.jpg)
បំណែករោងសាលារៀនដែលត្រូវខ្យល់បក់បោករលំ ក្នុងស្រុកបន្ទាយមាស ខេត្តកំពត កាលពីចុងសប្ដាហ៍មុន។ រូបថត FB
បន្ទាយមានជ័យនិងកំពតៈ ភ្លៀងលាយឡំខ្យល់កន្ត្រាក់ និង ផ្គររន្ទះពីថ្ងៃជាប់គ្នានាចុងសប្ដាហ៍មុននេះ បានបង្កការខូចខាតផ្ទះប្រជាពលរដ្ឋសរុបជាង១៥០ខ្នង នៅក្នុងខេត្តចំនួន២ គឺខេត្តបន្ទាយមានជ័យ និងខេត្តកំពត។ ករណីនេះបានបណ្ដាលឲ្យមានជនរងគ្រោះម្នាក់ស្លាប់ និង៧នាក់ទៀតរងរបួស ព្រមទាំងងាប់សត្វគោចំនួន២ក្បាលផងដែរ។ នេះបើតាមការប្រាប់ឲ្យដឹងពីអាជ្ញាធរមូលដ្ឋាននៃខេត្តទាំង២។
លោក ស្វាយ ជា អភិបាលស្រុកម៉ាឡៃ បានប្រាប់ភ្នំពេញប៉ុស្តិ៍នៅថ្ងៃអាទិត្យថា ភ្លៀងលាយឡំខ្យល់កន្ត្រាក់ និង ផ្គររន្ទះ កាលពីថ្ងៃទី២៨ និង ថ្ងៃទី២៩ ខែមេសា កន្លងមកនេះ បានបង្កការខូចខាតផ្ទះប្រជាពលរដ្ឋសរុប ១១០ខ្នង នៅក្នុងភូមិចំនួន៣នៃឃុំពង្រ រួមមានភូមិទួលពង្រខូចខាតផ្ទះចំនួន៥១ខ្នង ក្នុងនោះខូចខាតធ្ងន់ចំនួន១១ខ្នង, ភូមិតាគង់ ខូចខាតផ្ទះចំនួន៤ខ្នង ក្នុងនោះខូចខាតធ្ងន់ធ្ងរចំនួន១ខ្នង និងភូមិបឹងជង្រុកតេជោឈ្នះ-ឈ្នះ ខូចខាតផ្ទះចំនួន ៥៥ខ្នង។ប៉ុន្តែមិនបង្កឲ្យអ្នកភូមិណាម្នាក់រងរបួសឬស្លាប់នៅក្នុងករណីនេះទេ។
លោកបានបញ្ជាក់ថា៖«បច្ចុប្បន្ន អាជ្ញាធរយើង បានដាក់កម្លាំងប្រមាណជាង២០០នាក់ ដើម្បីជួយអន្តរាគមន៍ជួសជុលផ្ទះឡើងវិញជូនប្រជាពលរដ្ឋរងគ្រោះឡើងវិញ និងបានជួយឧបត្ថម្ភស្បៀងអាហារសង្គ្រោះបន្ទាន់រួមមាន អង្ករ២៥ ទឹកត្រីមួយយួរ ទឹកស៊ីអ៊ីវមួយយួរនិងទឹកសុទ្ធមួយធុង១៥លីត្រ ដើម្បីចូលរួមចំណែកជួយទ្រទ្រង់ដល់ជីវភាពរស់នៅរបស់ពួកគាត់ក្នុងគ្រាដែលកំពុងជួបការលំបាកនេះផងដែរ»។
ចំណែក លោក សួន សុផុន សមាជិកក្រុមប្រឹក្សាឃុំភ្នំលៀប នៃស្រុកព្រះនេត្រព្រះ បានប្រាប់ភ្នំពេញប៉ុស្តិ៍ថា កាលពីថ្ងៃទី២៨ ខែមេសា មានករណីភ្លៀងលាយឡំខ្យល់កន្ត្រាក់និងផ្គរន្ទះកើតឡើង នៅក្នុងភូមិសាស្ត្រឃុំភ្នំលៀប បានបណ្ដាលឲ្យស្ត្រីម្នាក់ស្លាប់ និង ខូចខាតផ្ទះប្រជាពលរដ្ឋចំនួន៣ខ្នង។
លោកបានថ្លែងថា៖«ជនរងគ្រោះឈ្មោះ ផល ភ័ណ្ឌ អាយុ៤៧ឆ្នាំ រស់នៅភូមិកំពង់ក្រសាំង ឃុំភ្នំលៀបស្រុកព្រះនេត្រព្រះ ខេត្តបន្ទាយមានជ័យ ត្រូវបានរន្ទះបាញ់ស្លាប់ ខណៈគាត់កំពុងងូតនិងត្រងទឹកភ្លៀងទុកសម្រាប់ប្រើប្រាស់»។
រីឯលោក ជុំ សារឿន នាយករដ្ឋបាលស្រុកបន្ទាយមាស ខេត្តកំពត បានប្រាប់ភ្នំពេញប៉ុស្តិ៍ថា ភ្លៀងលាយឡំខ្យល់កន្ត្រាក់កាលពីថ្ងៃ២៨ ខែមេសា បានបណ្ដាលឲ្យខូចខាតផ្ទះប្រជាពលរដ្ឋ សរុបចំនួន ៤១ខ្នង និង បង្កឲ្យបុរសម្នាក់រងរបួស និងសិស្សសាលា៦នាក់ទៀតសន្លប់បាត់ស្មារតី ដោយការភ័យខ្លាចខ្យល់កន្ត្រាក់ និង សំឡេងផ្គររន្ទះបន្ទាប់ពីដំបូលសាលារៀនរបស់ពួកគេ ត្រូវបានខ្យល់កន្ត្រាក់ វាយឲ្យប៉ើងរបើក។
លោកថ្លែងថា៖«វាពិតជាគួរឲ្យខ្លាចផងដែរចំពោះហេតុការណ៍នៅថ្ងៃនោះ ព្រោះភ្លៀងក៏ខ្លាំង ខ្យល់បក់កខ្លាំង ថែមទាំងមានសំឡេងផ្គររន្ទះខ្លាំងកើតឡើងព្រមជាមួយគ្នា។ ផ្ទះប្រជាពលរដ្ឋជាច្រើនខ្នងបានដួលបាក់រលំ សង្កត់បុរសម្នាក់រងរបួសធ្ងន់ ចំណែក ក្មេងៗសិស្សសាលាអនុវិទ្យាល័យជ្រុងស្រឡៅ ភ័យសន្លប់ ៦នាក់ព្រោះ ខ្យល់កន្ត្រាក់បានបក់បោក បណ្ដាលឲ្យ ប៉ើងរបើកដំបូលសាលារៀនរបស់ពួកគេ ដែលកំពុងតែអង្គុយរៀនក្នុងថ្នាក់រៀន ហើយថែមទាំងមានផ្គររន្ទះកើតឡើងខ្លាំងៗ»។
ករណីខ្យល់កន្ត្រាក់ដែលបានកើតឡើងនៅក្នុងខេត្តទាំង២នេះ បានធ្វើឲ្យតួលេខខ្នងផ្ទះប្រជាពលរដ្ឋ ដែលរងការខូចខាតសរុបនៅទូទាំងប្រទេស គិតចាប់ពីដើមខែមករា ដល់បំណាច់ខែមេសា ឆ្នាំ២០២២នេះ កើនដល់ចំនួន១៩៩៥ខ្នង ក្នុងនោះ ៣៧០ខ្នងបានដួលរលំខូចខាតទាំងស្រុង និង បានបណ្ដាលឲ្យមានជនរងគ្រោះចំនួន២នាក់ស្លាប់ និង រងរបួ ស២៣នាក់។
ស្រដៀងគ្នានេះ តួលេខនៃជនរងគ្រោះដែលបានស្លាប់ក្នុងករណីរន្ទះបាញ់ នៅទូទាំងប្រទេស បានកើនដល់ចំនួន១០នាក់ និង រងរបួសចំនួន៩នាក់ ព្រមទាំងងាប់គោ ក្របីសរុប២៥ក្បាល។ នេះបើយោងតាមទិន្នន័យ ដែលភ្នំពេញប៉ុស្តិ៍ទទួលបានពីគណៈកម្មាធិការជាតិគ្រប់គ្រងគ្រោះមហន្តរាយ និង ពីអាជ្ញាធរមូលដ្ឋាន កាលពីរសៀលថ្ងៃទី១ ខែឧសភា ឆ្នាំ២០២២។
ទិន្នន័យពីគណៈកម្មាធិការជាតិគ្រប់គ្រងគ្រោះមហន្តរាយក្នុងរយៈពេល៤ខែឆ្នាំ២០២២ គិតត្រឹមពីដើមខែមករា ដល់ថ្ងៃទី២៥ ខែមេសា ឆ្នាំ២០២២ ករណីខ្យល់កន្ត្រាក់ បានបង្ករការខូចខាតផ្ទះប្រជាពលរដ្ឋនៅទូទាំងប្រទេសសរុបត្រឹមចំនួន១៨៤១ខ្នង ក្នុងនោះផ្ទះចំនួន ៣៥៨ ខ្នងបានដួលរលំខូខាតទាំងស្រុង ព្រមទាំងបណ្ដាលឲ្យមនុស្ស ២នាក់ស្លាប់ និងរងរបួស ១៦នាក់។ ខណៈករណីរន្ទះបាញ់បានបណ្ដាលឲ្យមនុស្សចំនួន៩នាក់ស្លាប់ និង៩នាក់ទៀតរងរបួស ខូចខាតផ្ទះ១១ខ្នង និងងាប់គោក្របី២៣ក្បាល។
តាមការញ្ជាក់បន្ថែមពី លោក កែវ វី ទីប្រឹក្សាជាន់ខ្ពស់នៃគណៈកម្មាធិការជាតិគ្រប់គ្រងគ្រោះមហន្តរាយ ទិន្នន័យការប៉ះពាល់និងខូចខាតដោយគ្រោះមហន្តរាយ ក្នុងរយៈពេល៤ខែ ឆ្នាំ២០២២នេះ គឺជាទិន្នន័យដែលគិតត្រឹមពីដើមខែមករា ដល់ថ្ងៃទី២៥ ខែមេសា ឆ្នាំ២០២២ប៉ុណ្ណោះ ដោយមិនទាន់បានបូកបញ្ចូលនូវករណី ដែលបានកើតឡើងនៅក្នុងខេត្ត បន្ទាយមានជ័យ និង ខេត្តកំពត កាលពីថ្ងៃទី២៨ និង ថ្ងៃទី២៩ ខែមេសាឆ្នាំ២០២២នោះទេ៕
