ភ្នាក់ងារសហប្រតិបត្តិការអន្តរជាតិកូរ៉េ (កយកា) ប្រចាំប្រទេសកម្ពុជា បានប្រគល់សញ្ញាប័ត្រជូនដល់មន្ត្រីអាហារូបករណ៍កយកាចំនួន៤នាក់ ដែលបានបញ្ចប់ថ្នាក់បរិញ្ញាបត្រជាន់ខ្ពស់(អនុបណ្ឌិត)ដោយជោគជ័យនៅសាកលវិទ្យាល័យហាល់លីម (Hallym) និងវិទ្យាស្ថានវិទ្យាសាស្ត្រ និងបច្ចេកវិទ្យាកម្រិតខ្ពស់របស់ប្រទេសកូរ៉េ (KAIST) តាមរយៈកម្មវិធីអាហារូបករណ៍ របស់ទីភ្នាក់ងារកយកា។
យោងតាមសេចក្តីប្រកាសព័ត៌មានរបស់ ភ្នាក់ងារសហប្រតិបត្តិការអន្តរជាតិកូរ៉េ(កយកា) នាថ្ងៃទី២៩ ខែមេសានេះ បានឱ្យដឹងថា មន្ត្រីអាហារូបករណ៍កយកាចំនួនបួននាក់ដែលបានបញ្ចប់ថ្នាក់បរិញ្ញាបត្រជាន់ខ្ពស់ ពីសាធារណរដ្ឋកូរ៉េ បាទទួលសញ្ញាប័ត្រពីប្រធានតំណាងកយកាប្រចាំកម្ពុជា។
មន្ត្រីអាហារូបករណ៍កយកាពីរនាក់ គឺ កញ្ញា ជា ណាវិន មកពីសាកលវិទ្យាល័យភូមិន្ទកសិកម្ម នៃក្រសួងកសិកម្ម រុក្ខាប្រមាញ់ និងនេសាទ (MAFF)កម្ពុជា និងលោក កែវ ហាក់ មកពីក្រសួងអភិវឌ្ឍន៍ជនបទ(MRD)កម្ពុជា។
មន្ត្រីទាំងពីររូបនេះ បានបញ្ចប់ការសិក្សាដោយជោគជ័យ និងបានឆ្លងកាត់ការវាយតម្លៃនិក្ខេបបទសម្រាប់ ថ្នាក់បរិញ្ញាប័ត្រជាន់ខ្ពស់គោលនយោបាយសាធារណៈ(ជំនាញគោលនយោបាយការប្រែប្រួលអាកាសធាតុ) នៅសាលាបញ្ចប់ការសិក្សា សាកលវិទ្យាល័យហាល់លីម (Hallym) ក្នុងទីក្រុង Chuncheon ខេត្ត GangWon-Do នៃសាធារណរដ្ឋកូរ៉េ។
ចំណែកមន្ត្រីអាហារូបករណ៍កយកាពីរនាក់ទៀត ដែលមាន លោក នៃ ស៊ីវណ្ណសាក់ ប្រធានផ្នែកនៃនាយកដ្ឋានលទ្ធកម្មនៃអគ្គិសនីកម្ពុជា (EDC) និង លោកស្រី សឿន កណ្ណិកា ប្រធានស្តីទីការិយាល័យ នៃនិយ័តករមូលបត្រកម្ពុជា (ន.ម.ក.) ក្រោមឱវាទរបស់អាជ្ញាធរសេវាហិរញ្ញវត្ថុមិនមែនធនាគារ(អ.ស.ហ)។ មន្ត្រីទាំងពីររូបនេះ ក៏បានបញ្ចប់ការសិក្សាដោយជោគជ័យ និងបានឆ្លងកាត់ការវាយតម្លៃនិក្ខេបបទសម្រាប់ «ថ្នាក់បរិញ្ញាបត្រជាន់ខ្ពស់គ្រប់គ្រងពាណិជ្ជកម្ម - Master of Business Administration (Majoring in Social Entrepreneurship)។
លោក នោ ហ្យន់ជូន(Rho Hyun-Jun) ប្រធានតំណាងកយកា-KOICA ប្រចាំនៅប្រទេសកម្ពុជា បានស្វាគមន៍ និងអបអរសាទរចំពោះបញ្ចប់ថ្នាក់បរិញ្ញាបត្រជាន់ខ្ពស់(អនុបណ្ឌិត)របស់ពួកគេ។
លោកបានថ្លែងថា ៖ «ទោះបីមានការលំបាកក្នុងស្ថានភាពជំងឺកូវីដ១៩ក៏ដោយ ទីភ្នាក់ងារកយកាបានសន្យាបន្តជួយដល់កម្ពុជា និងផ្តល់អាហារូបករណ៍ ព្រមទាំងឱកាសបណ្តុះបណ្តាលបន្ថែមទៀតក្នុងរយៈពេលប៉ុន្មានឆ្នាំកន្លងមកនេះ»។
កម្មវិធី CIAT(ការពង្រឹងសមត្ថភាព និងការរីកចម្រើនសម្រាប់ថ្ងៃស្អែក) របស់ ទីភ្នាក់ងារកយកាដែលជាកម្មវិធីអាហារូបករណ៍ គឺជាកម្មវិធីបណ្តុះបណ្តាលផ្នែកអភិវឌ្ឍន៍ធនធានមនុស្ស ឈានមុខគេរបស់ប្រទេសកូរ៉េ ដែលទីភ្នាក់ងារកយកាអញ្ជើញមន្ត្រីរាជការ វិស្វករ អ្នកស្រាវជ្រាវ និងអ្នកបង្កើតគោលនយោបាយនៅក្នុងប្រទេសកំពុងអភិវឌ្ឍន៍ដែលនឹងដើរតួជាអ្នកដឹកនាំកំណើនសេដ្ឋកិច្ច និងសង្គមរបស់ប្រទេសពួកគេ និងផ្តល់ការបណ្តុះបណ្តាលពង្រឹងសមត្ថភាពតាមរយៈការចែករំលែកបទពិសោធ និងបច្ចេកវិទ្យារបស់ប្រទេសកូរ៉េសម្រាប់ការអភិវឌ្ឍ៕