.jpg)
សៀមរាបៈ ផ្លូវបេតុងថ្មីមួយខ្សែប្រវែង ៥៧៥ ម៉ែត្រ និងជាផ្លូវលើកទីមួយនៅក្នុងឃុំឃុនរាម ដែលជាឃុំដាច់ស្រយាលនៃស្រុកបន្ទាយស្រីត្រូវបានដាក់ឱ្យពលរដ្ឋប្រើប្រាស់កាលពីថ្ងៃទី ២៨ ខែមេសាឆ្នាំ ២០២២ នេះ។ នេះបើយោងតាមលោកឃឹម ហ្វីណង់អភិបាលស្រុកបន្ទាយស្រី។
លោក ឃឹម ហ្វីណង់ បានសរសេរនៅលើហ្វេសប៊ុករបស់លោកថា៖ «អាវសរបស់ក្មួយៗសិស្សានុសិស្សនៅក្នុងអនុវិទ្យាល័យឃុនរាមនឹងលែងប្រលាក់ទៅដោយដីក្រហមទៀតហើយ! ផ្លូវបេតុងថ្មីមួយខ្សែប្រវែង ៥៧៥ ម៉ែត្រត្រូវបានដាក់ឱ្យពុកម៉ែបងប្អូនប្រជាពលរដ្ឋ ជាពិសេសសិស្សានុសិស្សមកពីភូមិកំព្រហ្ម និងភូមិឈូកសនៃឃុំឃុនរាម ប្រើប្រាស់ជាផ្លូវការ»។
លោកបានសរសេរបន្តថា ផ្លូវបេតុងនេះគឺជាផ្លូវលើកទីមួយហើយ ដែលឃុំឃុនរាមទទួលបាននៅក្នុងមូលដ្ឋានរបស់ខ្លួន ព្រោះថាឃុំនេះមានទីតាំងភូមិសាស្ត្រនៅដាច់ស្រយាល និងលាតសន្ធឹងធំល្វឹងល្វើយពេក ហើយប្រជាពលរដ្ឋភាគច្រើនរស់នៅដាច់ៗពីគ្នា ដែលមិនសូវប្រមូលផ្តុំ។ នេះជាហេតុធ្វើឱ្យលទ្ធភាពនៃការកសាងហេដ្ឋារចនាសម្ព័ន្ធក្នុងពេលកន្លងមកបានត្រឹមតែជាផ្លូវក្រាលគ្រួសក្រហមតែប៉ុណ្ណោះ។
លោកបានបន្ថែមថា ពិតមែនតែផ្លូវនេះវាខ្លីបន្តិច ប៉ុន្តែផ្លូវបេតុងមួយខ្សែថ្មីនេះបានតភ្ជាប់ភូមិទាំង ២ នោះទៅកាន់ថ្នល់ជាតិដែលមានស្រាប់ ដែលជាពិសេសបានផ្តល់ភាពងាយស្រួលយ៉ាងខ្លាំងដល់សិស្សទាំង ២៥៣ នាក់នៃអនុវិទ្យាល័យឃុនរាម ព្រោះពួកគេធ្វើដំណើរទៅកាន់សាលារៀនដែលស្ថិតនៅលើផ្លូវនេះជាប្រចាំថ្ងៃ៕
