ត្បូងឃ្មុំៈ ក្នុង​ពេល​ជួប​សំណេះសំណាល​ជាមួយ​ប្រជាពលរដ្ឋ ១ ៤០០ នាក់​ក្នុង​ឃុំ​រអាង ស្រុក​កំពង់សៀម ខេត្ត​ត្បូងឃ្មុំ នា​រសៀល​ថ្ងៃទី​ ៣០ ខែមេសា​នេះ លោក វេង សាខុន រដ្ឋមន្ត្រី​ក្រសួង​កសិកម្ម​រុក្ខាប្រមាញ់ និង​នេសាទ​បាន​ណែនាំ​ឱ្យ​បងប្អូន​ប្រជាពលរដ្ឋ ត្រូវ​ចាប់ផ្តើម​ស្តារ​សេដ្ឋកិច្ច​គ្រួសារ​យើង​ឡើងវិញ តាម​គ្រប់​រូបភាព​ដើម្បី​និរន្តរភាព​សន្តិសុខ​ស្បៀង​។

លោក វេង សាខុន ថ្លែងថា បន្ទាប់ពី​រយ:ពេល​ជាង ២ ​ឆ្នាំ​នៃ​ការអាក់ខាន​មិនបាន​រៀបចំ​ពិធី​សំណេះសំណាល​ដ៏មហោឡារិក រហូត​មកដល់​ថ្ងៃនេះ​មាន​សមាជិក​សមាជិកា​អញ្ជើញ​ចូលរួម​ដល់ ទៅ ១ ៤០០ ​នាក់ ដែល​រូបភាព​នេះ បានបង្ហាញ​ឱ្យឃើញ​ថា​សកម្មភាព​សង្គម សេដ្ឋកិច្ច និង​ជាពិសេស​ការជួបជុំ​ជា​លក្ខណ:​មហាគ្រួសារ​នេះ​បាន​ចាប់ផ្តើម​ត្រឡប់​ទៅរក​ប្រក្រតីភាព​ដូច​មុន​វិបត្តិ​ជំងឺឆ្លង​កូវីដ​ ១៩ វិញ​។

លោក​បាន​គូសបញ្ជាក់ថា លោកនាយក​រដ្ឋមន្ត្រី​ ហ៊ុន សែន បាន​ខិតខំ​រិះរក​គ្រប់​មធ្យោបាយ​ស្វះស្វែងរក​ទាំង​ជំនួយ​ឧបត្ថម្ភ និង​ចំណាយធនធាន​ជាតិ និង​កៀរគរ​ជំនួយ​ពី​គ្រប់​មជ្ឈដ្ឋាន​ ដើម្បី​ជាវ​វ៉ាក់សាំង​ការពារ​ជំងឺឆ្លង​កូវីដ ១៩ មកចាក់​ស្រោច​ជូន​បងប្អូន​ប្រជាពលរដ្ឋ​បាន​គ្រប់ៗ​គ្នា និង​គ្រប់​វ័យ​ធ្វើឱ្យ​ការគ្រប់គ្រង​ស្ថានភាព​នៃ​ការរីករាលដាល​ជំងឺ​នេះ​បានល្អ​ប្រសើរ ទើប​ឈានទៅ​អនុញ្ញាតឱ្យ​បើក​ដំណើរការ​នូវ​រាល់​សកម្មភាព​សង្គម​ស្របតាម​គន្លង​ប្រក្រតីភាព​ថ្មី​ឡើងវិញ​។

លោក​រដ្ឋមន្ត្រី​ក្រសួង​កសិកម្ម​បាន​ប្រាប់​ទៅ​ប្រជាពលរដ្ឋ​ឱ្យ​ខិតខំ​យកចិត្ត​ទុកដាក់​ថែរក្សា ការពារ​សុខភាព​ឱ្យបាន​ល្អ តាមរយ:​ការរស់នៅ​ស្អាត ផឹក​ស្អាត និង​ហូប​អាហារ​មាន​អនាម័យ​ល្អ​។ ចូលរួម​អនុវត្ត​គោលនយោបាយ​ភូមិ ឃុំ​មាន​សុវត្ថិភាព និង​ត្រូវ​ធ្វើការ​ស្តារ​សេដ្ឋកិច្ច​គ្រួសារ​ឡើងវិញ​តាម​ដែល​អាចធ្វើ​ទៅបាន ព្រមទាំង​លើកទឹកចិត្ត​ឱ្យ​អ្នកជំនាន់​ក្រោយ​ទៅ​រៀន​ឱ្យបាន​ទៀងទាត់​ផងដែរ​។

លោក​ថ្លែងថា​៖ «​សូមឱ្យ​បងប្អូន​ត្រូវ​ចាប់ផ្តើម​ស្តារ​សេដ្ឋកិច្ច​គ្រួសារ​យើង​ឡើងវិញ តាម​គ្រប់​រូបភាព​ដើម្បី​និរន្តរភាព​សន្តិសុខ​ស្បៀង​។ មិនតែប៉ុណ្ណោះ ក៏ត្រូវ​លើកទឹកចិត្ត​ឱ្យ​កូនចៅ​ទៅ​សិក្សា​បាន​ទៀងទាត់​តាម​កម្មវិធី​សាលា​ ដើម្បី​អនាគត​របស់​ពួកគេ​»​។

ដោយឡែក​សមាជិក​ក្រុមការងារ និង​អាជ្ញាធរ​ស្រុក ឃុំ ត្រូវ​បង្កើន​ការយកចិត្ត​ទុកដាក់​ត្រៀម​រៀបចំ​យុទ្ធនាការ​ឃោសនា​បោះឆ្នោត​ជ្រើសរើស​ក្រុមប្រឹក្សាឃុំ សង្កត់ ដែល​នឹង​រៀបចំ​នៅ​ថ្ងៃទី​ ៥ ខែមិថុនា​ខាងមុខ​ឱ្យបាន​ល្អប្រសើរ​។ បងប្អូន​ប្រជាពលរដ្ឋ​ដែល​គ្រប់​អាយុ​បោះឆ្នោត​កុំ​ភ្លេច​អញ្ជើញ​ទៅប្រើ​សិទ្ធិ​របស់ខ្លួន​ក្នុង​ការ​ចូលរួម​បោះឆ្នោត​បាន​គ្រប់ៗ​គ្នា​។ នេះ​បើតាម​ការបន្ថែម​របស់​លោក វេង សាខុន​៕