.jpg)
រូបភាព អាជ្ញាធរជាតិអប្សរា
មន្ត្រីនៃអាជ្ញាធរជាតិអប្សរាបានលើកឡើងថា ការជួសជុលតួប្រាង្គកណ្តាលរួតទីបីនៃប្រាសាទអង្គរវត្តបានប្រើរយៈពេលជាង ១០ ខែនោះ គឺប្រើកម្លាំងមនុស្សសុទ្ធសាធជាមួយនឹងការតស៊ូ និងភាពអត់ធ្មត់ និងយកចិត្តទុកដាក់បំផុត។
យោងតាមអាជ្ញាធរជាតិអប្សរានៅថ្ងៃទី ២៩ ខែមេសានេះបានឱ្យដឹងថា ការជួសជុលតួប្រាង្គបាកាណនៃប្រាសាទអង្គរវត្តដែលប្រើដោយកម្លាំងមនុស្សសុទ្ធសាធអាចចាត់ទុកជាជោគជ័យមួយដោយក្រុមអ្នកជំនាញនៃអាជ្ញាធរជាតិអប្សរាតួប្រាង្គបាកាណនៃប្រាសាទអង្គរវត្ត។ វាគឺជាទីតាំងមួយនៅខ្ពស់ ព័ទ្ធជុំវិញទៅដោយជញ្ជាំងរោងទងថ្មពីរជាន់ ដែលមិនអាចឱ្យនាំគ្រឿងចក្រធុនតូច ឬធំចូលទៅបម្រើការជួយជួសជុលនៅការដ្ឋាននោះបានឡើយ។
លោក គឹម សុធិន អគ្គនាយរងនៃអាជ្ញាធរជាតិអប្សរាបានឱ្យដឹងថា ក្រុមអ្នកជួសជុលត្រូវប្រើកម្លាំងលើកដុំថ្មថ្មីដែលត្រូវយកឡើងទៅបំពេញបន្ថែមនៅតាមកន្លែងចាំបាច់ ដើម្បីពង្រឹងរចនាសម្ព៏ន្ធ និងទ្រដុំថ្មចាស់ដែលបានរកឃើញទីតាំង។
លោកបានឱ្យដឹងថា៖ «ពេលចាប់ផ្ដើមទាញយោងឡើងដោយដៃថ្មថ្មីមួយដុំបានប្រើពេលរហូតដល់បីថ្ងៃ ទើបទាញយកបាន។ ចំណែកឯការដឹកជញ្ជូនថ្មចល័តពីកន្លែងមួយទៅកន្លែងមួយវិញទៀតសោត គឺប្រើរទេះរណេលឈើ ឬដែកទីប រុញឬទាញដោយមនុស្សយ៉ាងតិចចំនួន ១២ នាក់ ជួយអូសផងទាញផង និងរុញផងទើបអាចនាំថ្មចល័តទៅមកបាន»។
លោក គឹម សុធិន បានបន្តទៀតថា កិច្ចការរុះរើរៀបថ្មខឿនរួតបាកាណនេះ គឺទាមទារឱ្យក្រុមអ្នកជំនាញ និងជាងរិះរកគ្រប់វិធីសាស្ត្រ បច្ចេកទេសដើម្បីពង្រឹងរចនាសម្ព័ន្ធសំណង់ប្រកប ឱ្យរឹងមាំឡើងវិញ ហើយមិនប៉ះពាល់ដល់សំណង់ចាស់ដែលទ្រុឌទ្រោមខូចខាត ដោយសារអាយុកាលនៃវត្ថុធាតុដើមទៀតផង។
លោកបានបន្ថែមទៀតថា នេះជាលើកទីមួយហើយដែលការជួសជុលខឿនកណ្ដាលរួតបាកាណនៃប្រាសាទអង្គរវត្តបានប្រើកម្លាំងមនុស្សទទួលបានជោគជ័យដែលមិននឹកស្មានដល់ ពីព្រោះគេមិននឹកស្មានថាក្រុមការងារអាចធ្វើបាន នៅក្នុងពេលដ៏លំបាកបំផុតទាំងការងារ និងទាំងពេលដែលមានវិបត្តិដោយជំងឺកូវីដ ១៩៕
