.jpg)
ភ្នំពេញៈ សិស្សសាលាប្រមាណជាជាង ២៧ ម៉ឺននាក់ បាននិងកំពុងតែទទួលបានការផ្តល់អាហារពេលព្រឹកឡើងវិញនៅតាមសាលារៀនរបស់ពួកគេ ក្រោយពីរាជរដ្ឋាភិបាលកម្ពុជាបានបើកឱ្យដំណើរការឡើងវិញនូវសាលារៀនទូទាំងប្រទេស។
កម្មវិធីនេះបានផ្តល់អាហារពេលព្រឹកក្តៅៗ ដែលសម្បូរទៅដោយជីវជាតិដល់សិស្សានុសិស្សទាំងនោះជារៀងរាល់ព្រឹក ហើយថែមទាំងបានជួយលើកកម្ពស់កសិផលក្នុងសហគមន៍ផងដែរ ព្រោះថា បន្លែ និងសាច់សម្រាប់ផ្គត់ផ្គង់កម្មវិធីនេះ ត្រូវបានផលិតក្នុងសហគមន៍ស្ថិតនៅជុំវិញតំបន់គោលដៅនីមួយៗ។ នេះបើយោងតាមហ្វេសប៊ុកឈ្មោះ គាំពារសង្គមកម្ពុជាដែលត្រូវបានដាក់ឱ្យដំណើរការដោយ ក្រុមប្រឹក្សាជាតិគាំពារសង្គម។
គាំពារសង្គមកម្ពុជាបានសរសេរកាលពីថ្ងៃទី ២៨ ខែមេសានេះថា៖ «សិស្សានុសិស្សដែលកំពុងសិក្សាក្នុងសាលាគោលដៅនៅទូទាំងប្រទេសបានបង្ហាញអារម្មណ៍រីករាយបន្ទាប់ពីបានទទួលទានអាហារពេលព្រឹកនៅសាលារៀនឡើងវិញ»។
កម្មវិធីផ្តល់អាហារតាមសាលារៀនដោយប្រើប្រាស់កសិផលក្នុងសហគមន៍កំពុងតែផ្តល់ជូនសិស្សានុសិស្សចំនួនជាង ២៧ម៉ឺននាក់នោះគឺត្រូវបានធ្វើឡើងនៅតាមសាលាគោលដៅចំនួន១១១៣នៅទូទាំងប្រទេស។ ក្នុងនោះរាជរដ្ឋាភិបាលកម្ពុជាផ្តល់ជូនអាហារជារៀងរាល់ព្រឹកដល់សិស្សចំនួនជាង៥ម៉ឺននាក់ នៅតាមសាលាចំនួន ២៩០ និងសិស្សានុសិស្សចំនួនជាង២២ម៉ឺននាក់នៅតាមសាលាចំនួន ៨២៣ ទៀត ត្រូវបានផ្តល់ជូនដោយកម្មវិធីស្បៀងអាហារពិភពលោក៕
