ភ្នំពេញៈ សាលាឧទ្ធរណ៍ភ្នំពេញនៅថ្ងៃទី ២៨ មេសា ប្រកាសសាលដីកាសម្រេចតម្កល់ទោសជនជាប់ចោទ ២ នាក់ប្តីប្រពន្ធជាប់ពន្ធនាគារ ១ ជីវិត និងបុរសម្នាក់ទៀតជាប់ពន្ធនាគារ ៣០ ឆ្នាំ ក្នុងសំណុំរឿងសម្លាប់ស្ត្រីចងការប្រាក់ម្នាក់នៅភូមិ-សង្កាត់អូរបែកក្អម ខណ្ឌសែនសុខ កាលពីខែមិថុនា ឆ្នាំ ២០១៨។
លោកចៅក្រម យន់ ណារ៉ុង បានអានសាលដីកាកំបាំងមុខជនជាប់ចោទទាំង ៣ នាក់ក្នុងបន្ទប់សវនាការនៅថ្ងៃទី ២៨ មេសាថា សំណុំរឿងនេះមានជនជាប់ចោទទី ១- ឈ្មោះ កែវ សុផានិត ភេទប្រុស អាយុ ២៨ ឆ្នាំ ទី ២- ឈ្មោះ អាត អឿន ភេទស្រី អាយុ ៣១ឆ្នាំ ជាប្រពន្ធរបស់ កែវ សុផានិត និងទី ៣- ឈ្មោះ សុខ ហេង ហៅ អេតចាយ ភេទប្រុស អាយុ ៣១ ឆ្នាំ។ ពួកគេត្រូវបានសាលាឧទ្ធរណ៍ភ្នំពេញបើកសវនាការជំនុំជម្រះកាលពីថ្ងៃទី ៤ មេសា ឆ្នាំ ២០២២។
លោកបន្តថា៖ «រឿងនេះក្រោយពីបានពិភាក្សាគ្នាយ៉ាងល្អិតល្អន់មក ក្រុមប្រឹក្សាជំនុំជម្រះសម្រេចតម្កល់ ទោសជនជាប់ចោទតាមសាលក្រមរបស់តុលាការរាជធានី-ភ្នំពេញទុកជាបានការដដែល»។
តាមអង្គហេតុនៃសំណុំរឿងនេះបង្ហាញថា ស្ត្រីរងគ្រោះ ឈ្មោះ ខ្នើយ សឹង អាយុ ៣១ ឆ្នាំ រស់នៅភូមិទ្រា ២ សង្កាត់ស្ទឹងមានជ័យ ១ ខណ្ឌមានជ័យ រាជធានីភ្នំពេញ ជាអ្នករកស៊ីចងការប្រាក់។ ចំណែកស្ត្រី ឈ្មោះ អាត អឿន និងប្តីឈ្មោះ កែវ សុផានិត ជាអ្នកលក់នំប៉័ង ហើយបានចងការប្រាក់ពីជនរងគ្រោះចំនួន ២០ ម៉ឺនរៀល។
អង្គហេតុបន្តថា លុះវេលាម៉ោងជាង ៤ រសៀល នៅថ្ងៃទី ១៩ មិថុនា ឆ្នាំ ២០១៨ ស្ត្រីរងគ្រោះបានទៅទារលុយពីស្ត្រីឈ្មោះ អាត អឿន ដល់បន្ទប់ជួលស្ថិតក្នុងភូមិទ្រា២ សង្កាត់ស្ទឹងមានជ័យ ខណ្ឌមានជ័យ។ ពេលនោះបុរសឈ្មោះ អេតចាយ បានស្ទុះទៅចាប់ជនរងគ្រោះបោកក្បាលទៅលើកម្រាលឥដ្ឋ ឯឈ្មោះ កែវ សុផានិត ជាអ្នកចាប់ជើង ហើយឱ្យស្ត្រីឈ្មោះ អាត អឿន យកស្មាសម្រាប់ហាលខោអាវ រឹតកស្ត្រីរងគ្រោះរហូតស្លាប់ ដើម្បីប្លន់យកម៉ូតូស្កូពី ១ គ្រឿង និងទូរស័ព្ទ ១ គ្រឿង។
តាមអង្គហេតុដដែល ក្រោយពីជនជាប់ចោទទាំង ៣ នាក់សម្លាប់ជនរងគ្រោះរួចមក ដល់ពេលយប់ ពួកគេបានយកភួយរុំសាកសពលើកដាក់ក្នុងកញ្ឆេនំប៉័ងដឹកតាមកង់យកទៅទម្លាក់ចោលនៅតាមបណ្តោយមាត់ប្រឡាយទឹកស្អុយស្ថិតក្នុងភូមិ-សង្កាត់អូរបែកក្អម ខណ្ឌសែនសុខ។ បន្ទាប់មក ក្រុមជនជាប់ចោទបានយកម៉ូតូរបស់ជនរងគ្រោះ ម៉ាកស្កូពីទៅដាក់បញ្ចាំនៅម្តុំផ្សារឃ្លាំងរំសេវបានប្រាក់ ៥៥០ ដុល្លារ និងទូរស័ព្ទដៃអាយហ្វូនយកទៅលក់នៅផ្សារឃ្លាំងរំសេវ បាន ៦៥ ដុល្លារទៀត។ លុយបញ្ចាំនោះ ឈ្មោះ អេត ចាយ យកតែ ១០០ ដុល្លារប៉ុណ្ណោះ ចំណែកប្រាក់នៅសល់ជនសង្ស័យទាំង ២ នាក់ប្តីប្រពន្ធជាអ្នកយក។
អង្គហេតុបញ្ជាក់ថា ក្រោយពីបាត់ខ្លួនសាច់ញាតិស្ត្រីរងគ្រោះបានដាក់ពាក្យបណ្តឹងនៅអធិការដ្ឋាននគរបាលខណ្ឌសែនសុខ និងនាយកដ្ឋានព្រហ្មទណ្ឌក្រសួងមហាផ្ទៃរហូតចាប់ខ្លួនបាននៅរាជធានីភ្នំពេញក្រោយកើតហេតុបានជាង ១០ ថ្ងៃ៕