.jpg)
ភ្នំពេញៈ អាជ្ញាធរមីនបានលើកឡើងថា ក្នុងរយៈពេល ២៨ ឆ្នាំកន្លងមកនេះ ប្រទេសអូស្ត្រាលីបានរួមចំណែកដ៏សំខាន់ដល់សកម្មភាពបោសសម្អាតមីននៅកម្ពុជា និងបានជួយសង្គ្រោះជីវិតប្រជាជនកម្ពុជាយ៉ាងច្រើនពីគ្រោះថ្នាក់ដោយសារមីន ដែលធ្វើឱ្យកម្ពុជាក្លាយជាប្រទេសនាំមុខគេក្នុងការបោសសម្អាតមីនដែលទទួលស្គាល់នៅលើឆាកអន្តរជាតិ។
លោក លី ធុជ ទេសរដ្ឋមន្ត្រី និងជាអនុប្រធានទី ១ អាជ្ញាធរមីនបានថ្លែងថា អូស្ត្រាលីជាប្រទេសមួយស្ថិតក្នុងចំណោមប្រទេសដែលគាំទ្រដ៏សំខាន់ចំពោះដំណើរការសន្តិភាពនៅកម្ពុជានាចុងទស្សវត្សរ៍ឆ្នាំ ១៩៨០ និងដើមទសវត្សរ៍ឆ្នាំ ១៩៩០ ជាមួយនឹងតួនាទីនាំមុខក្នុងអំឡុងពេលបេសកកម្មអាជ្ញាធរបណ្តោះអាសន្នអង្គការសហប្រជាជាតិនៅកម្ពុជា ឬហៅថា អ៊ុនតាក់ (UNTAC) ដែលបានបញ្ជូនកងកម្លាំងរក្សាសន្តិភាពជាច្រើនដែលដឹកនាំដោយលោក John Sanderson អតីតអគ្គមេបញ្ជាការអ៊ុនតាក់។
លោកបន្តថា ចាប់តាំងពីពេលនោះមកអូស្ត្រាលីបានបន្តរក្សានូវដំណើរចូលរួមគាំទ្រដល់កម្ពុជាឆ្ពោះទៅរកស្ថិរភាព និងការស្តារឡើងវិញក្រោមកម្មវិធីជំនួយមនុស្សធម៌ដ៏ធំមួយរួមទាំងជំនួយក្នុងការដោះមីនផងដែរ។
លោក លី ធុជ ថ្លែងដូច្នេះក្នុងពិធីតាំងពិព័រណ៍រូបថតរំឭកខួបលើកទី ៣០ នៃតួនាទីរបស់ប្រទេសអូស្ត្រាលីក្នុងសម័យ UNTAC នៅសណ្ឋាគារ The Raffles Hotel Le Royal រាជធានីភ្នំពេញ នាថ្ងៃទី ២៨ ខែមេសា ដើម្បីអបអរខួបលើកទី ៧០ នៃការបង្កើតទំនាក់ទំនងការទូតរវាងកម្ពុជា និងអូស្ត្រាលី។
នៅចំពោះមុខលោក John Sanderson លោក លីធុជ ថ្លែងថា៖ «ចាប់តាំងពីឆ្នាំ ១៩៩៤ ប្រទេសអូស្ត្រាលីបានរួមចំណែកដ៏សំខាន់ដល់វិស័យសកម្មភាពមីននៅកម្ពុជា និងបានជួយសង្គ្រោះជីវិតមនុស្សយ៉ាងច្រើនពីគ្រោះថ្នាក់ ដោយសារមីន និងផ្តល់សុវត្ថិភាពដល់សហគមន៍ជនបទសម្រាប់ជីវភាពរស់នៅកាន់តែប្រសើរឡើង ដែលជាការរួមចំណែកដល់សមិទ្ធផលដ៏មានមោទនភាព»។
លោកបន្ថែមថា៖ «កម្ពុជាបានក្លាយជាប្រទេសនាំមុខគេក្នុងការបោសសម្អាតមីន និងគ្រាប់មិនទាន់ផ្ទុះ ដែលត្រូវបានទទួលស្គាល់ និងកោតសរសើរជាអន្តរជាតិ ក្រោមសកម្មភាពទាំងក្នុងប្រទេស និងអង្គការសហប្រជាជាតិ»។
លោកទេសរដ្ឋមន្ត្រីអះអាងថា ចាប់តាំងពីឆ្នាំ ២០០៦ កម្ពុជាបានបញ្ជូនកងទ័ពរក្សាសន្តិភាពរបស់ខ្លួនចំនួន ៧ ៨៩៩ នាក់ ទៅចូលរួមបម្រើការងារក្រោមបេសកកម្មរក្សាសន្តិភាពរបស់អង្គការសហប្រជាជាតិក្នុងប្រទេសជាច្រើន ដែលមានជំនាញផ្នែកដោះមីន និងវិស្វកម្ម។
លោក លី ធុជ ថ្លែងថា៖ «នេះជាសមិទ្ធផលដ៏លេចធ្លោមួយ ដែលអនុញ្ញាតឱ្យទង់ជាតិកម្ពុជាឈរក្នុងចំណោមទង់ប្រទេសដទៃទៀត ដែលបានបញ្ជូនកងកម្លាំងទៅបំពេញបេសកកម្មអង្គការសហប្រជាជាតិដូចគ្នា ដូចដែលយើងក្រឡេកទៅមើលកាលពី ៣០ ឆ្នាំមុន នៅពេលដែលកម្ពុជាបានទទួលយកកងកម្លាំងរបស់អង្គការសហប្រជាជាតិ ដើម្បីប្រតិបត្តិការរក្សាសន្តិភាពនៅលើទឹកដីដ៏អាប់អួរនេះ ដែលពោរពេញទៅដោយជម្លោះ និងការប្រឈមមុខដាក់គ្នា»។
ខណៈឆ្នាំនេះជាខួបលើកទី ៧០ នៃការបង្កើតទំនាក់ទំនងការទូតរវាងកម្ពុជា និងអូស្ត្រាលី លោកលើកឡើងថា ក្នុងរយៈពេល ៧០ ឆ្នាំកន្លងមកនេះ ប្រទេសទាំងពីរបានរក្សាទំនាក់ទំនងស្និទ្ធស្នាល ផ្លាស់ប្តូរទស្សនកិច្ចកម្រិតខ្ពស់ និងពង្រឹងកិច្ចសហប្រតិបត្តិការលើគ្រប់វិស័យ រួមទាំងពាណិជ្ជកម្ម ការវិនិយោគ កសិកម្ម ការអប់រំ ការដោះមីន ការថែទាំសុខភាព និងទំនាក់ទំនងរវាងប្រជាជននិងប្រជាជន៕
