ភ្នំពេញៈ អាជ្ញាធរខេត្តកែប និងតំណាងធនាគារអភិវឌ្ឍន៍អាស៊ី (ADB) កាលពីថ្ងៃពុធទី ២៧ ខែមេសាបានជួបពិភាក្សាការងារ ដែលផ្ដោតលើការចុះពិនិត្យការកសាងសមិទ្ធផលជាច្រើនទីតាំង ដែលមានតម្លៃរាប់លានដុល្លារអាមេរិកផងដែរ។
ភាគីអាជ្ញាធរខេត្តបានដឹកនាំដោយលោក វ៉ៅ សុខា អភិបាលរងខេត្តដោយមានការចូលរួមពីលោក លោកស្រី ប្រធាន អនុប្រធានមន្ទីរអង្គភាពពាក់ព័ន្ធ តំណាង រដ្ឋបាលក្រុង ស្រុក។ រីឯភាគីធនាគារអភិវឌ្ឍន៍អាស៊ី (ADB) ដឹកនាំដោយលោក Saunders Lindsay ប្រធានក្រុមគម្រោងជលផលឆ្នេរសមុទ្រ និងនិរន្តរភាពកម្ពុជា។
រដ្ឋបាលខេត្តកែបបានឱ្យដឹងថា កិច្ចប្រជុំពិភាក្សានេះផ្ដោតលើការចុះពិនិត្យការកសាងសមិទ្ធផលចំនួន ៤ ទីតាំង ស្ថិតនៅក្រុងកែប និង ស្រុកដំណាក់ចង្អើរ។ ក្នុងនោះក៏បានពិភាក្សាលើការកសាងចំណតទូកផ្សារក្តាម និងការកែលម្អចំណតទូករបស់លោក កុង យន ឱ្យក្លាយទៅជាផែស្តង់ដាសម្រាប់ជលផលនេសាទ និងសម្រាប់វិស័យទេសចរណ៍ផងដែរ។
គម្រោងស្តីពីជលផលតំបន់ឆ្នេរ និងសមុទ្រប្រកបដោយនិរន្តរភាពនេះបានបើកកិច្ចប្រជុំកាលពីថ្ងៃទី ១៦ ខែ ធ្នូ ឆ្នាំ ២០២១ រួចម្តងមកហើយ។ គម្រោងនេះគ្រោងចំណាយថវិកា ១០០ លានដុល្លារ ដែលក្នុងនោះបានមកពី ADB Loans ៥០ លានដុល្លារ, ASEAN Infrastructure Fund ១០ លានដុល្លារ AFD ៣០ លានដុល្លារ, Concessional Loan និង ADB Grand Funds ១០ លានដុល្លារ សម្រាប់អភិវឌ្ឍន៍តំបន់ជលផលឆ្នេរ និងសមុទ្រ ប្រកបដោយនិរន្តរភាពចំនួន ៤ ខេត្ត គឺកោះកុង ព្រះសីហនុ កំពត និងកែប។
លោក វ៉ៅ សុខា បានបញ្ជាក់ក្នុងឱកាសនោះថា ក្នុងនាមអាជ្ញាធរខេត្តកែបនឹងគាំទ្រការអភិវឌ្ឍចំណតទូកទាំង ២ ទីតាំងនេះ សម្រាប់សម្រួលដល់ការចតទូករបស់ប្រជានេសាទ និងភ្ញៀវទេសចរឱ្យកាន់តែល្អប្រសើរឡើង។ លោកអភិបាលរងខេត្តបានបន្តថា នៅពេលគម្រោងខាងលើនេះ ចេញជារូបរាងឡើង អាជ្ញាធរខេត្ត និងខិតខំកៀរគររកដៃគូក្នុងការថែរក្សាសំណង់ដែលបានកសាងរួច និងរក្សាអនាម័យ បរិស្ថាន និងបង្កើតការផ្គត់ផ្គង់ទឹកស្អាត និងអគ្គិសនីក្នុងតំបន់ទាំងនោះឱ្យបានប្រសើរបំផុត៕