.jpg)
តាកែវៈ រដ្ឋបាលខេត្តតាកែវបានប្រកាសចាប់ផ្តើមការបិទផ្សាយជាសាធារណៈនូវឯកសារនៃការវិនិច្ឆ័យនៅក្នុងភូមិចំនួន២ស្ថិតក្នុងឃុំបានកាម ស្រុកព្រៃកប្បាសក្នុងរយៈពេល១៥ថ្ងៃ ដោយគិតចាប់តាំងពីថ្ងៃសុក្រទី២៩ខែមេសានេះតទៅ ដើម្បីបញ្ជាក់ពីភាពត្រឹមត្រូវ។
រដ្ឋបាលខេត្តតាកែវបានជូនដំណឹងដល់អ្នកកាន់កាប់ដីស្រែចម្ការ និងដីលំនៅឋាន ឬ ដីសាងសង់ ព្រមទាំងគ្រប់មន្ទីរ អង្គភាព និងស្ថាប័ន ឬ ភ្នាក់ងារហិរញ្ញវត្ថុដែលមានពាក់ព័ន្ធនឹងក្បាលដីទាំងអស់នៅក្នុងតំបន់ធ្វើការវិនិច្ឆ័យនៃភូមិសំរោងម្រះ និងភូមិថ្នល់បត់ ឃុំបានកាមថា គណៈកម្មការរដ្ឋបាលធ្វើការបិទផ្សាយជាសាធារណៈនូវឯកសារនៃការវិនិច្ឆ័យដែលមានប្លង់សុរិយោដី និងបញ្ជីឈ្មោះអ្នកកាន់កាប់ដីដែលក្រុមប្រតិបត្តិ កម្មវិធីបានធ្វើការវាស់វែង និងប្រមូលទិន្នន័យកន្លងមក។
សាធារណជនជាអ្នកកាន់កាប់ដីស្រែ ចម្ការ និង ដីលំនៅឋាន ឬ ដីសាងសង់ ព្រមទាំងគ្រប់មន្ទីរ អង្គភាពនានាដែលមានការពាក់ព័ន្ធនឹងដីធ្លីក្នុងតំបន់វិនិច្ឆ័យខាងលើ សូមមេត្តាចូលរួមពិនិត្យលើទិន្នន័យដែលមាននៅក្នុងឯកសារនៃការវិនិច្ឆ័យ ដើម្បីបញ្ជាក់ពីភាពត្រឹមត្រូវ ឬ ខុសឆ្គងដែលត្រូវកែតម្រូវ ឬ ជំទាស់លើទិន្នន័យទាំងនោះក្នុងរយៈពេល ១៥ថ្ងៃ (ដោយរាប់បញ្ចូលទាំងថ្ងៃឈប់សម្រាក ) គឺគិតពីថ្ងៃទី២៩ ខែមេសា ឆ្នាំ២០២២ ដល់ថ្ងៃទី១៣ ខែឧសភា ឆ្នាំ២០២២ជាកំហិត។ ទីតាំងនៃការបិទផ្សាយគឺធ្វើឡើងនៅស្នាក់ការភូមិថ្នល់បត់។
រដ្ឋបាលខេត្តបានបញ្ជាក់ថា៖«ផុតរយៈពេលកំណត់ខាងលើ គណៈកម្មការរដ្ឋបាលសន្មតថា ទិន្នន័យដែលបើកចំហជូនពិនិត្យ ជាសាធារណៈនេះមានភាពត្រឹមត្រូវហើយមិនអាចជំទាស់ឬតវ៉ានៅពេលក្រោយទៀតបានឡើយ»។
ផុតរយៈពេលកំណត់នៃការបិទផ្សាយជាសាធារណៈនេះ គណៈកម្មការរដ្ឋបាលនឹងធ្វើការបូកសរុបហើយលើកសំណើផ្ដល់សិទ្ធិលើអចលនវត្ថុទៅអភិបាលខេត្ត ដើម្បីពិនិត្យ សម្រេច រួចបញ្ជូនរដ្ឋបាល សុរិយោដីចេញវិញ្ញាបនប័ត្រសម្គាល់ម្ចាស់អចលនវត្ថុ(ប័ណ្ណកម្មសិទ្ធិ) ជូនអ្នកកាន់កាប់ណាដែលបានបំពេញគ្រប់លក្ខណៈច្បាប់៕
វីដេអូ៖
