ភ្នំពេញៈ កងកម្លាំងស្វ័យការពារជប៉ុនប្រកាសបន្តគាំទ្រជំរុញទំនាក់ទំនងកងទ័ពកម្ពុជា-ជប៉ុនឱ្យកាន់តែមានកម្រិតខ្ពស់ឡើងបន្ថែមទៀត ជាពិសេសជួយពង្រឹងសមត្ថភាពរបស់កងទ័ពជើងគោកកម្ពុជា។
ការប្រកាសនេះ ធ្វើឡើងក្នុងជំនួបថ្ងៃទី ២៨ ខែមេសា រវាង លោក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ និង ជា មេបញ្ជាការកងទ័ពជើងគោកជាមួយលោក យ៉ាម៉ាសាគិ កូជិ (Yamazaki Koji) អគ្គសេនាធិការចម្រុះនៃកងកម្លាំងស្វ័យការពារជប៉ុននៅទីបញ្ជាការកងទ័ពជើងគោកក្នុងឱកាសនៃដំណើរទស្សនកិច្ចរយៈពេល ២ ថ្ងៃរបស់គណៈប្រតិភូនៃកងកម្លាំងស្វ័យការពារជប៉ុននៅកម្ពុជា។
យោងតាមសេចក្តីប្រកាសព័ត៌មាននាយកដ្ឋានព័ត៌មានក្រសួងការពារជាតិកម្ពុជា នាថ្ងៃទី ២៨ ខែ មេសា លោក Yamazaki ថ្លែងថា កិច្ចសហប្រតិបត្តិការរវាងប្រទេស ប្រជាជន និងកងទ័ពទាំង ២ គឺជាកិច្ចសហប្រតិបត្តិការដ៏ជិតស្និទ្ធ និងប្រកបដោយផ្លែផ្កា ដែលអាចឆ្លុះបញ្ចាំងបានអំពីចំណងមិត្តភាព «ដ៏រឹងមាំ» ប្រកបដោយទំនុកចិត្ត និងការគោរពគ្នាទៅវិញទៅមកក្នុងទំនាក់ទំនងទ្វេភាគីដ៏យូរអង្វែង។
សេចក្តីប្រកាសព័ត៌មានបញ្ជាក់ថា៖ «ក្នុងនាមជាអគ្គសេនាធិការចម្រុះនៃកងកម្លាំងស្វ័យការពារជប៉ុន ឯកឧត្តម [លោក Yamazaki] ក៏នឹងបន្តគាំទ្រជំរុញទំនាក់ទំនងរវាងកងទ័ពទាំង ២ ឱ្យកាន់តែមានកម្រិតខ្ពស់ឡើងបន្ថែមទៀត ជាពិសេសការចូលរួមចំណែកជួយដល់ការពង្រឹងសមត្ថភាពរបស់កងទ័ពជើងគោកកម្ពុជា»។
លោក ហ៊ុន ម៉ាណែត បានចាត់ទុកដំណើរទស្សនកិច្ចនេះថា នឹងផ្តល់សន្ទុះថ្មីមួយទៀតនៃការបេ្តជ្ញាចិត្តរបស់កម្ពុជា-ជប៉ុន ក្នុងការជំរុញ និងលើកកម្ពស់ចំណងមិត្តភាព និងទំនាក់ទំនងកិច្ចសហប្រតិបត្តិការលើវិស័យការពារជាតិទ្វេភាគីឱ្យកាន់តែរីកចម្រើនរឹងមាំ។
លោកបានជំរុញឱ្យមានការរឹតចំណងមិត្តភាព និងកិច្ចសហប្រតិបត្តិការយោធាជាមួយគ្រប់បណ្តាប្រទេសជាមិត្ត រួមទាំងប្រទេសជប៉ុនផ្ទាល់នៅក្នុងការចូលរួមចំណែកដល់ការពង្រឹងទំនុកចិត្តក្នុងក្របខ័ណ្ឌនៃទំនាក់ទំនងរវាងប្រទេស និងប្រទេសក៏ដូចជាប្រជាជន និងប្រជាជន។
ប្រភពដដែលបានដកស្រង់សំដី លោក ហ៊ុន ម៉ាណែត ថ្លែងក្នុងជំនួបនេះថា៖ «កងទ័ពជើងគោកនៃកងយោធពលខេមរភូមិន្ទ បានត្រៀមខ្លួនជានិច្ចក្នុងការបន្តពង្រឹង និងពង្រីករាល់កិច្ចសហប្រតិបត្តិការគ្រប់កម្រិត ជាពិសេសការជំរុញឱ្យមានទំនាក់ទំនងជាក់ស្តែងរវាងអង្គភាព និងអង្គភាព តាមរយៈសកម្មភាពមួយចំនួន ដូចជា៖ ការហ្វឹកហ្វឺនបណ្តុះបណ្តាលធនធានមនុស្ស, ការចែករំលែកបទពិសោធ និងលំហាត់រួមជាដើម»។
លោកបន្តថា រាជរដ្ឋាភិបាល ប្រជាជន និងកងកម្លាំងស្វ័យការពារជប៉ុន គឺ ជាមិត្តដ៏ល្អរហូតមក និងបានដើរតួនាទីយ៉ាងសំខាន់ក្នុងការជួយឧបត្ថម្ភគាំទ្រកម្ពុជាក្នុងគ្រប់ដំណាក់កាលទាំងអស់រាប់ចាប់ពីការទទួលស្គាល់ឯករាជ្យ ការស្វែងរកសន្តិភាព និងដំណើរការកសាង និងអភិវឌ្ឍកម្ពុជាក្រោយសម័យសង្គ្រាម។
ដំណើរទស្សនកិច្ចលោក Yamazaki ធ្វើឡើង ស្របពេលដែលក្នុងឆ្នាំ ២០២២ នេះ កម្ពុជា-ជប៉ុន បានប្រារព្ធខួបទី ៣០ ឆ្នាំ នៃប្រតិបត្តិការរក្សាសន្តិភាព (PKO) ដែលជាប្រតិបត្តិការក្រៅប្រទេសលើកទី ១ របស់កងកម្លាំងស្វ័យការពារជប៉ុនក្នុងក្របខ័ណ្ឌអង្គការសហប្រជាជាតិ៕