ភ្នំពេញៈ មន្ត្រីជាន់ខ្ពស់ក្រសួងព័ត៌មានបានបដិសេធថា វាមិនមែនជាការពិត និងពុំត្រឹមត្រូវនោះទេ ចំពោះការលើកឡើងរបស់មជ្ឈមណ្ឌលសិទ្ធិមនុស្សកម្ពុជាដែលបានចោទថា ប្រព័ន្ធផ្សព្វផ្សាយឯករាជ្យត្រូវបានរងការដៅមុខសញ្ញា ខណៈដែលសេរីភាពសារព័ត៌មាននៅកម្ពុជាត្រូវបានធានាការពារយ៉ាងគត់មត់ ដោយច្បាប់។
នៅក្នុងសេចក្តីថ្លែងការណ៍របស់មជ្ឈមណ្ឌលសិទ្ធិមនុស្សកម្ពុជា (ម.ស.ម.ក) កាលពីថ្ងៃទី ២៧ ខែមេសា ស្តីពីការចាប់ផ្តើមយុទ្ធនាការសម្រាប់ទិវាសេរីភាពសារព័ត៌មានពិភពលោក ៣ ឧសភា បានលើកឡើងថា នៅប្រទេសកម្ពុជា ប្រព័ន្ធផ្សព្វផ្សាយឯករាជ្យត្រូវបានរងការដៅមុខសញ្ញា ដែលរបកគំហើញរបស់ ម.ស.ម.ក នាពេលថ្មីៗនេះបង្ហាញថា សេរីភាពសារព័ត៌មានរងការរំលោភបំពានយ៉ាងធ្ងន់ធ្ងរក្នុងរយៈពេលប៉ុន្មានឆ្នាំចុងក្រោយនេះ។ ម.ស.ម.ក បានឱ្យដឹងថា៖ «អ្នកសារព័ត៌មានដែលធ្វើការនៅក្នុងប្រទេសកម្ពុជាតែងតែរងការបំភិតបំភ័យ ឃ្លាំមើល គំរាម និងយាយីតាមប្រព័ន្ធតុលាការ ចំពោះការបំពេញការងារស្របច្បាប់របស់ខ្លួន»។
ចាប់ពីថ្ងៃទី ១ ខែកញ្ញា ឆ្នាំ ២០២០ ដល់ថ្ងៃទី ៣១ ខែសីហា ឆ្នាំ ២០២១ ម.ស.ម.ក បានកត់ត្រាទុកថា មានអ្នកសារព័ត៌មានយ៉ាងហោចណាស់ចំនួន ៩ នាក់បានប្រឈមនឹងការយាយីតាមប្រព័ន្ធតុលាការ ដែលរួមមាន ការគំរាមកំហែង និងការកោះហៅពីតុលាការរហូតដល់ការចាប់ខ្លួន តាមអំពើចិត្ត និងការផ្តន្ទាទោសដោយហេតុផលនយោបាយ ហើយអាជ្ញាប័ណ្ណសារព័ត៌មានចំនួន ៧ ត្រូវបានដកហូតដោយក្រសួងព័ត៌មានផងដែរ។
ទាក់ទងនឹងការលើកឡើងនេះ លោក មាស សុភ័ណ្ឌ អ្នកនាំពាក្យក្រសួងព័ត៌មាន បានថ្លែងកាលពីថ្ងៃទី ២៩ ខែមេសាថា ការលើកឡើងរបស់មជ្ឈមណ្ឌលសិទ្ធិមនុស្សកម្ពុជាគឺជាការមិនពិត និងពុំត្រឹមត្រូវនោះទេ ដោយលោកបញ្ជាក់ថា សេរីភាពសារព័ត៌មាននៅកម្ពុជាត្រូវបានធានាការពារយ៉ាងគត់មត់ដោយច្បាប់ស្តីពីរបបសារព័ត៌មាន ច្បាប់ និងលិខិតបទដ្ឋានគតិយុត្តិនានាស្របតាមរដ្ឋធម្មនុញ្ញ។ លោកបន្តថា អង្គភាពសារព័ត៌មាន ក៏ដូចជាអ្នកសារព័ត៌មាននៅក្នុងប្រទេសកម្ពុជាបានបំពេញតួនាទីរបស់ខ្លួនដោយភាពឯករាជ្យ ដោយសារតែរាល់ការផ្សព្វផ្សាយព័ត៌មានមិនមានការត្រួតពិនិត្យជាមុននោះទេ។
លោក មាស សុភ័ណ្ឌ មានប្រសាសន៍ថា៖ «ជាការកត់សម្គាល់របស់ខ្ញុំ ក្រុមអង្គការសង្គមស៊ីវិល រួមទាំងបានឱ្យនិយមន័យ អ្នកសារព័ត៌មានឯករាជ្យទាល់តែអ្នកសារព័ត៌មាននោះផ្សាយព័ត៌មានដែលរិះគន់ទៅលើរាជរដ្ឋាភិបាលកម្ពុជាទើបហៅថាអ្នកសារព័ត៌មានឯករាជ្យ»។
ការឱ្យនិយមន័យនេះ គឺជាការឱ្យនិយមន័យដែលពុំត្រឹមត្រូវជាការផ្តល់និយមន័យធ្វើឱ្យបែកបាក់សាមគ្គីភាព និងបាត់បង់នូវតម្លៃវិជ្ជាជីវៈសារព័ត៌មាន ក៏ដូចជាការអនុវត្តសិទ្ធិសេរីភាពសារព័ត៌មាននៅក្នុងប្រទេសកម្ពុជាផងដែរ។
លោក មាស សុភ័ណ្ឌ បានបញ្ជាក់ថា៖ «ក្រសួងព័ត៌មាន តែងតែផ្តល់នូវការទទួលស្គាល់ភាពស្របច្បាប់ និងផ្តល់តម្លៃដល់អង្គភាពសារព័ត៌មាន និងអ្នកសារព័ត៌មានដែលកំពុងប្រកបវិជ្ជាជីវៈសារព័ត៌មាននូវសិទ្ធិស្មើៗគ្នា ដោយពុំមានការបែងចែកនូវនិន្នាការនយោបាយ ឬអង្គភាពសារព័ត៌មានតូច ឬធំនោះទេ ហើយពួកគេត្រូវបានការពារដោយស្មើភាពគ្នាតាមផ្លូវច្បាប់ដែលមានជាធរមាន»។
យោងតាមក្រសួងព័ត៌មានកម្ពុជាមានអង្គភាពផ្សព្វផ្សាយទាំង បែបប្រពៃណី និងបែបទំនើប (ផ្សព្វផ្សាយតាមអនឡាញ និងឌីជីថល) ចំនួន ២ ១០០ អង្គភាព និងមានអ្នកសារព័ត៌មានជាតិ និងបរទេស ដែលកំពុងប្រកបវិជ្ជាជីវៈសារព័ត៌មាននៅកម្ពុជា ប្រមាណជិត ៦ ០០០ នាក់ ដែលក្នុងនោះមានស្ត្រីប្រមាណ ៥០០ នាក់ ដែលកំពុងបំពេញតួនាទីយ៉ាងសកម្មក្នុងការផ្សព្វផ្សាយព័ត៌មានក្នុងប្រទេសកម្ពុជា និងពីជុំវិញពិភពលោក។
ដោយឡែក រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ បានបង្ហាញពីការគាំទ្រ និងបន្តខិតខំយ៉ាងមោះមុតក្នុងការលើកកម្ពស់សេរីភាពសារព័ត៌មាននៅកម្ពុជា ប៉ុន្តែលោកបានសម្តែងនូវការខកចិត្ត ចំពោះប្រទេសមួយចំនួនដែលអនុវត្តគោលការណ៍ស្តង់ដា ២ ចំពោះសេរីភាពសារព័ត៌មាន។
លោក ខៀវ កាញារីទ្ធ បានលើកឡើង នៅថ្ងៃទី ២៩ ខែមេសា ថា ក្រសួងព័ត៌មានបាននិងកំពុងបន្តគាំទ្រសេរីភាពនៃការបញ្ចេញមតិ ដើម្បីធ្វើយ៉ាងណាឱ្យប្រជាជនកម្ពុជាអាចអនុវត្តសិទ្ធិនេះដោយស្មើភាព និងមិនមានការភ័យខ្លាច ប៉ុន្តែក្រោមគោលការណ៍នៃច្បាប់របស់ប្រទេសកម្ពុជា។
លោកមានប្រសាសន៍ថា៖ «ការលើកកម្ពស់សេរីភាពនេះក៏ដើម្បីឱ្យប្រជាជនកម្ពុជាទាំងអស់ដែលនៅពាសពេញពិភពលោក អាចជ្រើសរើសមាគ៌ា ឬថ្នាក់ដឹកនាំ ឬអ្នកដឹកនាំរបស់ខ្លួន ដោយការយល់ដឹងច្បាស់។ ហេតុដូច្នេះហើយ ខ្ញុំសង្ឃឹមថា ជនរួមជាតិទាំងអស់មិនថា នៅក្នុងប្រទេស ឬក្រៅប្រទេសនឹងបន្តខិតខំគាំទ្រគោលការណ៍សេរីភាពនៃការបញ្ចេញមតិរួមទាំងគោលការណ៍នៃសេរីភាពសារព័ត៌មាននេះឱ្យបានល្អជាទូទៅទាំងអស់គ្នា»។
ជាមួយគ្នានេះ លោក ខៀវ កាញារីទ្ធ ក៏បានអំពាវនាវដល់គ្រប់ប្រទេសទាំងអស់ឱ្យខិតខំអនុវត្តសេរីភាពសារព័ត៌មានឱ្យមានស្តង់ដាតែ ១ ដើម្បីសុខុមាលភាព សេរីភាព សន្តិភាព និងដើម្បីជាជម្រើសប្រកបដោយសេរីភាពក្នុងការសម្រេចចិត្តរបស់ប្រជាជនគ្រប់រូប។
សូមបញ្ជាក់ផងដែរថា នៅថ្ងៃទី ៣ ខែឧសភា ឆ្នាំ ២០២២ លោក ហ៊ុន ម៉ាណែត អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងទ័ពជើងគោក តំណាងលោកនាយករដ្ឋមន្ត្រី ហ៊ុន សែន នឹងចូលរួមក្នុងឱកាសទិវាសេរីភាពសារព័ត៌មានពិភពលោក លើកទី ២៩ ក្រោមមូលបទ «សារព័ត៌មានក្រោមសម្ពាធប្រព័ន្ធឌីជីថល» នៅរាជធានីភ្នំពេញ៕