រូបចម្លាក់ព្រះហិណ្ឌូ ក្រឺស្ណរៈគោវ៌ធន ដែលមានអាយុកាល ១ ៥០០ ឆ្នាំ និងវត្ថុបុរាណដទៃទៀតរបស់កម្ពុជានឹងត្រូវបានដាក់តាំងនៅសារមន្ទីរជាតិសិល្បៈអាស៊ាន Smithsonian ក្នុងទីក្រុង Washington ពីថ្ងៃទី ៣០ ខែមេសា ដល់ថ្ងៃទី ១៨ ខែកញ្ញា។
យោងតាមសេចក្តីប្រកាសព័ត៌មានរបស់ស្ថានទូតអាមេរិក នៅថ្ងៃទី ២៩ ខែមេសា នេះ បានឱ្យដឹងថា សារមន្ទីរជាតិសិល្បៈអាស៊ាន Smithsonian នឹងដាក់បង្ហាញរូបចម្លាក់ព្រះក្រឺស្ណរៈគោវ៌ធន ពីភ្នំដា ស្រុកអង្គរបូរីរបស់ប្រទេសកម្ពុជា ដែលជាលទ្ធផលនៃកិច្ចសហប្រតិបត្តិការជាយូរមកលើការអភិរក្សវប្បធម៌ រវាងសហរដ្ឋអាមេរិក និងប្រទេសកម្ពុជា។
ពិព័រណ៍នេះ មានឈ្មោះថា «បង្ហាញព្រះក្រឹស្ណរៈគោវ៌ធន៖ ដំណើរទៅកាន់ភ្នំដ៏ពិសិដ្ឋនៅកម្ពុជា» នឹងបង្ហាញ រូបចម្លាក់ព្រះសាសនាហិណ្ឌូ ដើម្បីការពារប្រជារាស្ត្រព្រះអង្គពីព្យុះភ្លៀងដែលបង្កើតឱ្យមានឡើងដោយព្រះមួយដែលមានការខឹងសម្បា។ កន្លងមក ពិព័រណ៍នេះត្រូវបានរៀបចំធ្វើនៅសាមន្ទីរសិល្បៈ Cleveland Museum of Arts។
លោក W. Patrick Murphy ឯកអគ្គរដ្ឋទូតសហរដ្ឋអាមេរិកប្រចាំព្រះរាជាណាចក្រកម្ពុជាបានលើកទឹកចិត្តឱ្យសាធារណជនទស្សនាពិព័រណ៍ពិសេសនេះ នៅក្នុងវីដេអូមួយ ដែលត្រូវបានបង្ហោះនៅក្នុងហ្វេសប៊ុករបស់ស្ថានទូតអាមេរិកនៅភ្នំពេញ។
លោកមានប្រសាសន៍ថា៖ «ខ្ញុំមានមោទនភាពចំពោះការខិតខំ និងកិច្ចសហប្រតិបត្តិការអស់រយៈពេលដ៏យូរមករបស់យើង ក្នុងការអភិរក្ស ជួសជុល និងបង្ហាញឱ្យឃើញពីបេតិកភណ្ឌដ៏អស្ចារ្យរបស់ប្រទេសកម្ពុជានៅទូទាំងសកលលោក»។
បើតាមសេចក្តីប្រកាសព័ត៌មាននេះចាប់តាំងពីឆ្នាំ ២០០១ មកសហរដ្ឋអាមេរិកបានផ្តល់ថវិកាចំនួនជាង ៥ លានដុល្លារដល់ប្រទេសកម្ពុជា សម្រាប់ការងារអភិរក្សវប្បធម៌ តាមរយៈមូលនិធិឯកអគ្គរដ្ឋទូតសម្រាប់ការអភិរក្សវប្បធម៌ និងថវិកាជំនួយឥតសំណងដទៃទៀត៕
វីដេអូ៖