ក្រសួងសុខាភិបាលនឹងធ្វើការពិចារណាក្នុងការកំណត់គោលដៅមួយជំហានទៀតទាក់ទងនឹងយុទ្ធនាការចាក់វ៉ាក់សាំងកូវីដ ១៩ បន្ទាប់ពីគោលដៅនៃការចាក់នៅតាមរោងចក្រ ទីផ្សារ និងសាលារៀនត្រូវបានបញ្ចប់រួចរាល់ ខណៈដែលដំណើរការនៃយុទ្ធនាការនេះកំពុងប្រព្រឹត្តទៅដោយរលូន។
អ្នកនាំពាក្យនៃក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេសបានថ្លែងឱ្យដឹងកាលពីថ្ងៃទី ២៨ ខែមេសា ថាការដាក់ចេញនូវគោលការណ៍ដ៏ត្រឹមត្រូវរបស់លោកនាយករដ្ឋមន្ត្រីលើការចាក់វ៉ាក់សាំងកូវីដ ១៩ នេះ ហើយប្រតិបត្តិករក៏កំពុងតែខិតខំរួមគ្នាជាមួយនឹងអាជ្ញាធរតាមបណ្តាខេត្ត ដើម្បីសម្រុកចាក់វ៉ាក់សាំងនេះទៅដល់ក្រុមគោលដៅទាំង ៣ នេះ។
លោកស្រីមានប្រសាសន៍ថា៖ «យើងក៏មិនមែនធ្វើតែគោលដៅទាំង ៣ នេះទេ គឺនៅពេលដែលយើងធ្វើគោលដៅទាំង ៣ នេះរួចហើយ យើងនឹងសំដៅទៅរកគោលដៅផ្សេងៗទៀតដែលបងប្អូនយើងខ្លះមិនបានមកទីផ្សារហើយក៏មិនបានចាក់វ៉ាក់សាំងដែរ។ ដូចនេះហើយយើងពិចារណាក្នុងការធ្វើការងារមួយដំណាក់កាលទៀតជាមួយគ្នា»។
ប្រធានគណៈកម្មការចាក់វ៉ាក់សាំងនេះក៏បានបញ្ជាក់ទៀតថា ក្រុមការងារចាក់វ៉ាក់សាំងនឹងធ្វើការពិនិត្យលទ្ធភាពជាមួយនឹងភូមិ ឃុំ ដើម្បីព្យាករណ៍លើចំណុចនេះ ប៉ុន្តែក៏តម្រូវឱ្យមានការចូលរួមបន្ថែមទៀតជាមួយនឹងរដ្ឋបាលខេត្ត-ស្រុក ដើម្បីធ្វើការព្យាករណ៍ប្រជាពលរដ្ឋនៅតាមឃុំនីមួយៗមកទទួលយកវ៉ាក់សាំង ហើយធ្វើការកំណត់ថ្ងៃសម្រាប់ចុះចាក់វ៉ាក់សាំងជូនពួកគាត់តែម្តង។
លោកស្រី ឱ វណ្ណឌីន បានបន្ថែមថា៖ «សម្រាប់គោលដៅអាទិភាពគឺ ៣ ធំៗហ្នឹងហើយ ដែលមានរោងចក្រ ទីផ្សារ និងសាលារៀន ប៉ុន្តែជាគោលដៅបន្ទាប់បន្សំរបស់យើងគឺត្រូវធ្វើផងដែរ»៕