ភ្នំពេញៈ មន្ត្រីនគរបាលចរាចរណ៍ដែលបានបើកបរក្នុងស្ថានភាពស្រវឹងត្រូវបានអង្គភាពការិយាល័យចរាចរណ៍រាជធានី-ភ្នំពេញ ធ្វើការផាកពិន័យ និងដាក់ទណ្ឌកម្មទៅតាមនីតិវិធីច្បាប់ ខណៈមន្ត្រីរូបនេះបានថ្លែងថា លោកព្រមទទួលខុសត្រូវគ្រប់បែបយ៉ាង ចំពោះកំហុសឆ្គង រួមទាំងការបង់សំណងខូចខាតទាំងឡាយដែលបានកើតឡើងនៅក្នុងហេតុការណ៍នេះ។
លោក សែម រតនា ប្រធានការិយាល័យចរាចរណ៍ជើងគោករាជធានីភ្នំពេញប្រាប់ភ្នំពេញប៉ុស្តិ៍ថា នៅពេលនេះក្រុមមន្ត្រីនគរបាលជំនាញកំពុងធ្វើការសាកសួរ លោក មួង សីហា នាយការិយាល័យនគរបាល ចរាចរណ៍ជើងគោករាជធានីភ្នំពេញជុំវិញករណីបើកបរក្នុងស្ថានភាពស្រវឹង ហើយបានរេចង្កូតរថយន្តទៅបុករបង សាកលវិទ្យាល័យវិទ្យាសាស្ត្រសុខាភិបាល ដែលស្ថិតនៅក្នុងសង្កាត់ទំនប់ទឹក ខណ្ឌបឹងកេងកង ត្រង់ចំណុចផ្លូវលេខ ១៨៣ និងកែវផ្លូវលេខ ២៧១ ធ្វើឱ្យរថយន្តខូចខាតយ៉ាងដំណំ។
លោកថា តាមចម្លើយសារភាពរបស់លោក មួង សីហា នៅយប់ថ្ងៃកើតហេតុ គាត់បានបើកបរក្នុងស្ថានភាពស្រវឹង ប៉ុន្តែគាត់គ្មានចេតនាបង្កគ្រោះថ្នាក់ចរាចណ៍ដល់អ្នកដទៃឡើយ។ គាត់បាននិយាយថា នៅពេលដឹងថា គាត់មិនអាចគ្រប់គ្រងខ្លួនឯងបានគាត់បានព្យាយាមបើករថយន្តឡើងចិញ្ចើមផ្លូវ ដើម្បីឈប់សំចតជាបណ្ដោះអាសន្ន ប៉ុន្តែជាអកុសល រថយន្ត បានបុកទៅលើបាវខ្សាច់ នៅជាប់របងសាកលវិទ្យាល័យនោះ។
លោក រតនា ថា៖ «បើទោះជាគាត់មិនបង្ករបួសស្នាម ឬ បណ្ដាលឱ្យមានជនរងគ្រោះណាម្នាក់ស្លាប់ក្ដី ប៉ុន្តែគាត់ជាមន្ត្រីនគរបាលចរាចរណ៍ មិនគួរប្រព្រឹត្តល្មើសច្បាប់ចរាចរណ៍ឡើយ។ គាត់ត្រូវតែទទួលការផាកពិន័យទៅតាមច្បាប់ស្ដីពីចរាចរណ៍ផ្លូវគោក និងត្រូវទទួលរងការដាក់ទណ្ឌកម្មវិន័យរបស់កងកម្លាំងនគរបាលជាតិ ព្រមទាំងទទួលខុសត្រូវ ចំពោះសំណងរដ្ឋប្បវេណីដល់ម្ចាស់ទីតាំងអចលនទ្រព្យនៅក្នុងតំបន់នោះផងដែរ»។
បើតាមលោក រតនា ក្រោយពីសាកសួរ និងស្ដាប់ការពន្យល់របស់លោក មួង សីហា ក្រុមមន្ត្រីនគរបាលជំនាញបានធ្វើការអប់រំណែនាំ និងតម្រូវឱ្យលោកសីហា ធ្វើកិច្ចសន្យាបញ្ឈប់នូវសកម្មភាពទាំងឡាយណាដែលបង្កឱ្យមានបាតុភាពមិនល្អប៉ះពាល់ដល់សណ្ដាប់ធ្នាប់សង្គម និងអង្គភាពជំនាញ និងបានដាក់ទណ្ឌកម្មវិន័យរយៈពេល ១ ខែ តាមច្បាប់ស្ដីពីកងកម្លាំងនគរបាលជាតិ។
យ៉ាងណាក៏ដោយ កាលពីរសៀលថ្ងៃទី ២៨ ខែមេសា លោក មួង សីហា បានប្រាប់ភ្នំពេញប៉ុស្តិ៍ថា លោកគ្មានបំណងបង្កគ្រោះថ្នាក់ចរាចរណ៍នោះទេ លោកគ្រាន់តែចង់ចូលឈប់សំចតនៅទីនោះជាបណ្ដោះអាសន្នតែប៉ុណ្ណោះ ព្រោះក្នុងអំឡុងពេលនោះ លោកមានអារម្មណ៍ថា លោកស្រវឹងស្រា មិនអាចគ្រប់គ្រងខ្លួនឯងក្នុងការបន្តដំណើរបើករថយន្តដោយខ្លួនឯងទៅមុខទៀតបាន។ លោកថ្លែងថា៖ «ខ្ញុំយល់ច្បាស់អំពីស្ថានភាពរបស់ខ្ញុំនៅពេលនោះ គឺមិនអាចបន្តដំណើរទៅមុខទៀតបានទេ។ ដូច្នេះខ្ញុំក៏សម្រេចចិត្តឈប់សំចតជាបណ្ដោះអាសន្ន។ ប៉ុន្តែនៅពេលខ្ញុំអែបខាងឡើងទៅលើខឿនចិញ្ចើមផ្លូវ ក៏បានជ្រុលទៅបុកបាវខ្សាច់ ដែលត្រូវបានគេច្រក និងគរទុកនៅជាប់របងសាលាពេទ្យនោះតែម្ដងទៅ»។ លោកនឹងទទួលខុសត្រូវគ្រប់បែបយ៉ាងចំពោះកំហុសឆ្គង រួមទាំងការសងសំណងខូចខាតទាំងឡាយ ដែលបានកើតឡើងនៅយប់នោះដល់ម្ចាស់ទីតាំងអចលនទ្រព្យនៅក្នុងទីតាំងកើតហេតុផងដែរ។
រថយន្តបង្កត្រូវបានយកមករក្សាទុកនៅស្នាក់ការការិយាល័យនគរបាលចរាចរណ៍រាជធានីភ្នំពេញ ដើម្បីរង់ចាំដំណោះស្រាយតាមនីតិវិធី។
យោងតាមមាត្រា ៧២ នៃច្បាប់ចរាចរណ៍ផ្លូវគោកជនណាបើកបរយានយន្តនៅពេលដែលខ្លួនស្ថិតក្នុងស្ថានភាពស្រវឹង ដោយមានជាតិអាល់កុលចាប់ពី ០,៤០ មិល្លីក្រាម ក្នុង ១លីត្រខ្យល់ ឬចាប់ពី ០,៨០ ក្រាមក្នុង ១ លីត្រឈាមឡើងទៅ ត្រូវផ្តន្ទាទោសដាក់ពន្ធនាគារពី ១ ខែ ទៅ ៦ ខែ និងពិន័យជាប្រាក់ពី ៨ សែនរៀល ដល់ ៤ លានរៀល។ ដោយឡែកក្នុងមាត្រា ៧២ បានចែងថា អ្នកបើកបរត្រូវទទួលខុសត្រូវព្រហ្មទណ្ឌដែលខ្លួនបានប្រព្រឹត្តក្នុងការបើកបរយានជំនិះ។ អ្នកគ្រប់គ្រង ឬកម្មសិទ្ធិករត្រូវទទួលខុសត្រូវផ្នែករដ្ឋប្បវេណីក្នុងករណីយានជំនិះរបស់ខ្លួនបានបង្កឱ្យមានគ្រោះថ្នាក់ដល់អ្នកដទៃ៕