ភ្នំពេញៈ អាជ្ញាធរខណ្ឌ៧មករា នៃសាលារាជធានីភ្នំពេញ បន្តចុះផ្សព្វផ្សាយអប់រំនិងណែនាំដល់ពលរដ្ឋមួយចំនួនឱ្យបញ្ឈប់ការយកចំណីផ្លូវធ្វើជាកន្លែងលក់ដូរ ដើម្បីរៀបចំសណ្តាប់ធ្នាប់ ក៏ដូចជារំដោះចិញ្ចើមផ្លូវ ទុកសម្រាប់កន្លែងថ្មើរជើងឱ្យមានរបៀបត្រឹមត្រូវ។
អភិបាលរងខណ្ឌ៧មករា លោកតោ វីរូ កាលពីថ្ងៃទី៣០ មេសា បានដឹកនាំកម្លាំងគណៈបញ្ជាការឯកភាពរដ្ឋបាលខណ្ឌ ដោយមានការចូលរួមពីលោកទឹម វុទ្ធី អធិការរងទទួលផែនសណ្ដាប់ធ្នាប់ នៃអធិការដ្ឋាននគរបាលខណ្ឌ៧មករា លោកប្រាក់ ហាក់ ប្រធានសណ្ដាប់ធ្នាប់ខណ្ឌ៧មករា បានចុះរៀបចំសណ្ដាប់ធ្នាប់ និងលាងសម្អាតផ្លូវ នៅតំបន់បុរីកីឡា តាមបណ្ដោយផ្លូវលេខ២១១ ស្ថិតក្នុងភូមិ១២ សង្កាត់វាល់វង់ ខណ្ឌ៧មករា។
លោកតោ វីរូ ប្រាប់ភ្នំពេញប៉ុស្តិ៍ថា ការចុះរៀបចំសណ្តាប់នោះ ដោយសារសង្កេតឃើញពលរដ្ឋមួយចំនួនបានយកចំណីផ្លូវលើសលប់សម្រាប់ធ្វើជាអាជីវកម្មដាក់លក់ដូរ ដែលធ្វើឱ្យបាត់បង់កន្លែងថ្មើរជើងសម្រាប់សាធារណៈ។
លោកថា៖«យើងណែនាំឱ្យគាត់កុំឱ្យយកចំណីផ្លូវសម្រាប់ធ្វើអាជីវកម្ម ទុកចំណីផ្លូវ១ភាគ៣ស្មើៗគ្នា។ ព្រោះផ្ទះខ្លះ ដាក់រទេះ គ្រែ លើចិញ្ចឹមផ្លូវតែម្តង ជួនកាលគាត់ដាក់គ្រែ និងសម្រាកនៅលើផ្លូវនោះ។ គាត់បត់ជើងផង នាំឱ្យខូចសណ្តាប់ធ្នាប់ ធំក្លិនមិនល្អ»។
លោកបន្តថា ក្រៅពីចុះណែនាំ អាជ្ញាធរក៏បានរៀបចំបោសសម្អាតផ្លូវ និងប្រមូលសំរាមផងដែរ ដោយសារនៅម្តុំនោះ អ្នកលក់ដូរមិនបានរៀបចំឱ្យមានអនាម័យឡើយ។ ទោះយ៉ាងណា លោកឱ្យដឹងថា ក្រោយពីធ្វើការអប់រំ និងណែនាំរួចមក ប្រជាពលរដ្ឋបានយល់ដឹងនិងបានចូលរួមអនុវត្តរើរទេះលក់ដូរ និងគ្រែផងដែរ។
លោកថ្លែងថា៖«មុននឹងចុះរៀបចំនេះ យើងបានជូនដំណឹងជាលក្ខណៈច្បាប់ត្រឹមត្រូវ ហើយពេលយើងចុះអនុវត្តគាត់ក៏មិនរឹងទទឺងដែរ។ គាត់បានរៀបចំតាមការស្នើរបស់យើងឱ្យទុកចិញ្ចើមផ្លូវ គ្មានអ្នកជំទាស់ទេ»។
លោកតោ វីរូ បញ្ជាក់ សម្រាប់កម្លាំងគណៈបញ្ជាការឯកភាពខណ្ឌ៧មករា នៅបន្តចុះរៀបចំរំដោះចិញ្ចើមផ្លូវនៅទីតាំងផ្សេងៗទៀតក្នុងដែនសមត្ថកិច្ចរបស់ខ្លួន ដើម្បីរំដោះចិញ្ចឹមផ្លូវ សម្រាប់បម្រើឱ្យប្រយោជន៍សាធារណៈ និងមានកន្លែងថ្មើរជើងជាដើម។
ពាក់ព័ន្ធនឹងការលើកឡើងថា ពលរដ្ឋអាចដាក់លក់់នៅលើចិញ្ចើមផ្លូវបានដោយសារផ្តល់លុយទៅឱ្យអាជ្ញាធរនោះ លោកតោ វីរូ ថ្លែងថា៖«សម្រាប់ខ្ញុំ អនុវត្តដោយច្បាប់ជាធរមាន ពុំមានយកលុយជាថ្នូរនឹងការដាក់លក់នៅតាមចិញ្ចើមផ្លូវនោះទេ»។
ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ លោកវន់ ពៅ គាំទ្រឱ្យមានការរៀបចំសណ្តាប់ធ្នាប់នៅតាមចិញ្ចើមផ្លូវ ប៉ុន្តែថា ការរៀបចំនោះត្រូវធ្វើឡើងប្រកបដោយការទទួលខុសត្រូវ។ បើពុំនោះទេ លទ្ធផលនឹងដូចវែកចក ពោលដេញហើយមកវិញ។
លោកថ្លែងថា៖«ការធ្វើសណ្តាប់ធ្នាប់ដេញអ្នកលក់ដូរនៅតាមដងផ្លូវនេះ ដូចវែកចកអ៊ីចឹង។ ដេញហើយមកវិញ ដោយសារប្រជាពលរដ្ឋគាត់អត់មានមុខរបរអីក្រៅពីការលក់ដូរទេ។ អ៊ីចឹងហើយបានខ្ញុំថា ការរៀបចំសណ្តាប់ធ្នាប់ត្រូវគិតអំពីការទទួលខុសត្រូវ គឺរៀបចំកន្លែងលក់ដូរថ្មីសមរម្យ។ ប៉ុន្តែបើដេញហើយអត់មានដំណោះស្រាយ គឺទទួលបានលទ្ធផលដូចសព្វថ្ងៃអ៊ីចឹង»។
លោកបន្តថា ចំណែកការរៀបចំសណ្តាប់ធ្នាប់រុះរើសំយាបផ្ទះដែលតចេញមកផ្លូវលក់ដូរនៅមុខផ្ទះលើចិញ្ចើមផ្លូវ ឬកាត់ស្លាកយីហោ ដែលលយមកមុខហួសហេតុ គឺជាការរៀបចំសណ្តាប់ធ្នាប់ត្រឹមត្រូវ។ ព្រោះទង្វើនោះ ពិតជាបាត់បង់សណ្តាប់ធ្នាប់ក្រុងមែន។ រដ្ឋ ឬសាលារាជធានីភ្នំពេញ គួររៀបចំកន្លែងសមរម្យណាមួយ ដើម្បីឱ្យពលរដ្ឋអាចលក់ដូរផង និងមានកន្លែងថ្មើរជើងផង ដោយលោកថា ចិញើមផ្លូវខ្លះនៅរាជធានីភ្នំពេញធំទូលាយ។
លោកថា៖«ចិញ្ចើមផ្លូវណាទូលាយ គួរតែពុះចិញ្ចើមផ្លូវបែងចែកជា២ដូចនៅថៃ ឬឡាវ គេដាក់របងសុវត្ថិភាពត្រឹមជង្គង់។ គេកំណត់អ្នកលក់ដូរនៅតាមដងផ្លូវត្រឹមព្រំដែនណាមួយ ហើយមានកន្លែងថ្មើរជើងទៀត។ ចិញ្ចើមផ្លូវខ្លះព័ទ្ធរបងទុកចោល ប៉ុន្តែធ្វើឱ្យមានភាពរញ៉េរញ៉ៃវិញ។ ចុះបើសិនយកការ៉ូឡាទំនេររៀបចំធ្វើរបងព្រំមួយឱ្យលក់ដូរត្រឹមកម្រិតណា ហើយចំណីផ្លូវមួយចំហៀងទៀត ទុកឱ្យអ្នកថ្មើរជើង គឺជារឿងមួយប្រកបដោយសណ្តាប់ធ្នាប់ និងទទួលការសាទរពីសំណាក់ប្រជាពលរដ្ឋ ហើយមានសោភណ្ឌភាពល្អទៀត»។
សូមជម្រាបថា រដ្ឋបាលរាជធានីភ្នំពេញ កាលពីខែធ្នូ ឆ្នាំ២០១៨ បានចេញសេចក្តីណែនាំដល់អាជ្ញាធរខណ្ឌក្នុងដែនសមត្ថកិច្ចរបស់ខ្លួន ត្រូវរៀបចំសណ្តាប់ធ្នាប់នៅតាមដងផ្លូវ និងការប្រើប្រាស់ចិញ្ចើមផ្លូវសាធារណៈទាំងអស់ក្នុងភូមិសាស្រ្តរាជធានីភ្នំពេញ។
សេចក្តីណែនាំបញ្ជាក់ថា៖«ក្នុងករណីបងប្អូនប្រជាពលរដ្ឋ ម្ចាស់លំនៅឋាន ម្ចាស់អាជីវកម្មដ្ឋាន ម្ចាស់ការដ្ឋាន អ្នកគ្រប់គ្រងមន្ទីរពេទ្យ គ្រឹះស្ថានអប់រំ-អគារសាធារណៈ វិស័យឯកជន និងអ្នកប្រើប្រាស់ផ្លូវថ្នល់ទាំងឡាយណា មិនចូលរួមអនុវត្តតាម គណៈបញ្ជាការឯកភាពរដ្ឋបាលខណ្ឌទាំង១២ និងមន្ទីរ-អង្គភាពជំនាញពាក់ព័ន្ធ ត្រូវចាត់វិធានការរដ្ឋបាល រួមមាន បិទអាជីវកម្ម ផ្អាកការដ្ឋាន ដកហូតសម្ភារ រុះរើសំណង់»៕