The Phnom Penh Post Search

Search form




Logo of Phnom Penh Post newspaper Phnom Penh Post - មន្ត្រី​ច្បាប់​ប្រជុំ​ពិនិត្យ​បញ្ជី​ឈ្មោះ​អ្នកទោស​មុន​សម្រេច​បន្ធូរបន្ថយ និង​លើក​លែង​ទោស

មន្ត្រី​ច្បាប់​ប្រជុំ​ពិនិត្យ​បញ្ជី​ឈ្មោះ​អ្នកទោស​មុន​សម្រេច​បន្ធូរបន្ថយ និង​លើក​លែង​ទោស

Content image - Phnom Penh Post
​អ្នកទោស​ក្នុងពន្ធនាគារខេត្តកំពត កាលពីឆ្នាំ ២០១៩។ រូបថត Kampot Provincial Prison

មន្ត្រី​ច្បាប់​ប្រជុំ​ពិនិត្យ​បញ្ជី​ឈ្មោះ​អ្នកទោស​មុន​សម្រេច​បន្ធូរបន្ថយ និង​លើក​លែង​ទោស

ភ្នំពេញៈ គណៈកម្មការ​ថ្នាក់ជាតិ​ពិនិត្យ និង​វាយតម្លៃ​បញ្ជី​ឈ្មោះ​ទណ្ឌិត​ស្នើសុំ​បន្ធូរ​បន្ថយទោស និង​លើកលែងទោស​បាន​បញ្ចប់​កិច្ចប្រជុំ​កាលពី​ចុងសប្ដាហ៍ ក្នុងការ​ពិនិត្យ និង​វាយតម្លៃ​បញ្ជី​ឈ្មោះ​ទណ្ឌិត​ប្រុស​ និង​ស្រី​ចំនួន​ ១ ២៨៦ ​នាក់ ដែល​បានស្នើ​ពី​ពន្ធនាគារ​រាជធានី​-​ខេត្ត និង​មណ្ឌល​អប់រំ​កែប្រែ​ចំនួន ​៤ មុននឹង​សម្រេចការ​បន្ធូរបន្ថយ​ទោស និង​លើកលែងទោស​។

លោក គឹម សន្តិភាព រដ្ឋលេខាធិការ និង​ជា​អ្នកនាំពាក្យ ក្រសួង​យុត្តិធម៌​ថ្លែង​នៅ​ថ្ងៃទី​ ១ ខែឧសភា​ថា គណៈកម្មការ​ថ្នាក់ជាតិ​ពិនិត្យ និង​វាយតម្លៃ​បញ្ជី​ឈ្មោះ​ទណ្ឌិត​ស្នើសុំ​បន្ធូរបន្ថយទោស និង​លើកលែង​ទោស​បាន​ធ្វើការ​ប្រជុំ​ពិនិត្យ​បញ្ជី​ឈ្មោះ​ទណ្ឌិត​ដែល​ស្នើសុំ​បន្ធូរ​បន្ថយទោស និង​លើកលែង​ទោស​រួចហើយ​កាលពី​ថ្ងៃទី ​២៩ ខែមេសា ឆ្នាំ​ ២០២២​ ប៉ុន្តែ​ចំនួន​អ្នក​ដែល​ត្រូវ​បានស្នើ​បន្ធូរ​បន្ថយទោស និង​លើកលែង​ទោស​នៅ​មិនទាន់​ដឹង​នោះទេ​។

លោក​បាន​ថ្លែងថា​៖ «​ក្រោយ​កិច្ចប្រជុំ​ពិនិត្យ វាយតម្លៃ​បញ្ជី​ឈ្មោះ​ទណ្ឌិត​ដែល​ស្នើសុំ​បន្ធូរបន្ថយទោស និង​លើកលែងទោស ក្រុមការងារ​បច្ចេកទេស​បាននិងកំពុង​បន្តធ្វើ​ការលើ​រឿងនេះ​ ដើម្បី​ពិនិត្យ​ឯកសារ​ចុងក្រោយ​។ ការពិនិត្យ​ឯកសារ​ចុងក្រោយ​ចប់សព្វគ្រប់​ទើប​ដឹង​ពី​ចំនួន​ទណ្ឌិត​ដែល​ត្រូវ​បន្ធូរ​បន្ថយទោស និង​លើកលែង​ទោស​។ ខ្ញុំ​នឹង​ជម្រាបជូន​​នូវ​ស្ថិតិ​នៃ​ការសម្រេច​នេះ​»​។

ក្រសួងយុត្តិធម៌​សរសេរ​លើ​ទំព័រ​ហ្វេសប៊ុក​នៅ​ថ្ងៃទី​ ២៩ ខែមេសា ឆ្នាំ​ ២០២២ បានឱ្យដឹងថា លោក កើត រិទ្ធ រដ្ឋមន្ត្រី​ក្រសួង​យុត្តិធម៌ និង​ជា​ប្រធាន​គណៈកម្មការ​ថ្នាក់ជាតិ ពិនិត្យ និង​វាយតម្លៃ​បញ្ជី​ឈ្មោះ​ទណ្ឌិត​ស្នើសុំ​បន្ធូរ​បន្ថយទោស និង​លើកលែងទោស​បាន​ដឹកនាំ​កិច្ចប្រជុំ​ពិនិត្យ និង​វាយតម្លៃ បញ្ជី​ឈ្មោះ​ទណ្ឌិត​ស្នើសុំ​បន្ធូរ​បន្ថយទោស និង​លើកលែង​ទោស ដែល​ស្នើ​ពី​ពន្ធនាគារ​រាជធានី​-​ខេត្ត និង​មណ្ឌល​អប់រំ​កែប្រែ​ចំនួន​ ៤ សរុប​ទណ្ឌិត ចំនួន ១ ២៨៦ ​នាក់ (​ស្រី ១២៧ ​នាក់​)​។ កិច្ចប្រជុំ​នេះ មានការ​ចូលរួម​ពី​លោក ប៉ាវ ហមផាន រដ្ឋលេខាធិការ​ក្រសួង​មហាផ្ទៃ លោក អ៊ុក សាវុធ អគ្គព្រះរាជអាជ្ញា​នៃ​មហាអយ្យការ​អម​សាលា​ឧទ្ធរណ៍​ភ្នំពេញ តំណាង​អគ្គនាយកដ្ឋាន​ពន្ធនាគារ តំណាង​ក្រុមប្រឹក្សា​នីតិកម្ម​នៃ​ក្រសួងមហាផ្ទៃ និង​ថ្នាក់ដឹកនាំ និង​មន្ត្រី​ជំនាញ​របស់​ក្រសួង​យុតិ្តធម៌​ផងដែរ​។

លោក អ៊ុង ស៊ីផាន ប្រធាន​ពន្ធនាគារ​ខេត្ត​បន្ទាយមានជ័យ​ថ្លែង​នៅ​ថ្ងៃទី ​១ ខែឧសភា ថា​ពន្ធនាគារ​ខេត្តបន្ទាយមានជ័យ​បាន​បញ្ជូន​បញ្ជី​ឈ្មោះ​អ្នកទោស​ទៅ​គណៈកម្មការ​ថ្នាក់ជាតិ​តាំងពី​ជាង​ ១​ ខែ​មុន​មក ប៉ុន្តែ​ពុំទាន់​មានការ​សម្រេច​ពី​ថ្នាក់លើ​នៅឡើយ​។

លោក​បញ្ជាក់ថា ក្នុង​ពន្ធនាគារ​ខេត្ត​បន្ទាយមានជ័យ មាន​សភាព​ធម្មតា ហើយ​ចំនួន​អ្នកទោស​មិនមាន​ការ​ចង្អៀតណែន​នោះទេ​។

លោក អំ សំអាត នាយករង​ទទួលបន្ទុក​ផ្នែក​ឃ្លាំមើល និង​ការពារ​សិទ្ធិមនុស្ស​នៃ​អង្គការ​លីកាដូ​ថ្លែង​នៅ​ថ្ងៃទី ​១ ខែឧសភា​ថា ដំណើរការ​នៃ​ការបន្ធូរបន្ថយ​ទោស និង​លើកលែងទោស​សម្រាប់​ឱកាស​បុណ្យ​ចូលឆ្នាំថ្មី​មានការ​យឺតយ៉ាវ​ទៅហើយ ហើយ​ការយឺតយ៉ាវ​នេះ​ទៀតសោត គេ​សង្កេតឃើញថា មិនមែន​ទើបតែ​ ១ ​ដងនោះ​ទេ គឺមាន​ជាច្រើន​ដង​មកហើយ​។

លោក​ថា​៖ «​យើង​ជា​អង្គការ​សង្គម​ស៊ីវិល​យើង​ចង់ឃើញ​ដំណើរការ​សម្រេច​ហ្នឹង​វា​ទៅតាម​ពេលវេលា​ឱ្យបាន​ទាន់​ពេលវេលា​គ្រប់គ្រាន់ ហើយ​មួយទៀត​គឺ​ធ្វើ​ម៉េច​ឱ្យមាន​តម្លាភាព​សម្រាប់​បន្ធូរបន្ថយ និង​លើកលែង​ទោស​ហ្នឹង​បាទ​»​។ លោក​ថា ការយឺតយ៉ាវ​ក្នុងការ​បន្ធូរបន្ថយ​ទោស និង​លើកលែងទោស​ទណ្ឌិត​អាចធ្វើឱ្យ​មានការ​ចង្អៀត​ណែន​ក្នុង​ពន្ធនាគារ​បន្ថែមទៀត​។

ប៉ុន្ដែ​លោក សន្តិភាព បាន​បញ្ជាក់ថា ការបន្ធូរបន្ថយ​ទោស និង​លើកលែងទោស​នេះ​គឺអាច​ធ្វើ​ក្នុងឱកាស​នីមួយៗ​ដាច់ពីគ្នា​ក៏បាន ឬមួយ​ក៏​ធ្វើ​ច្រើន​ឱកាស​ក៏បាន​។ ​តាម​ព្រះរាជក្រឹត្យ​ស្តីពី​ការ​បន្ធូរបន្ថយ​ទោស និង​ការលើកលែង​ទោស ចំពោះ​ទណ្ឌិត​កំណត់ ៥ ​ដង ក្នុង​ ១ ​ឆ្នាំ​៕

អត្ថបទគួរចាប់អារម្មណ៍