ភ្នំពេញៈ លោកឧបនាយករដ្ឋមន្ត្រី ស ខេង ប្រាប់មន្ត្រី ឱ្យយកចិត្តទុកដាក់ខិតខំពង្រឹងវិស័យកីឡាគ្រប់ប្រភេទដែលស្ថិតនៅក្រោមសមត្ថកិច្ចរបស់ក្រសួងមហាផ្ទៃ ខណៈអង្គភាពកីឡានគរបាលជាតិ គ្រោងសាងសង់អគារថ្មីចំនួន ២។
អគារដែលគ្រោងសាងសង់នោះរួមមាន អគារមជ្ឈមណ្ឌលកីឡាចម្រុះ មានទំហំ ៥៣ម x ៥៨ម និងអគារសាលដំបូលទីលានវាយកូនបាល់ ២ខ្នង ទំហំ ២០ម x ៤០ម។ នេះបើតាម លោកនាយឧត្តមសេនីយ៍ សេង យូអ៊ាន់ អគ្គនាយក នៃអគ្គនាយកដ្ឋានភ័ស្តុភារនិងហិរញ្ញវត្ថុ ក្រសួងមហាផ្ទៃ។
បើតាមក្រសួងមហាផ្ទៃ លោក សេង យូអ៊ាន់ បានថ្លែងបែបនេះ នៅក្នុងកិច្ចប្រជុំ ស្តីពីស្ថានភាពទូទៅ របស់ក្រុមប្រឹក្សាកីឡាក្រសួងមហាផ្ទៃ នៅថ្ងៃទី២៨ខែមេសា។
ជាមួយគ្នានេះ លោក ជា ប៊ុនហេង អគ្គលេខាធិការ នៃអគ្គលេខាធិការដ្ឋានក្រុមប្រឹក្សាកីឡាក្រសួងមហាផ្ទៃ ក៏បាន រាយការណ៍ជូនអង្គប្រជុំផងដែរថា បច្ចុប្បន្នមន្ត្រីជាកីឡាករ កីឡាការិនីបម្រើការងារនៅអង្គភាពកីឡាក្រសួងមហាផ្ទៃ មានចំនួន ៣០០នាក់ ហើយកីឡាក្រសួងមហាផ្ទៃ មានចំនួន ៣៤ប្រភេទ វិញ្ញាសារ ក្នុងចំណោម ៤៣ប្រភេទវិញ្ញាសារនៃកីឡា គ្រប់ប្រភេទទូទៅ។
ក្រោយពីអង្គប្រជុំបានពិភាក្សារួចមក លោក ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដែលជាអធិបតីនៅក្នុងកិច្ចប្រជុំនេះ បានមានប្រសាសន៍ណែនាំដល់រដ្ឋលេខាធិការទទួលបន្ទុក និងក្រុមប្រឹក្សាកីឡាក្រសួងមហាផ្ទៃ ឱ្យយកចិត្តទុក្ខដាក់ខិតខំប្រឹងប្រែងពង្រឹងវិស័យកីឡាគ្រប់ប្រភេទដែលស្ថិតនៅក្រោមសមត្ថកិច្ចរបស់ក្រសួងមហាផ្ទៃឱ្យបានរឹងមាំ និងត្រូវរៀបចំរចនាសម្ព័ន្ធរបស់អង្គភាព ព្រមទាំងខិតខំកៀរគររៀបចំហេដ្ឋារចនាសម្ព័ន្ធនានា រួមមាន អគារធ្វើការងារ និងទីលានហ្វឹកហាត់កីឡាគ្រប់ប្រភេទឱ្យបានគ្រប់គ្រាន់ ដើម្បីឆ្លើយតបនិងតម្រូវការបច្ចុប្បន្ន និងអនាគត៕