កំពង់ចាមៈ ក្រសួងអប់រំបានរៀបចំវគ្គបណ្ដុះបណ្ដាលស្ដីពី «ការអនុវត្តសាកល្បងកម្មវិធីសមមូលមធ្យមសិក្សាបឋមភូមិអប់រំក្រៅប្រព័ន្ធតាមប្រព័ន្ធអេឡិចត្រូនិក» ដើម្បីផ្តល់បទពិសោធក្នុងការរៀបចំមេរៀន និងបទពិសោធក្នុងការអនុវត្ដការរៀនពីចម្ងាយ។
វគ្គបណ្ដុះបណ្ដាលនេះក៏មានគោលបំណងផ្តល់ចំណេះដឹងក្នុងការដំឡើង និងប្រើប្រាស់កម្មវិធីមួយចំនួនដែលគាំទ្រដល់ប្រព័ន្ធនៃការគ្រប់គ្រងកម្មវិធីសិក្សាពីចម្ងាយ និងការសិក្សាតាមប្រព័ន្ធអេឡិចត្រូនិកសម្រាប់កម្មវិធីសមមូលមធ្យមសិក្សាបឋមភូមិអប់រំក្រៅប្រព័ន្ធ។
លោក ណុះ ស្លេះ រដ្ឋលេខាធិការក្រសួងអប់រំ យុវជន និងកីឡាថ្លែងក្នុងពិធីបើកវគ្គបណ្តុះបណ្តាលនេះនាថ្ងៃទី ២៩ ខែមេសា ថា សិក្ខាសាលានេះពិតជាមានសារៈសំខាន់បំផុតសម្រាប់ធ្វើការផ្សព្វផ្សាយឱ្យបានទូលំទូលាយដល់គ្រប់ភាគីពាក់ព័ន្ធ ដើម្បីរួមចំណែកជួយជ្រោមជ្រែងក្រសួងអប់រំ យុវជន និងកីឡា បន្តលើកកម្ពស់វិស័យអប់រំ និងអភិវឌ្ឍធនធានមនុស្សប្រកបដោយគុណភាព និងប្រសិទ្ធភាពខ្ពស់។
លោកថ្លែងថា៖ «ជាពិសេស ដើម្បីបណ្ដុះបណ្ដាលគ្រូកម្មវិធីសមមូលមធ្យមសិក្សាបឋមភូមិអប់រំក្រៅប្រព័ន្ធលើការបង្រៀនពីចម្ងាយ និងតាមប្រព័ន្ធអេឡិចត្រូនិក ឱ្យមានសមត្ថភាពគ្រប់គ្រាន់ក្នុងការបង្រៀនដល់ក្រុមមុខសញ្ញា ដូចជាកុមារជួបការលំបាក កុមារ និងយុវជននៅក្រៅសាលា និងជនពេញវ័យ»៕