ព្រៃវែងៈ មន្ត្រីធនធានទឹកបានចុះធ្វើការកែលម្អប្រព័ន្ធធារាសាស្ត្រ និងត្រួតពិនិត្យការងារថែទាំជាប្រចាំប្រព័ន្ធធារាសាស្ត្រជាច្រើនប្រព័ន្ធនៅក្នុងខេត្តព្រៃវែង ពោធិ៍សាត់ បាត់ដំបង និងខេត្តឧត្តរមានជ័យកាលពីថ្ងៃពុធ និងថ្ងៃព្រហស្បតិ៍ទី ២៧ និង ២៨ ខែមេសានេះ។
យោងតាមក្រសួងធនធានទឹក និងឧតុនិយមបានឱ្យដឹងនៅថ្ងៃសុក្រទី ២៩ ខែមេសាថា ក្រុមការងារមន្ទីរធនធានទឹក និងឧតុនិយមខេត្តព្រៃវែងបានចុះធ្វើការកែលម្អ និងថែទាំប្រចាំនៅប្រព័ន្ធធារាសាស្ត្រចំនួន ២ ប្រព័ន្ធ។ ក្នុងនោះរួមមានប្រព័ន្ធធារាសាស្ត្រប្រមូលដុំ ស្ថិតនៅឃុំស្មោងជើង ស្រុកកំចាយមារ ដែលមានទំនប់មេចំនួន ១ ខ្សែប្រវែង ៥០០ ម, ប្រឡាយមេចំនួន ១ ខ្សែប្រវែង ៤៨៩០ ម, សំណង់ទ្វារទឹកចំនួន ៣ កន្លែង និងសំណង់លូស្រោចស្រពចំនួន ៤ កន្លែងជាដើម។ ប្រព័ន្ធធារាសាស្ត្រនេះមានលទ្ធភាពស្រោចស្រពស្រូវវស្សាចំនួន ៧.៥០ ហិកតា និងស្រូវប្រាំងចំនួន ១៣០ ហិកតា។
មួយទីតាំងទៀតគឺប្រព័ន្ធធារាសាស្ត្រស្ទឹងជោរ ស្ថិតនៅឃុំក្រញ៉ូង ស្រុកកំចាយមារ ដែលមានទំនប់មេចំនួន ០១ ខ្សែប្រវែង ២៥០ ម, សំណង់សម្រួលចរន្តទឹកមានទ្វារស្វ័យប្រវត្តិចំនួន ១ កន្លែង ប្រវែង ៤៤ ម, សំណង់បង្ហៀរចំនួន ១ កន្លែង ប្រវែង ៧០ ម ដែលមានលទ្ធភាពស្រោចស្រពស្រូវវស្សាចំនួន ២ ០០០ ហិកតា។
ដោយឡែក ក្រុមការងារបច្ចេកទេសនាយកដ្ឋានធារាសាស្ត្រកសិកម្មសហការជាមួយមន្ទីរធនធានទឹក និងឧតុនិយមខេត្តពោធិ៍សាត់ ខេត្តបាត់ដំបង និងខេត្តឧត្តរមានជ័យ បានចុះពិនិត្យការងារថែទាំជាប្រចាំប្រព័ន្ធធារាសាស្ត្រផងដែរ។ ក្នុងនោះក្នុងខេត្តពោធិ៍សាត់មានចំនួន ៧ ប្រព័ន្ធ, ខេត្តបាត់ដំបងមានចំនួន ៨ ប្រព័ន្ធ និងខេត្តឧត្តរមានជ័យមានចំនួន ៨ ប្រព័ន្ធផងដែរ។
ក្រសួងធនធានទឹក និងឧតុនិយមបាននិងកំពុងតែកសាងនូវយុទ្ធសាស្ត្រ CPS ជាមួយនឹង ADB និងដៃគូអភិវឌ្ឍន៍នានា ដើម្បីឈានទៅធ្វើការអនុវត្តលើផ្ទៃប្រទេសពីឆ្នាំ ២០២២ ដល់ឆ្នាំ ២០២៥ ដែលធ្វើការធានាឱ្យបានល្អប្រសើរឡើងនូវសន្តិសុខទឹកជូនដល់គ្រប់វិស័យចាប់ពីអាងទន្លេ អាងទន្លេរងរបស់វា និងដល់ថ្នាក់ប្រព័ន្ធធារាសាស្ត្រគ្រប់ខ្នាតទាំងអស់។
ជាដំបូងក្រសួងធនធានទឹក និងឧតុនិយម ក្រសួងសេដ្ឋកិច្ច និងហិរញ្ញវត្ថុ MEF និង ADB នឹងប្រតិបត្តិការលើការងារគ្រប់គ្រងវិស័យធនធានទឹកដោយវិធានការចម្រុះក្នុងការបញ្ជាទឹក គ្រប់គ្រងទឹក និងប្រើប្រាស់ទឹក ដើម្បីទប់ទល់ឱ្យខាងតែបានលើបម្រែបម្រួលអាកាសធាតុ ការឡើងកម្តៅជាអតិបរមានៃភពផែនដី និងទប់ទល់នឹងគ្រោះធម្មជាតិគ្រប់ប្រភេទទាំងអស់៕