.jpg)
រូបភាព គណៈកម្មាធិការជាតិរៀបចំការបោះឆ្នោត
ភ្នំពេញៈ គណៈកម្មាធិការជាតិរៀបចំការបោះឆ្នោតបានប្រកាសឱ្យដឹងនៅថ្ងៃទី ២៨ ខែមេសានេះថា គិតត្រឹមថ្ងៃទី ២៦ ខែមេសា ឆ្នាំ ២០២២ មានអ្នកសង្កេតការណ៍ សរុបចំនួន ២៧ ៩២៦ រូប ក្នុងនោះស្ត្រី សរុបចំនួន ១៦ ៦២២ រូបត្រូវបានអនុញ្ញាតឱ្យចូលរួមសង្កេតមើលដំណើរការបោះឆ្នោត ជ្រើសរើសក្រុមប្រឹក្សាឃុំ សង្កាត់ អាណត្តិទី ៥ ឆ្នាំ ២០២២។
អ្នកសង្កេតការណ៍ដែលបានដាក់ពាក្យស្នើសុំ និងអនុញ្ញាតទាំងនោះមកពីសមាគម និងអង្គការមិនមែនរដ្ឋាភិបាលជាតិចំនួន ៧។ ក្នុងនោះរួមមានសមាគមបញ្ញវន្ត និងយុវជនស្ម័គ្រចិត្តចំនួន ៤៦ រូប, សហភាពសហព័ន្ធយុវជនកម្ពុជាចំនួន ១៧ ២៦៦ រូប, គណៈកម្មាធិការដើម្បីការបោះឆ្នោតដោយសារី និងយុត្តិធម៌នៅកម្ពុជា (ខុមហ្វ្រែល) ចំនួន ២៦ រូប, សមាគមន៍នារីកម្ពុជា ដើម្បីសន្តិភាព និងអភិវឌ្ឍន៍ចំនួន ៩ ៨៣៥, អង្គការសុខភាពផ្លូវចិត្តបែបបុរាណ និងសម័យចំនួន ១៥ រូប, សមាគមមិត្តយើងចំនួន ២៧ រូប និងសមាគមសហព័ន្ធនិស្សិតបញ្ញាវ័ន្តប្រជាធិបតេយ្យកម្ពុជាចំនួន ៧១១ រូបផងដែរ។
គណៈកម្មាធិការជាតិរៀបចំការបោះឆ្នោតក៏បាននិងកំពុងតែពិនិត្យលើសំណើពីសមាគម និងអង្គការជាច្រើនទៀតផងដែរ។
ការដាក់ និងការទទួលពាក្យសុំចុះឈ្មោះអ្នកសង្កេតការណ៍ជាតិប្រព្រឹត្តទៅពីថ្ងៃទី ១៥ ខែកុម្ភៈ ដល់ថ្ងៃទី ២៥ ខែឧសភាឆ្នាំ ២០២២ នេះ។ គំរូពាក្យសុំចុះឈ្មោះសម្រាប់អ្នកសង្កេតការណ៍ជាតិផ្ដល់ជូនដោយឥតគិតថ្លៃ ឬអាចទាញយកពីគេហទំព័រ របស់ គ.ជ.ប www.nec.gov.kh/khmer/content/5270 និងត្រូវដាក់ពាក្យនៅទីស្តីការ គ.ជ.ប (ការិយាល័យ កិច្ចការគណបក្សនយោបាយ និងសមាគម និងអង្គការមិនមែនរដ្ឋាភិបាល ជាន់ទី ៩) រៀងរាល់ម៉ោងធ្វើការ ពេលព្រឹកពីម៉ោង ៧:០០ នាទី ដល់ ១១:៣០ នាទី និងពេលរសៀលពីម៉ោង ១៤:០០ នាទី ដល់ ១៧:៣០ នាទី៕
