កំពង់ស្ពឺៈ កម្លាំងនគរបាលស្រុកឱរ៉ាល់បានឃាត់រថយន្តដឹកឈើមួយគ្រឿង ខណៈអ្នកបើកបររថយន្តបានរត់គេចខ្លួនបាត់នៅពេលចុះល្បាតរក្សាសន្តិសុខនៅភូមិត្រពាំងអង្គ្រង ឃុំត្រពាំងជោរ ស្រុកឱរ៉ាល់នៅយប់ថ្ងៃទី ១ ខែឧសភា និងបានបញ្ជូនរថយន្តទៅស្នងការដ្ឋាននគរបាលខេត្តកំពង់ស្ពឺភ្លាមៗ។
លោក ប៊ុត ប៊ុនធឿន អធិការនគរបាលស្រុកឱរ៉ាល់ប្រាប់ភ្នំពេញប៉ុស្តិ៍នៅថ្ងៃទី ២ ឧសភាថា រថយន្តដឹកឈើនោះត្រូវបានចាប់ឃាត់ម៉ោង ២ យប់ថ្ងៃទី ១ ឧសភា ហើយបានបញ្ជូនភា្លមៗទៅស្នងការដ្ឋាននគរបាលខេត្ត ដើម្បីធ្វើការវាស់វែងជាមួយអ្នកជំនាញរដ្ឋបាលព្រៃឈើ ប៉ុន្តែជនសង្ស័យជាអ្នកបើកបរបានរត់គេចខ្លួនបាត់។ លោកថា៖ «យើងប្រគល់ទៅឱ្យជំនាញសេដ្ឋកិច្ចខេត្តគេយកទៅទាំងអស់ហ្នឹង អត់មានធ្វើការវាស់វែងនៅកន្លែងយើងនេះទេការវាស់វែងគឺនគរបាលសេដ្ឋកិច្ចខេត្ត គេសហការជាមួយជំនាញមេព្រៃ»។ កម្លាំងនគរបាលមិនដឹងច្បាស់ថា រថយន្តនោះ ធ្វើដំណើរទៅកាន់ទីណាប្រាកដឡើយ តែអាចដឹកឈើចេញពីឃុំត្រពាំងជោរបម្រុងធ្វើដំណើរឆ្ពោះទៅស្រុកថ្ពង។ ឈើក្នុងរថយន្តនោះជាប្រភេទឈើម្រេញអារជាបន្ទះៗ។
លោក សម សាមួន ស្នងការនគរបាលខេត្តកំពង់ស្ពឺប្រាប់ភ្នំពេញប៉ុស្តិ៍នៅថ្ងៃទី ២ ខែឧសភាថា រថយន្តដឹកឈើកំពុងត្រូវបានរក្សាទុកនៅស្នងការដ្ឋាននគរបាលខេត្តហើយចំនួនឈើនៅមិនទាន់បានធ្វើការវាស់វែងនៅឡើយ ដោយកំពុងរង់ចាំខាងរដ្ឋបាលព្រៃឈើ មកធ្វើការវាស់វែងរួមគ្នា។ លោកថ្លែងថា៖ «កាលណាមេព្រៃមកយើងវាស់វែងទាំងស់គ្នាហើយខាងខ្ញុំនឹងធ្វើកំណត់ហេតុប្រគល់ជូនគាត់ហើយគាត់យកទៅណាអាហ្នឹងខ្ញុំអត់ដឹង»។
រថយន្តដែលសមត្ថកិច្ចឃាត់បាននេះ ម៉ាកសាំងយ៉ុង ពណ៌ស ស្លាកលេខ ភ្នំពេញ 2H-6592 គ្មានលិខិតអនុញ្ញាតក្នុងការដឹកជញ្ជូនអនុផលព្រៃឈើ។ វត្ថុតាងពិនិត្យជាក់ស្ដែងមានឈើអារប្រភេទចម្រុះប្រមាណ ៤០ សន្លឹក រីឯអ្នកបើកបរបានរត់គេចខ្លួនបាត់ ហើយពេលនេះសមត្ថកិច្ចកំពុងបន្ដស្រាវជ្រាវ៕