.jpg)
លោក អ៊ិត សំហេង រដ្ឋមន្ត្រីក្រសួងការងារ។ ក្រសួងការងារ និងបណ្តុះបណ្តាលវិជ្ជាជីវៈ
ភ្នំពេញៈ ក្រសួងការងារសន្យានឹងបន្តខិតខំលើកកម្ពស់លក្ខខណ្ឌការងារឱ្យកាន់តែប្រសើរឡើង ដោយពង្រឹងការអនុវត្តច្បាប់ស្តីពីការងារ និងបន្តពង្រឹងយន្តការអធិការកិច្ចការងារឱ្យកាន់តែមានប្រសិទ្ធភាព និងតម្លាភាព។
ក្នុងពិធីប្រារឰខួបនៃទិវាពលកម្មអន្ដរជាតិ ១ ឧសភា នាថ្ងៃទី ៣០ ខែមេសា លោក អ៊ិត សំហេង រដ្ឋមន្ត្រីក្រសួងការងារថ្លែងថា៖ «[ក្រសួងការងារនឹង] បន្តខិតខំលើកកម្ពស់លក្ខខណ្ឌការងារឱ្យកាន់តែប្រសើរឡើង ពង្រឹងការអនុវត្តច្បាប់ស្តីពីការងារ បន្តពង្រឹងយន្តការអធិការកិច្ចការងារឱ្យកាន់តែមានប្រសិទ្ធភាព និងតម្លាភាព»។
នៅចំពោះមុខតំណាងអង្គការអន្តរជាតិខាងការងារ (ILO) តំណាងសមាគមនិយោជក តំណាងសហជីព និងតំណាងក្រសួង ស្ថាប័នពាក់ព័ន្ធ រដ្ឋមន្ត្រីរូបនេះថ្លែងថា ក្រសួងការងារនឹងពង្រឹងភាពសុខដុមរមនានៃទំនាក់ទំនងវិជ្ជាជីវៈ លើកកម្ពស់ការយល់ដឹងអំពីសិទ្ធិ កាតព្វកិច្ច និងការទទួលខុសត្រូវស្របច្បាប់របស់កម្មករនិយោជិត និងនិយោជក។
ក្រសួងការងារក៏បានប្តេជ្ញាចិត្តជំរុញការអនុវត្តយន្តការអធិការកិច្ច និងធ្វើទំនើបកម្មការធ្វើអធិការកិច្ចការងារតាមប្រព័ន្ធទិន្នន័យព័ត៌មានវិទ្យា និងបន្តពង្រឹងការងារចុះអធិការកិច្ចអន្តរក្រសួង ស្ថាប័នដោយធ្វើអធិការកិច្ចការងារ និងកម្រិតហានិភ័យរបស់រោងចក្រ សហគ្រាសជាមូលដ្ឋានចំនួន ១ លើកក្នុង ១ ឆ្នាំ។
លោក អ៊ិត សំហេង បន្តថា ក្រសួងការងារនឹងបន្តពង្រឹងយន្តការដោះស្រាយវិវាទការងារឱ្យទទួលបានអត្រាសះជាឱ្យកាន់តែខ្ពស់ ដើម្បីឆ្លើយតបនឹងតម្រូវការភាគីវិវាទ និងដាក់ឱ្យដំណើរការសាកល្បងការដោះស្រាយវិវាទបុគ្គល ដោយក្រុមប្រឹក្សាអាជ្ញាកណ្តាល។
ក្រសួងការងារសន្យានឹងពង្រឹងការអនុវត្តសេរីភាពអង្គការវិជ្ជាជីវៈឱ្យបានត្រឹមត្រូវស្របតាមលិខិតបទដ្ឋានគតិយុត្តជាតិ និងអនុសញ្ញាអន្តរជាតិខាងការងារដែលកម្ពុជាបានផ្តល់សច្ចាប័ន៕
