ភ្នំពេញៈ រាជរដ្ឋាភិបាលកម្ពុជាបានកំណត់ឱ្យប្រជាពលរដ្ឋទាំងអស់ត្រូវទទួលនូវការចាក់វ៉ាក់សាំងបង្ការជំងឺកូវីដ ១៩ ដូសជំរុញជាដូសទី៣ ដែលវាជាកាតព្វកិច្ចមួយ ដើម្បីបង្កើនភាពស៊ាំសហគមន៍ការពារពីការឆ្លងមេរោគកូវីដ ១៩ និងជាការទទួលខុសត្រូវរបស់បុគ្គល ប៉ុន្តែវាមិនមែនកាតព្វកិច្ចនៃការដាក់ទោសទណ្ឌនោះទេ។
ក្រសួងសុខាភិបាល និងក្រសួងការពារជាតិរួមនឹងក្រុមគ្រូពេទ្យស្ម័គ្រចិត្តបានធ្វើយុទ្ធនាការចាក់វ៉ាក់សាំងកូវីដ ១៩ ដូសជំរុញ (ដូសទី៣) ទៅដល់ប្រជាពលរដ្ឋ ដោយបានកំណត់យកគោលដៅសំខាន់ចំនួន ៣ ជាជំហានដំបូងគឺ រោងចក្រ សហគ្រាស ទីផ្សារទីប្រជុំជន និងសាលារៀន។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាល និងជាប្រធានគណៈកម្មការចំពោះកិច្ចចាក់វ៉ាក់សាំងកូវីដ ១៩ ក្នុងក្របខ័ណ្ឌទូទាំងប្រទេស បានថ្លែងឱ្យដឹងកាលពីថ្ងៃទី ៣០ ខែមេសា ក្នុងពេលចុះពិនិត្យមើលការងារចាក់វ៉ាក់ នៅក្នុងខេត្តស្វាយរៀងថា តាមការសង្កេតរបស់លោកស្រីក្នុងរយៈពេលនៃការចាប់ផ្តើមយុទ្ធនាការចាក់ដូសជំរុញនេះ គឺការចាក់មានសម្ទុះកើនឡើងច្រើនគួរឱ្យកត់សម្គាល់។
លោកស្រីថ្លែងថា៖ «ដំណើរការនៃការចាក់វ៉ាក់សាំងមានសម្ទុះកើនឡើងច្រើន ហើយអ្វីដែលជាការកត់សម្គាល់របស់ខ្ញុំ គឺប្រជាពលរដ្ឋបានលើកឡើងផងដែរថា ការធ្វើយុទ្ធនាការនេះគឺជាការបង្កនូវភាពងាយស្រួលមួយសម្រាប់គាត់ ដោយសារពួកគាត់មិនបានទៅចាក់នៅតាមទីតាំងតាមមន្ទីរសុខាភិបាលសាធារណៈដែលយើងបានរៀបចំ»។
លោកស្រីថ្លែងថា៖ «ខ្ញុំសូមអំពាវនាវទៅដល់ប្រជាពលរដ្ឋទាំងអស់កុំមានការអល់អែកមកទទួលយកនូវការចាក់វ៉ាក់សាំងនេះ ដោយសារវាជាកាតព្វកិច្ចមួយដែលវាជាកាតព្វកិច្ចនៃការចូលរួមរបស់បងប្អូនប្រជាពលរដ្ឋ មិនមែនជាកាតព្វកិច្ចដែលមានការដាក់ទោសទណ្ឌអីទេ គឺជាការទទួលខុសត្រូវរបស់បុគ្គលដែលត្រូវចូលរួមចំណែកកសាង ពង្រឹង និងបង្កើននូវកងការពាររបស់បុគ្គលនីមួយៗ»។
ទន្ទឹមនឹងនេះដែរ ក្រសួងសុខាភិបាលក៏នឹងធ្វើការពិចារណាក្នុងការកំណត់គោលដៅមួយជំហានទៀតទាក់ទងនឹងយុទ្ធនាការចាក់វ៉ាក់សាំងកូវីដ ១៩ បន្ទាប់ពីគោលដៅនៃការចាក់នៅតាមរោងចក្រ ទីផ្សារ និងសាលារៀនត្រូវបានបញ្ចប់រួចរាល់។
លោកស្រី វណ្ណឌីន ថ្លែងថា៖ «យើងមិនមែនធ្វើតែគោលដៅទាំង ៣ នេះទេ គឺនៅពេលដែលយើងធ្វើគោលដៅទាំង ៣ នេះរួចហើយ យើងនឹងសំដៅទៅរកគោលដៅផ្សេងៗទៀតដែលបងប្អូនយើងខ្លះមិនបានមកទីផ្សារហើយក៏មិនបានចាក់វ៉ាក់សាំងដែរ។ ដូចនេះហើយយើងពិចារណាក្នុងការធ្វើការងារមួយដំណាក់កាលទៀតជាមួយគ្នា»។
លោកស្រីបានបញ្ជាក់ទៀតថា ក្រុមការងារចាក់វ៉ាក់សាំងនឹងធ្វើការពិនិត្យលទ្ធភាពជាមួយនឹងភូមិ ឃុំ ដើម្បីព្យាករលើចំណុចនេះ ប៉ុន្តែក៏តម្រូវឱ្យមានការចូលរួមបន្ថែមទៀតជាមួយនឹងរដ្ឋបាលខេត្ត-ស្រុក ដើម្បីធ្វើការព្យាករប្រជាពលរដ្ឋនៅតាមឃុំនីមួយៗ មកទទួលយកវ៉ាក់សាំង ហើយធ្វើការកំណត់ថ្ងៃសម្រាប់ចុះចាក់វ៉ាក់សាំងជូនពួកគាត់តែម្តង។
ដោយសារអត្រានៃការចាក់វ៉ាក់សាំងកូវីដ ១៩ មានកំណើនរហូតជាង ៩៣% ធៀបនឹងប្រជាពលរដ្ឋសរុប ១៦ លាននាក់ លោកនាយករដ្ឋមន្ត្រី ហ៊ុន សែន បានសម្រេចលើកលែងកាតព្វកិច្ចពាក់ម៉ាស់នៅតាមទីសាធារណៈ និងទីតាំងចំហ សម្រាប់ប្រជាពលរដ្ឋចាប់តាំងពីថ្ងៃទី ២៦ ខែមេសា។
លោក ឥត សារ៉ាត់ អគ្គមេបញ្ជាការរង នាយសេនាធិការចម្រុះនៃកងយោធពលខេមរភូមិន្ទ និងជាប្រធានប្រតិបត្តិការចាក់វ៉ាក់សាំងការពារជំងឺឆ្លងកូវីដ ១៩ ក្រសួងការពារជាតិក៏បានចុះពិនិត្យមើលដំណើរការនៃយុទ្ធនាការចាក់វ៉ាក់សាំងការពារជំងឺកូវីដ ១៩ ដូសទី ៣ និងដូសទី ៤ ដល់ពលរដ្ឋ កម្មករ-និយោជិត ក្នុងភូមិសាស្ត្រខេត្តកណ្តាល និងខេត្តកំពង់ស្ពឺ កាលពីថ្ងៃទី ២៩ ខែមេសា។
លោក ឥត សារ៉ាត់ ថ្លែងថា យុទ្ធនាការជាតិចាក់វ៉ាក់សាំងការពារជំងឺកូវីដ-១៩ដូសជំរុញនៅខេត្តកណ្តាល និងខេត្តកំពង់ស្ពឺនេះគឺជាគំរូ និងជាបទពិសោធសម្រាប់ការចាក់វ៉ាក់សាំងដូសជំរុញប្រភេទ AstraZeneca ដល់ប្រជាពលរដ្ឋ តាមបណ្តាខេត្ត ក្រុងដទៃៗទៀតនៅទូទាំងប្រទេស។
លោកបានថ្លែងថា៖ «ដើម្បីសម្រេចផែនការរបស់រាជរដ្ឋាភិបាល បងប្អូនក្រុមគ្រូពេទ្យកងកម្លាំងយើង គាត់ប្រឹងប្រែងខ្លាំងណាស់។ ក្រុមគ្រូពេទ្យកងទ័ពយើងបានបម្រើសកម្មភាពចាក់វ៉ាក់សាំងជូនកងទ័ព និងគ្រួសារ និងប្រជាពលរដ្ឋ ដោយមិនមានពេលសម្រាកនោះឡើយ»។ លោក នៅតែអំពាវនាវដល់ប្រជាពលរដ្ឋគ្រប់រូបត្រូវរួសរាន់ទៅចាក់សាំងដូសមូលដ្ឋាន និងដូសជំរុញនៅគ្រប់ទីតាំងចាក់៕
វីដេអូ៖