មន្ត្រីជាន់ខ្ពស់នៃក្រសួងសុខាភិបាលបានឱ្យដឹងថា ការដាក់ចេញនូវគោលដៅនៃការធ្វើយុទ្ធការចាក់វ៉ាក់សាំងកូវីដ ១៩ នៅតាមរោងចក្រសហគ្រាសសម្រាប់កម្មករ-កម្មការិនី គឺជាការគិតគូរមួយដ៏ល្អ និងត្រឹមត្រូវបំផុតនៅលើការយកចិត្តទុកដាក់លើសុខភាពរបស់កម្មករ។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ បានលើកឡើងកាលពីរសៀលថ្ងៃទី២៨ ខែមេសា ថា តាមការសង្កេតនាពេលកន្លងទៅ ប្រសិនបើដាក់គោលដៅត្រឹមតែមូលដ្ឋានសុខាភិបាលសាធារណៈ ប្រជាពលរដ្ឋមួយចំនួន ឬកម្មករ-កម្មការិនីមួយចំនួនមិនទៅចាក់ទេ ដោយពួកគាត់លើកឡើងថាជាប់រវល់ធ្វើការ។
លោកស្រីមានប្រសាសន៍ថា ៖ «ដូចនេះ ការដាក់គោលដៅរបស់សម្តេចតេជោគឺចំល្អណាស់ ហើយនេះគឺជាការគិតគូរមួយដ៏ល្អបំផុតរបស់សម្តេចនាយករដ្ឋមន្ត្រីទៅលើការយកចិត្តទុកដាក់ចំពោះសុខភាព សុខុមាលភាពរបស់កម្មករកម្មការិនី»។
លោកស្រី ឱ វណ្ណឌីន បានបញ្ជាក់ថា អ្វីដែលប្រមុខរាជរដ្ឋាភិបាលចង់បានគឺប្រជាពលរដ្ឋគ្រប់រូបយ៉ាងហោចណាស់ត្រូវបានដូសទី៣។ ដូចនេះការសម្រេចចិត្តដ៏ត្រឹមត្រូវក្នុងការស្រោចស្រពវ៉ាក់សាំងដូសទី៣នេះ គឺដើម្បីជួយពង្រឹងក៏ដូចជាបង្កើននូវអង្គទីគ័ររបស់បុគ្គលឱ្យបានរឹងមាំ ដែលបន្តនិរន្តរភាពឱ្យប្រជាពលរដ្ឋមានការរស់នៅជាធម្មតា៕