.jpg)
រូបភាព អគ្គ.ការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ CCF
ភ្នំពេញៈ មន្ត្រីជំនាញនាថ្ងៃទី ២៩ ខែមេសា បន្តរកឃើញដេប៉ូប្រេងឥន្ធនៈចំនួន ៧ ទីតាំងបន្ថែមទៀតដែលរកស៊ីមិនសុចរិត និងបានបន្តចាត់វិធានការតាមនីតិវិធីលើម្ចាស់ដេប៉ូទាំងនេះ ក្រោយប្រតិបត្តិការចុះត្រួតពិនិត្យតាមស្ថានីយ និងដេប៉ូប្រេងឥន្ធនៈចំនួន ២១ ទីតាំងក្នុងខេត្តចំនួន ៤។
កាលពីថ្ងៃទី ២៩ ខែមេសា មន្ត្រីនៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) ប្រចាំសាខាខេត្តចំនួន ៤ គឺខេត្តកំពង់ធំ ខេត្តស្វាយរៀង ខេត្តកណ្ដាល និងខេត្តពោធិ៍សាត់ បានចុះប្រតិបត្តិការត្រួតពិនិត្យ ដើម្បីរកភាពអនុលោមនៅតាមស្ថានីយ និងដេប៉ូប្រេងឥន្ធនៈផ្សេងៗគ្នា។
ក.ប.ប បញ្ជាក់តាមរយៈហ្វេសប៊ុកនាថ្ងៃទី ៣០ ខែមេសាថា៖ «ដេប៉ូប្រេងឥន្ធនៈ ៧ ទីតាំងត្រូវបានមន្ត្រីជំនាញរកឃើញមិនមានអនុលោមភាពក្នុងប្រតិបត្តិការត្រួតពិនិត្យតាមស្ថានីយ និងដេប៉ូប្រេងឥន្ធនៈ។ ស្ថានីយ និងដេប៉ូប្រេងឥន្ធនៈដែលមន្ត្រីជំនាញបានត្រួតពិនិត្យសរុបចំនួន ២១ ទីតាំង និងចាត់វិធានការតាមនីតិវិធីលើម្ចាស់ដេប៉ូដែលមិនមានអនុលោមភាពផងដែរ»។
ប្រតិបត្តិការត្រួតពិនិត្យនេះគឺធ្វើឡើងដើម្បីការពារផលប្រយោជន៍អ្នកប្រើប្រាស់លើវិស័យប្រេងឥន្ធនៈ និងទប់ស្កាត់អំពើមិនសុចរិត៕
