ការបើកចំហសេរីភាពអង្គការវិជ្ជាជីវៈបានធ្វើឱ្យកំណើននៃការចុះបញ្ជីកើនឡើងគួរឱ្យកត់សម្គាល់ដែលគិតត្រឹមឆ្នាំ ២០២១ មានអង្គការវិជ្ជាជីវៈសរុបចំនួន ៥ ៧៤៦ ក្នុងនោះ សហជីពមូលដ្ឋាន ចំនួន ៥ ៤៤២ សហព័ន្ធសហជីពចំនួន ២៥២ សហភាពសហជីពចំនួន ៤០ និងសមាគមនិយោជកចំនួន ១២»។
លោកក៏បានលើកឡើងផងដែរថា រាជរដ្ឋាភិបាលក៏បានបន្តយកចិត្តទុកដាក់ក្នុងការលើកកម្ពស់សុវត្ថិភាព និងសុខភាពការងាររបស់កម្មករ និយោជិត នៅតាមគ្រប់រោងចក្រ សហគ្រាស ដោយតម្រូវឱ្យមានគិលានដ្ឋាន កន្លែងហូបបាយ បន្ទប់បំបៅកូន និងទារកដ្ឋាន ដែលបានជួយធ្វើឱ្យកាន់តែប្រសើរឡើងនូវសុខុមាលភាពរបស់កម្មករនិយោជិត។ កម្មវិធីបង្ការ គ្រោះថ្នាក់ការងារ និងបង្កើនសុវត្ថិភាពក្នុងការដឹកជញ្ជូន និងការធ្វើដំណើររបស់កម្មករនិយោជិតក៏ត្រូវបានជំរុញការអនុវត្តយ៉ាងសកម្មផងដែរ។
កន្លងទៅនេះដើម្បីជំរុញការអនុវត្តគោលនយោបាយអភិវឌ្ឍន៍វិស័យឧស្សាហកម្មកម្ពុជា លោកនាយករដ្ឋមន្ត្រី ហ៊ុនសែន បានចុះជួបផ្ទាល់ជាមួយកម្មករនិយោជិតបានចំនួន ៧៧ លើក សរុបកម្មករនិយោជិតចំនួនជិត ១ លាននាក់គិតចាប់ពីឆ្នាំ ២០១៧ ដល់ឆ្នាំ ២០១៩ ដើម្បីលើកកម្ពស់ជីវភាព សុខុមាលភាពកម្មករនិយោជិត និងទំនាក់ទំនងវិជ្ជាជីវៈ។
លោក ហ៊ុន សែនបានបញ្ជាក់ថា៖ «ខ្ញុំនឹងបន្តសកម្មភាពនេះជារៀងរហូតនៅក្នុងតំណែងរបស់ខ្ញុំជានាយករដ្ឋមន្ត្រីនៃព្រះរាជាណាចក្រកម្ពុជាដែលតាមរយៈជំនួបទាំងនេះបានរកឃើញបញ្ហាមួយចំនួន និងបានដាក់ចេញនូវគោលការណ៍ និងវិធានការជាច្រើន»។
នាឱកាសនេះ រាជរដ្ឋាភិបាលសូមបន្តអំពាវនាវជាថ្មីម្តងទៀតដល់ម្ចាស់រោងចក្រ សហគ្រាស និងកម្មករនិយោជិត ចូលរួមយុទ្ធនាការចាក់វ៉ាក់សាំងកូវីដ ១៩ ដោយស្ម័គ្រចិត្តទាំងដូសមូលដ្ឋាន និងដូសជំរុញនិងអនុវត្តឱ្យបានហ្មត់ចត់បំផុតនូវវិធានការបង្ការ និងទប់ស្កាត់ការរីករាលដាលនៃជំងឺកូវីដ ១៩ តាមរយៈការអនុវត្តវិធានការ “៣ការពារ” និង “៣ កុំ” និងតាមការណែនាំរបស់ក្រសួងសុខាភិបាល។
ទាក់ទងនឹងទិវាពលកម្មអន្តរជាតិនេះដែរ សហភាពការងារកម្ពុជានឹងប្រារព្ធទិវានេះ ក្រោមប្រធានបទ «រួមគ្នាលើកកម្ពស់សិទ្ធិសេរីភាព និងជីវភាពកម្មករនិយោជិត»នៅថ្ងៃទី ១ ខែឧសភា នាសួនច្បារក្រុមប្រឹក្សាអភិវឌ្ឍន៍កម្ពុជា (CDC) រាជធានីភ្នំពេញ។
សហភាពការងារកម្ពុជាបានឱ្យដឹងថា ពិធីនេះគ្រោងនឹងមានអ្នកចូលរួមប្រមាណជា ៨០០ នាក់ ដោយក្នុងនោះរួមមានតំណាងសហភាពសហជីពសហព័ន្ធសហជីព សហជីពសមាគម និងអង្គការដៃគូជាតិ-អន្តរជាតិ។
អភិបាលរងរាជធានីភ្នំពេញលោក កើត ឆែ និងលោក មានចាន់ យ៉ាដា បានឯកភាពឱ្យប្រធានសហភាពការងារកម្ពុជា លោក អាត់ ធន់ រៀបចំទិវាពលកម្មអន្តរជាតិ ១ ឧសភា ប៉ុន្តែមិនអនុញ្ញាតឱ្យដង្ហែក្បួនឡើយ ដោយរដ្ឋបាលរាជធានីភ្នំពេញនឹងសម្របសម្រួលតំណាងមកទទួលញតិ្តនៅទីតាំងប្រារព្ធពិធីនេះតែម្តង។ នេះបើយោងតាមកំណត់ហេតុនៃកិច្ចប្រជុំពិភាក្សារវាងតំណាងសហជីព និងមន្ត្រីនៃសាលារាជធានីភ្នំពេញពីថ្ងៃទី ២០ ខែមេសា កន្លងទៅ៕