.jpg)
បាត់ដំបងៈ នគរបាលខេត្តបាត់ដំបង ក្រោមការសម្របសម្រួលលើនីតិវិធីពីសាលាដំបូងខេត្តបាត់ដំបងបានចុះប្រតិបត្តិការបង្ក្រាបបទល្មើសទទួលផលចោរកម្មចំនួន២ទីតាំងផ្សេងគ្នាក្នុងក្រុងបាត់ដំបង ហើយបានធ្វើការរឹបអូសម៉ូតូជាង២០គ្រឿងផងដែរកាលពីថ្ងៃទី២៧ខែមេសានេះ។ នេះបើយោងតាមនគរបាលជាតិនៅថ្ងៃសុក្រទី២៩ខែមេសា។
គោលដៅទី១គឺស្ថិតនៅចំណុចបន្ទប់ជួលក្នុងភូមិកម្មករ សង្កាត់ស្វាយប៉ោ ក្រុងបាត់ដំបង ដោយបានធ្វើការនាំខ្លួនឈ្មោះ ហ៊ួរ សុងតុង ភេទប្រុស អាយុ ៣៤ឆ្នាំទៅកាន់ស្នងការដ្ឋានដើម្បីធ្វើការសាកសួរទាក់ទងនឹងករណីទទួល ផលចោរកម្ម។
គោលដៅទី២ ស្ថិតនៅភូមិអូរខ្ជាយ សង្កាត់ ព្រែកព្រះស្តេច ក្រុងបាត់ដំបង ដោយបាននាំខ្លួនឈ្មោះ សៀង រី ហៅ វី ភេទស្រី អាយុ ៣៦ឆ្នាំ មានទីលំនៅភូមិប៉ាហ៊ីខាង ជើង សង្កាត់ប៉ាហ៊ី ក្រុងប៉ៃលិនទៅកាន់ស្នងការដ្ឋានដើម្បីធ្វើការសាកសួរស្រាវជ្រាវដូចគ្នាផងដែរ។
ប្រភពដដែលបានឱ្យដឹងថា ក្រោយពីធ្វើការស្រាវជ្រាវ សមត្ថកិច្ចបានធ្វើការដកហូតម៉ូតូចម្រុះសរុបចំនួន ២៦ គ្រឿង ដោយនាំយកមករក្សាទុកនៅស្នងការដ្ឋាននគរបាលខេត្ត។ ក្នុងចំណោម នោះ មានម៉ូតូមួយចំនួនជាប់ទាក់ទិនក្នុងករណីល្មើសច្បាប់ ដែលត្រូវបានរកឃើញនៅចំណុចទីតាំងខាងលើ។
សមត្ថកិច្ចនគរបាលបានរៀបចំសំណុំរឿងបញ្ជូនករណីខាងលើនេះទៅសាលាដំបូងខេត្តបាត់ដំបង ដើម្បីអនុវត្តតាមផ្លូវច្បាប់។
សមត្ថកិច្ចនគរបាលខេត្តក៏សូមជូនព័ត៌មានផងដែរក្នុងករណី ដែលមានជនរងគ្រោះស្គាល់ច្បាស់ថា ម៉ូតូរបស់ខ្លួនស្ថិតក្នុងចំណោមម៉ូតូដែលបានដកហូតមកនេះ ឬមានមូលហេតុផ្សេងៗទាក់ទងនឹងករណីខាងលើសូមទាក់ទំនងទៅស្នងការដ្ឋាននគរបាលខេត្តបាត់ដំបងដោយផ្ទាល់ឬទំនាក់ទំនងតាមរយៈលេខទូរសព្ទនាយការិយាល័យនគរបាល ព្រហ្មទ័ណ្ឌកម្រិតស្រាលនៃស្នងការដ្ឋានតាមរយៈលេខទូរស័ព្ទ០៩២ ៩៣៥ ៥៤៤៕
