.jpg)
ភ្នំពេញៈ មន្ត្រីជំនាញរកឃើញដេប៉ូប្រេងឥន្ធនៈចំនួន ៩ ទីតាំង រកស៊ីមិនសុចរិត និង បានចាត់វិធានការតាមនីតិវិធីលើម្ចាស់ដេប៉ូទាំងនេះ ក្រោយប្រតិបត្តិការចុះត្រួតពិនិត្យតាមស្ថានីយ និង ដេប៉ូប្រេងឥន្ធនៈចំនួន៤២ទីតាំងក្នុងខេត្តចំនួន៧។
អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) បញ្ជាក់តាមរយៈហ្វេសប៊ុកនាថ្ងៃទី ២៨ ខែមេសាថា៖ «ដេប៉ូប្រេងឥន្ធនៈ ៩ទីតាំងត្រូវបានមន្ត្រីជំនាញរកឃើញមិនមានអនុលោមភាពក្នុងប្រតិបត្តិការត្រួតពិនិត្យតាមស្ថានីយ/ដេប៉ូប្រេងឥន្ធនៈ។ មន្ត្រីជំនាញ ក.ប.ប. បន្តចាត់វិធានការលើម្ចាស់ដេប៉ូប្រេងឥន្ធនៈចំនួន ៩ទីតាំងដែលមិនមានអនុលោមភាព»។
កាលពីថ្ងៃទី២៧ និងទី២៨ ខែមេសា មន្ត្រីជំនាញ ក.ប.ប. សាខាខេត្តកំពង់ធំ កំពង់ស្ពឺ ព្រះសីហនុ កណ្ដាល ពោធិ៍សាត់ ស្វាយរៀង និងសៀមរាប បានចុះប្រតិបត្តិការត្រួតពិនិត្យដើម្បីរកភាពអនុលោមនៅតាមស្ថានីយ និង ដេប៉ូប្រេងឥន្ធនៈផ្សេងៗគ្នា សរុបចំនួន ៤២ទីតាំងក្នុងខេត្តទាំង៧នេះ។
ប្រតិបត្តិការត្រួតពិនិត្យនេះ គឺធ្វើឡើងដើម្បីការពារផលប្រយោជន៍អ្នកប្រើប្រាស់លើវិស័យប្រេងឥន្ធនៈ និងទប់ស្កាត់អំពើមិនសុចរិត៕
