.jpg)
ឧបការីរដ្ឋមន្ត្រីការបរទេសសហរដ្ឋអាមេរិក ទទួលបន្ទុកកិច្ចការអាស៊ីបូព៌ា និងប៉ាស៊ីហ្វិក លោក Daniel Kritenbrink។ រូបថត APMH
ភ្នំពេញៈ ឧបការីរដ្ឋមន្ត្រីការបរទេសសហរដ្ឋអាមេរិក ទទួលបន្ទុកកិច្ចការអាស៊ីបូព៌ា និងប៉ាស៊ីហ្វិក លោក Daniel Kritenbrink ប្រកាសពន្យារពេលធ្វើដំណើរមកបំពេញទស្សនកិច្ចនៅកម្ពុជា ដោយសារលោកត្រូវបានធ្វើតេស្តមានវិជ្ជមានកូវីដ ១៩។
លោកបានបញ្ជាក់ក្នុងបណ្តាញ Twitter ការិយាល័យកិច្ចការអាស៊ីបូព៌ា និងប៉ាស៊ីហ្វិក នាថ្ងៃទី ១ ខែឧសភា ថា៖ «បន្ទាប់ពីមានរោគសញ្ញា ខ្ញុំជាអកុសលបានធ្វើតេស្តមានវិជ្ជមានកូវីដ ១៩។ គួរឱ្យសោកស្តាយនេះមានន័យថាខ្ញុំសូមពន្យារពេលធ្វើដំណើររបស់ខ្ញុំទៅប្រទេសកម្ពុជា និងឡាវ ហើយនឹងធ្វើចត្តាឡីស័កនៅផ្ទះ។ ខ្ញុំទន្ទឹងរង់ចាំឱកាសធ្វើដំណើរទៅកាន់ប្រទេសទាំង ២ នាពេលខាងមុខ»។
លោក W. Patrick Murphy ឯកអគ្គរដ្ឋទូតសហរដ្ឋអាមេរិកប្រចាំកម្ពុជាសរសេរលើបណ្តាញ Twitter នាថ្ងៃទី ១ ឧសភាថា៖ «យើងជូនពរលោកឧបការីរដ្ឋមន្ត្រីការបរទេស Daniel Kriten-brink ឱ្យមានសុខភាពល្អ ហើយទន្ទឹងរង់ចាំឱកាសនាពេលខាងមុខ ដើម្បីទទួលស្វាគមន៍ដំណើរទស្សនកិច្ចរបស់លោកនៅកម្ពុជា»។
លោក Kritenbrink គ្រោងធ្វើដំណើរមកបំពេញទស្សនកិច្ចនៅកម្ពុជា និងឡាវ ចាប់ពីថ្ងៃទី ១-៧ ខែឧសភា ដោយក្រសួងការបរទេសសហរដ្ឋអាមេរិកបញ្ជាក់ក្នុងសេចក្តីប្រកាស នាថ្ងៃទី ២៩ មេសា ថាដំណើរទស្សនកិច្ចនេះនឹងបង្ហាញពីការប្តេជ្ញាចិត្តរបស់សហរដ្ឋអាមេរិកចំពោះសង្គម ២ ដែលក្មេងជាងគេ និងប្រកបដោយថាមពលបំផុតក្នុងចំណោមសង្គមដែល ក្មេងជាងគេ និងប្រកបដោយថាមពលបំផុតផ្សេងទៀតក្នុងតំបន់។
ក្រសួងការបរទេសសហរដ្ឋអាមេរិកបញ្ជាក់ថា ដំណើរទស្សនកិច្ចនេះក៏នឹងពង្រឹងមជ្ឈភាពអាស៊ានបង្ហាញពីការប្តេជ្ញាចិត្តរបស់សហរដ្ឋអាមេរិកចំពោះភាពជាដៃគូមេគង្គ-សហរដ្ឋអាមេរិក ដើម្បីដោះស្រាយបញ្ហាប្រឈមឆ្លងដែន និងលើកកម្ពស់អនុតំបន់មេគង្គប្រកបដោយសុវត្ថិភាព បើកចំហ និងវិបុលភាព។
នៅកម្ពុជា លោក Kritenbrink នឹងជួបជាមួយលោក ប្រាក់ សុខុន ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេសកម្ពុជា និងមន្ត្រីជាន់ខ្ពស់ផ្សេងទៀត ព្រមទាំង យុវជន និងថ្នាក់ដឹកនាំសង្គមស៊ីវិល ដើម្បីពិភាក្សាពីទំនាក់ទំនង ទ្វេភាគីកម្ពុជា-សហរដ្ឋអាមេរិក និងការគាំទ្ររបស់សហរដ្ឋអាមេរិកចំពោះកម្ពុជាក្នុងនាមជាប្រធានអាស៊ានប្តូរវេនឆ្នាំនេះ។
ប្រភពដដែលបញ្ជាក់ថា ក្នុងដំណើរទស្សនកិច្ចនៅប្រទេសទាំង ២ នេះ លោក Kritenbrink នឹងពិភាក្សាអំពីកិច្ចប្រជុំកំពូលពិសេសអាស៊ាន-សហរដ្ឋអាមេរិក ដែលគ្រោងធ្វើនៅថ្ងៃទី ១២-១៣ ខែឧសភា នៅទីក្រុងវ៉ាស៊ីនតោន ដែលលោកJoe Biden ប្រធានាធិបតីសហរដ្ឋអាមេរិកនឹងដឹកនាំកិច្ចប្រជុំពិសេសនេះ។
មន្ត្រីការទូតរូបនេះបញ្ជាក់នៅលើបណ្តាញ Twitter ការិយាល័យកិច្ចការអាស៊ីបូព៌ា និងប៉ាស៊ីហ្វិក នៅ ១ ថ្ងៃមុនលោកឆ្លងជំងឺកូវីដ ១៩ ថា លោកទន្ទឹងរង់ចាំមកធ្វើទស្សនកិច្ចនៅរាជធានី-ភ្នំពេញ និងទីក្រុងវៀងចន្ទន៍ប្រទេសឡាវ ដើម្បីស្វែងយល់កាន់តែច្បាស់អំពីបញ្ហាប្រឈម ចំពោះតំបន់មេគង្គ ក៏ដូចជាឱកាសដើម្បីពង្រីកវិបុលភាព និងសេរីភាពនៅឥណ្ឌូប៉ាស៊ីហ្វិក។
ស្ថានទូតសហរដ្ឋអាមេរិកប្រចាំកម្ពុជាបញ្ជាក់ក្នុងទំព័រហ្វេសប៊ុកនាថ្ងៃទី ៣០ មេសា ថា ស្ថានទូតទន្ទឹងរង់ចាំទទួលស្វាគមន៍ដំណើរទស្សនកិច្ចរបស់លោក Kritenbrink ដែលនឹងផ្តោតពីការប្តេជ្ញារបស់សហរដ្ឋអាមេរិក ចំពោះប្រជាជនកម្ពុជា និងការបន្តគាំទ្រកម្ពុជាក្នុងនាមជាប្រធានកិច្ចប្រជុំអាស៊ានឆ្នាំ ២០២២។
ប្រធានាធិបតីសហរដ្ឋអាមេរិក លោក Joe Biden លើកឡើងក្នុងលិខិតអញ្ជើញលោកនាយករដ្ឋមន្ត្រី ហ៊ុន សែន ចូលរួមកិច្ចប្រជុំកំពូលពិសេសអាស៊ាន-សហរដ្ឋអាមេរិកពីខែមុនថា នៅចំពោះមុខនៃការប្រឈម ដែលពុំធ្លាប់មានពីមុនមក និងកាលានុវត្តភាពដ៏ចម្បងដែលកើតចេញពីការប្រឈមនេះ សហរដ្ឋអាមេរិក និងអាស៊ានបានរួបរួមគ្នាប្រយុទ្ធប្រឆាំងនឹងជំងឺកូវីដ ១៩ និងពង្រឹងប្រព័ន្ធសុខាភិបាលតំបន់ បង្កើនមហិច្ឆតារបស់ភាគីទាំង ២ ក្នុងការដោះស្រាយបញ្ហាអាកាសធាតុលើកកម្ពស់ខ្សែចង្វាក់ផ្គត់ផ្គង់ដែលមានភាពធន់ ពន្លឿននវានុវត្តន៍ និងរឹតចំណងមិត្តភាពឱ្យកាន់តែស៊ីជម្រៅថែមទៀតរវាងប្រជាជនទាំង ២ បូករួមគ្នាមានចំនួន ១ ប៊ីលាននាក់។
លោកថា ក្នុងកិច្ចប្រជុំកំពូលខាងមុខ អាស៊ាន និងសហរដ្ឋអាមេរិកនឹងប្រារព្ធខួបលើកទី ៤៥ នៃភាពជាដៃគូយូរអង្វែង និងលើកពីមហិច្ឆតារួមរវាងភាគីទាំង ២ សម្រាប់សករាជថ្មីនៃទំនាក់ទំនងដៃគូសន្ទនាអាស៊ាន-សហរដ្ឋអាមេរិក៕
