សៀមរាបៈ អ្នកនាំពាក្យតុលាការខេត្តសៀមរាបបាននិយាយនៅថ្ងៃអាទិត្យថាចៅក្រមស៊ើបសួរសាលាដំបូងខេត្តសៀមរាបបានសម្រេចឃុំខ្លួនមន្ត្រីកងរាជអាវុធហត្ថ ២ នាក់ ដាក់ពន្ធនាគារជាបណ្ដោះអាសន្ន បន្ទាប់ពីពួកគេត្រូវបានកម្លាំងកងរាជអាវុធហត្ថលើផ្ទៃប្រទេសចាប់ខ្លួនកាលពីថ្ងៃសៅរ៍ ពាក់ព័ន្ធករណីលាក់បំបាំងតម្រុយនៃជនប្រព្រឹត្តអំពើជួញដូរគ្រឿងញៀន និងបង្ខាំងមនុស្សខុសច្បាប់។
លោក យ៉ិន ស្រ៊ាង អ្នកនាំពាក្យសាលាដំបូងខេត្តសៀមរាបបានប្រាប់ ភ្នំពេញ ប៉ុស្តិ៍ នៅថ្ងៃទី ១ ខែឧសភា ឆ្នាំ ២០២២ ថា ជនសង្ស័យឈ្មោះ ធាវ ច័ន្ទតារា អាយុ ៥២ ឆ្នាំ ជានាយការិយាល័យប្រឆាំងបទល្មើសគ្រឿងញៀននៃកងរាជអាវុធហត្ថខេត្តសៀមរាប និងជំនួយការរបស់គាត់ម្នាក់ឈ្មោះ មៀម ណាក់ អាយុ ២៨ ឆ្នាំ ត្រូវបានកម្លាំងកងរាជអាវុធហត្ថលើផ្ទៃប្រទេសចាប់ខ្លួនបញ្ជូនមកកាន់សាលាដំបូងខេត្តសៀមរាបភ្លាមៗកាលពីថ្ងៃទី ៣០ ខែមេសា ឆ្នាំ ២០២២ បន្ទាប់ពីបានស្រាវជ្រាវរកឃើញថា មន្ត្រីទាំង ២ នាក់នេះមានជាប់ពាក់ព័ន្ធនឹងការសមគំនិតក្នុងអំពើជួញដូរគ្រឿងញៀន។
ជនសង្ស័យទាំង ២ ត្រូវបានលោក សួន សុរាសី ចៅក្រមស៊ើបសួរសាលាដំបូងខេត្តសៀមរាបសម្រេចឃុំខ្លួនដាក់ពន្ធនាគារជាបណ្ដោះអាសន្ន ដោយក្នុងនោះជនសង្ស័យឈ្មោះ ធាវ ច័ន្ទតារា ត្រូវបានចោទប្រកាន់ចំនួន ៤ បទល្មើសរួមមាន បទលាក់បំបាំងតម្រុយ បទមិនប្ដឹងបរិហារបទឧក្រិដ្ឋ ឬមជ្ឈិមដោយអ្នករាជការសាធារណៈជាអាទិ៍ បទបង្ខាំងមនុស្សដោយខុសច្បាប់ បទរក្សាទុកដោយខុសច្បាប់នូវសារធាតុញៀន ដែលអាចនឹងត្រូវប្រឈមការផ្ដន្ទាទោសជាប់ពន្ធនាគារមិនក្រោមពី ៥ ឆ្នាំនោះទេ។
ចំណែកជនសង្ស័យឈ្មោះ មៀម ណាក់ ត្រូវបានចោទប្រកាន់ចំនួន ២ បទល្មើស រួមមានបទលួចតាមមាត្រា ៣៥៦ នៃក្រមព្រហ្មទណ្ឌ និងបទមិនប្ដឹងបរិហារបទឧក្រិដ្ឋ ឬមជ្ឈិមដោយអ្នករាជការសាធារណៈជាអាទិ៍ តាមមាត្រា ៥២៨ នៃក្រមព្រហ្មទណ្ឌ។ ជនសង្ស័យឈ្មោះ មៀម ណាក់ អាចនឹងត្រូវប្រឈមការផ្ដន្ទាទោស ៣ ឆ្នាំព្រោះក្នុងមាត្រា ៣៥៦ នៃក្រមព្រហ្មទណ្ឌបានកំណត់ការផ្ដន្ទាទោសជាប់ពន្ធនាគារពី ៦ ខែ ដល់ ៣ ឆ្នាំ និងពិន័យជាប្រាក់ពី ១ លានទៅ ៦ លានរៀល ចំពោះជនណាដែលបានដកហូតដោយទុច្ចរិតនូវទ្រព្យសម្បត្តិ ឬ វត្ថុផ្សេងទៀតរបស់អ្នកដទៃតាមគ្រប់មធ្យោបាយក្នុងគោលបំណងយកមកធ្វើជាកម្មសិទ្ធិផ្ទាល់ខ្លួន។
ជុំវិញករណីនេះ លោក សៅ សុខា មេបញ្ជាការកងរាជអាវុធហត្ថលើផ្ទៃប្រទេស និយាយថា ការចាប់ខ្លួនមន្ត្រីអាវុធហត្ថទាំង ២ នាក់ខាងលើនេះ បន្ទាប់ពីក្រុមមន្ត្រីជំនាញចុះស្រាវជ្រាវរកឃើញថា ពួកគេពិតជាមានពាក់ព័ន្ធនឹងបទល្មើសគ្រឿងញៀន។
លោកបានបញ្ជាក់ថា៖ «ក្នុងនាមជាមន្ត្រីនគរបាលយុត្តិធម៌ប្រយុទ្ធប្រឆាំងគ្រឿងញៀន ប៉ុន្តែពួកគេបានប្រព្រឹត្តបទល្មើសពេលបំពេញតួនាទីដោយគាត់សមគំនិតជាមួយនឹងការជួញដូរគ្រឿងញៀន ដូច្នេះអាវុធហត្ថត្រូវតែបង្ក្រាបតែម្តង»។
លោក ថ្លែងថា កម្លាំងកងរាជអាវុធហត្ថត្រូវតែបង្ក្រាបមន្ត្រីអាវុធហត្ថទាំងឡាយណាដែលធ្វើខុសដោយមិនចាំបាច់ឱ្យអង្គភាពណាមកបង្ក្រាបនោះឡើយពោលត្រូវអនុវត្តតាមអភិក្រមរបស់លោកនាយករដ្ឋមន្ត្រី ហ៊ុន សែន គឺ «ងូតទឹក ឆ្លុះកញ្ចក់ ដុសក្អែល ព្យាបាល និងវះកាត់»។
លោក សៅ សុខា បានបន្ថែមថា៖ «សម្រាប់កងរាជអាវុធហត្ថយើងមានទិសស្លោកជាត្រីវិស័យបង្ហាញផ្លូវសម្រាប់របៀបធ្វើការងាររួម គឺចំពោះប្រទេសជាតិត្រូវតែការពារ ចំពោះប្រជាជនត្រូវតែបម្រើចំពោះច្បាប់ត្រូវតែគោរព និងចំពោះបទល្មើសត្រូវតែបង្ក្រាប»៕