កំពង់ចាមៈ ក្រសួងអប់រំនាថ្ងៃទី ២៩ ខែមេសា បានធ្វើការផ្សព្វផ្សាយ និងណែនាំនូវ «គេហទំព័រធនធានសិក្សាកម្ពុជា» ដល់គ្រូបង្រៀននៅបឋមសិក្សា-អនុវិទ្យាល័យទួលថ្ម ខេត្តកំពង់ចាម សម្រាប់ការទាញយកធនធានឯកសារទៅប្រើប្រាស់បម្រើដល់ការបង្រៀនឱ្យកាន់តែមានប្រសិទ្ធភាពសម្បូរបែបស្របតាមកំណែទម្រង់វិស័យអប់រំតាមបែបឌីជីថល។
គេហទំព័រនេះត្រូវបានអភិវឌ្ឍន៍ក្រោមគម្រោងអភិវឌ្ឍន៍វិស័យអប់រំមធ្យមសិក្សាទុតិយភូមិ (USESDP) ដើម្បីលើកកម្ពស់ការរៀន និងបង្រៀន ដែលមានផ្ទុកទៅដោយមាតិកាឌីជីថលដូចជា បទបង្ហាញ ករណីសិក្សា វីដេអូ និងសំឡេង មេរៀនសង្ខេប លំហាត់ សន្លឹកកិច្ចការ ឯកសារបង្រៀន សៀវភៅណែនាំ គោលការណ៍ប្រតិបត្តិ ឯកសារស្រាវជ្រាវ កិច្ចតែងការ ផ្ទាំងរូបភាព គំនូរជីវចលអប់រំ និងល្បែងសិក្សាជាដើម។
ក្រសួងអប់រំបញ្ជាក់តាមរយៈទំព័រហ្វេសប៊ុកនាថ្ងៃទី ២៩ ខែមេសា ថា គេហទំព័រនេះផ្តល់នូវធនធានអប់រំសម្បូរបែបពាក់ព័ន្ធនឹងការងារអប់រំ ដើរតួជាបណ្ណាល័យអេឡិចត្រូនិកសម្រាប់គ្រូបង្រៀន សិស្ស និស្សិត អ្នកសិក្សាស្រាវជ្រាវ សាធារណៈ។
ក្រសួងអប់រំបន្តថា គេហទំព័រនេះក៏នឹងជួយពង្រឹងសមត្ថភាពឌីជីថលគ្រូបង្រៀន ដែលអាចឱ្យអ្នកប្រើប្រាស់អាចស្វែងរកមាតិកា ឬស្នើចែករំលែកស្នាដៃស្រាវជ្រាវបន្តទៅអ្នកដទៃលើគេហទំព័រនេះ៕