ស្វាយរៀងៈ ក្រសួងអភិវឌ្ឍន៍ជនបទបានសម្រេចផ្តល់នូវជយលាភីលេខ ១ ទៅដល់ខេត្តស្វាយរៀង ដែលជាខេត្តទី ១ ដែលបានបញ្ចប់ការបន្ទោបង់ពាសវាលពាសកាលទាំងស្រុង (ODF) ១០០ ភាគរយ ដែលមានន័យថា គ្រប់ខ្នងផ្ទះទាំងអស់ គឺសុទ្ធតែមានបង្គន់អនាម័យប្រើប្រាស់។
នាពិធីប្រកាស និងផ្តល់ជយលាភីដល់ខេត្តស្វាយរៀង កាលពីថ្ងៃទី ២៧ ខែមេសា លោក អ៊ុក រ៉ាប៊ុន រដ្ឋមន្ត្រីក្រសួងអភិវឌ្ឍន៍ជនបទបានថ្លែងដោយយោងតាមរបាយការណ៍អង្កេតសេដ្ឋកិច្ច សង្គមកិច្ចកម្ពុជា ឆ្នាំ ២០១៩-២០២០ ថា នៅឆ្នាំ ២០២២ អត្រាប្រជាជនមានប្រភពទឹកកែលម្អប្រើប្រាស់មាន ៨០% ចំណែកឯអត្រាប្រជាជន មានបង្គន់អនាម័យកែលម្អប្រើប្រាស់មាន ៨០% និងគ្រួសារប្រមាណ ៨៩% ប្រើប្រាស់ឧបករណ៍ផ្សេងៗ សម្រាប់លាងសម្អាតដៃនៅក្នុងបរិវេណផ្ទះ។
លោកមានប្រសាសន៍ថា៖ «រាជរដ្ឋាភិបាលបានដាក់ចេញនូវផែនការយុទ្ធសាស្ដ្រជាតិ ផែនការសកម្មភាពជាតិ និងផែនការសកម្មភាពខេត្តដើម្បីសម្រេចឱ្យបានគោលដៅអភិវឌ្ឍន៍ជាតិប្រកបដោយចីរភាពគឺនៅឆ្នាំ ២០២៥ ប្រជាពលរដ្ឋគ្រប់រូបនៅតាមសហគមន៍ជនបទ មានលទ្ធភាពទទួលសេវាផ្គត់ផ្គង់ទឹកស្អាត និងការរស់នៅក្នុងបរិស្ថាន ដែលមានអនាម័យល្អ ប្រកបដោយនិរន្តរភាព»។
នាឱកាសនោះដែរ លោក ម៉ែន វិបុល អភិបាលខេត្តស្វាយរៀងបានលើកឡើងថា លទ្ធផលដ៏ឧត្តុង្គឧត្តម ដែលទទួលបាននៅពេលនេះ គឺបានឆ្លើយតបទៅនឹងផែនការយុទ្ធសាស្ត្រជាតិ (PSP) និងផែនការសកម្មភាពជាតិ (NSP) ស្តីពីការងារផ្គត់ផ្គង់ទឹក ការសម្អាត និងអនាម័យជនបទ និងផែនការយុទ្ធសាស្ត្រអភិវឌ្ឍន៍ជាតិប្រកបដោយចីរភាព (SGDs) ដើម្បីរួមចំណែក កាត់បន្ថយភាពក្រីក្ររបស់ពលរដ្ឋ។
លោកថ្លែងថា៖ «លទ្ធផលដ៏ល្អប្រសើរនេះ មិនត្រឹមតែបង្ហាញឱ្យឃើញការរីកចម្រើនផ្នត់គំនិតរបស់ប្រជាពលរដ្ឋពាក់ព័ន្ធនឹងបញ្ហាសុខភាព និងអនាម័យប៉ុណ្ណោះទេ ប៉ុន្តែបានឆ្លុះបញ្ចាំងពីការអភិវឌ្ឍ និងជីវភាពរបស់នៅល្អប្រសើររបស់ប្រជាពលរដ្ឋនៅក្នុងមូលដ្ឋាន ដែលមានលទ្ធភាពគ្រប់គ្រាន់ក្នុងការចូលរួមវិភាគទាន និងម្ចាស់ការក្នុងការសាងសង់បង្គន់អនាម័យ ប្រើប្រាស់នៅតាមខ្នងផ្ទះ និងសហគមន៍»។
លោក តូច ប៉ូលីវ៉ា អភិបាលរងខេត្ត និងជាប្រធានក្រុមការងារបច្ចេកទេស វិស័យផ្គត់ផ្គង់ទឹក ការសម្អាត និងអនាម័យជនបទថ្នាក់ខេត្តឱ្យដឹងថា ខេត្តស្វាយរៀង ជាខេត្តមួយក្នុងចំណោមខេត្តគោលដៅទាំង ៦ ដែលត្រូវបានអង្គការ UNICEF ជ្រើសរើសជាតំបន់គោលដៅ ដើម្បីអនុវត្ត «គម្រោងពន្លឿនស្ថានភាពអនាម័យ និងទឹកស្អាតសម្រាប់ទាំងអស់គ្នា ជំហានទី ២ (ASWAII)» នៅចុងឆ្នាំ ២០១៨ មកដល់បច្ចុប្បន្ន។
លោក ប៉ូលីវ៉ា បន្តថា៖ «ប្រជាពលរដ្ឋទូទាំងខេត្តស្វាយរៀង បានយល់ដឹងពីសារៈសំខាន់នៃការទម្លាប់អនាម័យល្អតាមរយៈការសាងសង់បង្គន់អនាម័យប្រើប្រាស់ បរិភោគទឹកស្អាត និងលាងដៃជាមួយសាប៊ូ»។ លោកបន្ថែមថា ជាពិសេសទៅទៀតនោះ មានការចូលរួមសហការរបស់អាជ្ញាធរស្រុក ក្រុង ឃុំ សង្កាត់ មេភូមិ និងប្រជាពលរដ្ឋគ្រប់រូប ទើបធ្វើឱ្យអត្រាអនាម័យបានកើនពី ៩២% ទៅ ១០០% (នៅប្រើប្រាស់បង្គន់រួម ៥% ស្មើនឹងចំនួន ៦ ៧១៩ ខ្នងផ្ទះ) នៅទូទាំងខេត្តស្វាយរៀង ដែលមានក្រុង ២ មានស្រុក ៦ មាន ១២ សង្កាត់ ៦៨ ឃុំ និង ៦៩០ ភូមិ សម្រេចបាន ODF និងបានចុះពិនិត្យផ្ទៀងផ្ទាត់ ទទួលស្គាល់ដោយគណៈកម្មការថ្នាក់ខេត្ត និងថ្នាក់ជាតិ។
ខេត្តស្វាយរៀងស្ថិតនៅទិសអាគ្នេយ៍នៃរាជធានីភ្នំពេញមានចម្ងាយប្រមាណ ១២៥ គ.ម មានព្រំប្រទល់ខាងលិច និងខាងជើងទល់នឹងខេត្តព្រៃវែងខាងកើតនិងខាងត្បូងទល់នឹងខេត្តតៃនីញ និងខេត្ដឡុងអាន ប្រទេសវៀតណាម ។ ប្រជាជនបច្ចុប្បន្នមានចំនួនជាង ៦០ ម៉ឺននាក់ ផ្ទៃដីសរុបទូទាំងខេត្ដ មាន ២ ៩៦៦,៤០ គ.ម ២ បែងចែកជា ២ ក្រុង (ក្រុងស្វាយរៀង និងក្រុងបាវិត) និង ៦ ស្រុក (ស្រុកស្វាយជ្រំ ស្រុករមាសហែក ស្រុករំដួល ស្រុកស្វាយទាប ស្រុកកំពង់រោទ៍ និងស្រុកចន្ទ្រា) ចែកចេញជា ១២ សង្កាត់ និង ៦៨ ឃុំ (៨០ ឃុំ-សង្កាត់) ស្មើនឹង ៦៩០ ភូមិ ៕