.jpg)
សមត្ថកិច្ចចងខ្សែព័ទ្ធនៅទីតាំងដែលជនរងគ្រោះ ត្រូវបានគេបាញ់សម្លាប់ នៅយប់រំលងអាធ្រាត្រ ឈានចូលថ្ងៃទី១ខែឧសភា។ រូបថត នគរបាល
ព្រះសីហនុៈនគរបាលព្រហ្មទណ្ឌខេត្តព្រះសីហនុ បានស៊ើបអង្កេតឃាត់ខ្លួន មន្ត្រីអាវុធហត្ថខេត្តនេះ ២នាក់ នៅព្រឹកថ្ងៃទី១ឧសភា បន្ទាប់ពីបង្កហេតុបានប៉ុន្មានម៉ោង ពាក់ព័ន្ធករណីបាញ់បុរសម្នាក់ស្លាប់ កាលពីម៉ោងជាង១រំលងអាធ្រាត្រ ឈានចូលថ្ងៃទី១ឧសភា នៅជិតរង្វង់មូលតោ២ក្នុងសង្កាត់លេខ៤ក្រុង-ខេត្ត ព្រះសីហនុ។
លោក ជួន ណារិន្ទ ស្នងការនគរបាល ខេត្ត ព្រះសីហនុ ឱ្យភ្នំពេញប៉ុស្តិ៍ដឹងនៅថ្ងៃទី១ឧសភា ថា កម្លាំងសមត្ថកិច្ចរបស់លោក បានស្រាវជ្រាវឃាត់ខ្លួនជនសង្ស័យ ក្នុងអំពើបាញ់សម្លាប់នេះបាន២នាក់ ដែលការឃាត់ខ្លួននេះធ្វើឡើងបន្ទាប់ពីមានការបាញ់ប្រហារបណ្តាលឱ្យបុរសម្នាក់ស្លាប់ នៅវេលាម៉ោងជាង១រំលងអាធ្រាត្រឈានចូលថ្ងៃទី១ឧសភា ដែលកើតហេតុនៅក្បែររង្វង់មូលតោ២ ក្នុងភូមិសាស្ត្រសង្កាត់លេខ៤ ។
លោកថ្លែងថា៖« មានករណីបាញ់ប្រហារមួយ រវាងជនជាតិខ្មែរ លើជនជាតិខ្មែរ ប៉ុន្តែខ្ញុំបានបង្ក្រាបបានហើយនៅពេលជិតភ្លឺថ្ងៃនេះ(ថ្ងៃទី១ឧសភា)។ រឿងហេតុនេះ មកពីស្រវឹងផង បណ្តាលឱ្យទំនាស់ពាក្យសម្តីខឹងមើលមុខគ្នាផង»។
លោក ណុប បញ្ញា ស្នងការរងទទួលផែនការងារនគរបាលព្រហ្មទណ្ឌ នៃស្នងការដ្ឋាននគរបាល ខេត្ត ព្រះសីហនុ ប្រាប់នៅថ្ងៃទី១ឧសភា ថា ជនរងគ្រោះស្លាប់ឈ្មោះ ចាន់ បូរ៉ាន់ ភេទ ប្រុស អាយុ ១៩ឆ្នាំជាកម្មករជាងភ្លើង។
ចំណែកជនសង្ស័យ២នាក់ជាមន្ត្រីកងរាជអាវុធហត្ថខេត្ត ព្រះសីហនុ ហើយត្រូវសង្ស័យទាំង២នាក់នោះ ត្រូវបានចាប់ឃាត់ខ្លួនប្រគល់ឱ្យទៅកងរាជអាវុធហត្ថ ខេត្ត ព្រះសីហនុហើយ។
លោកប្រាប់ថា៖«ករណីនេះ សមត្ថកិច្ចរបស់យើង ជាអ្នកស្រាវជ្រាវឃាត់ខ្លួនពួកគេ ប៉ុន្តែដោយសារជនសង្ស័យជាមន្ត្រីកងរាជអាវុធហត្ថ ទើបខាងសមត្ថកិច្ចយើង ប្រគល់ពួកគេ ទៅឱ្យអង្គភាពគាត់ចាត់ការបន្ត»។
លោកស្នងការរង ណុប បញ្ញា មិនបានប្រាប់លម្អិត អំពីហេតុការណ៍នេះទេ តែយ៉ាងណាមន្ត្រីនគរបាលក្រុង ព្រះសីហនុ មួយរូប ស្នើសុំមិនឱ្យបញ្ចេញឈ្មោះ បានឱ្យដឹងដោយផ្អែកតាមសាក្សីនៅកន្លែងកើតហេតុ ថា កាលពីវេលាម៉ោងជាង១រំលងអាធ្រាត្រ ឈានចូលថ្ងៃទី១ឧសភា មានមនុស្ស២ក្រុម បានធ្វើដំណើរដោយម៉ូតូដូចគ្នា។
ដោយខាងជនរងគ្រោះមានគ្នា៣នាក់ រីឯភាគីខាងជនសង្ស័យ មានគ្នា២នាក់ ម្នាក់ឈ្មោះ ជិន រដ្ឋា និងឈ្មោះ អំ ឆេកូ បានមកផឹកស៊ី នៅក្បែររង្វង់មូលតោ២។
មន្ត្រីនគរបាលដដែលបន្តថា នៅពេលផឹកស៊ីនោះ ពួកគេទាំងសងខាង ហាក់មានសភាពស្រវឹងហើយបានមើលមុខគ្នាទៅវិញទៅមក ក៏កើតមានជាជម្លោះពាក្យសម្តីគ្នា ហើយជនសង្ស័យម្នាក់ឈ្មោះ អំ ឆេកូ ក្នុងចំណោម២នាក់ បានបានដកកាំភ្លើងខ្លីពីចង្កេះ បាញ់សំដៅលើជនរងគ្រោះឈ្មោះចាន់ បូរ៉ាន់ ចំក្តោងច្រមុះធ្លាយទៅក្រោយបណ្តាលឱ្យស្លាប់នៅកន្លែងកើតហេតុ។
ភ្លាមៗនោះ កម្លាំងសមត្ថកិច្ច បានទូរស័ព្ទហៅ រថយន្តសង្គ្រោះបន្ទាន់របស់មន្ទីរពេទ្យបង្អែកខេត្ត ព្រះសីហនុ អតីតមន្ទីរពេទ្យចំការចេក ឱ្យដឹកសាកសពជនរងគ្រោះទៅមន្ទីរពេទ្យដើម្បីយកសពតម្កល់ទុកនៅកន្លែងតម្កល់សពសិនរង់ចាំក្រុមគ្រួសារមកយក។
បើតាមលោកគ្រូពេទ្យមួយរូប ដែលស្នើសុំមិនប្រាប់ឈ្មោះ នៃមន្ទីរពេទ្យបង្អែកខេត្តព្រះសីហនុបានប្រាប់ភ្នំពេញប៉ុស្តិ៍នៅថ្ងៃទី១ឧសភា ថា សាកសពជនរងគ្រោះ ត្រូវបានសាច់ញាតិមកទទួលយក ទៅធ្វើបុណ្យនៅក្រុងបូកគោខេត្តកំពតហើយ កាលពីវេលាថ្ងៃត្រង់ថ្ងៃទី១ឧសភា។
ជនរងគ្រោះត្រូវគ្រាប់កាំភ្លើងត្រង់ក្តោងច្រមុះចំនួន១គ្រាប់ធ្លាយទៅចំខួរតូចផ្នែកខាងក្រោយក្បាល ទើបបណ្តាលឱ្យជនរងគ្រោះស្លាប់ភ្លាមៗ៕
វីដេអូ៖
